Mehthuuk gah tungpan sinna ~ Dong Mung
Sangsia khatin a sang naupangte kiangah, “Zingciangin plastic ip sungah mehthuuk pum honkhat tunsa in nong pua ciat ding uh hi. Ahi zongin tua na mehthuuk gahte uh pen a min na vuah ciat dinguh a, tua a minte pen na mi mudahte min uh hiding hi,” ci-in a vaikhak hi.
Tua ahih manin amau mehthuuk gah puak dingpen amau mi muhdah zah tawh kizui-in atam atawm pha ding ahi hi.
A vaikhakna om mah bangin sang naupangte’n plastic ip sungah mehthuuk gah hong pua ngeingai uh hi. Pawlkhatte’n pum 2, pawlkhatte’n pum 3, pawlkhatte’n pum 5 cih bangin pua uh a, pawlkhatte bang pum 20 bang pha phial hi. Banghanghiam cihleh amaute in mi muhdah a neihzah uh tawh kituakin a mehthuuk gahte uh zong atam atawm ahi hi.
Tua ciangin a siapa un, tua a mehthuuk gahte uh kal khat sung a paipaina vuah a puak kawikawi nadingun thu a pia hi.
Sang naupangte’n zong tua bangin a paipaina vuah pua kawikawi uh hi. Ni khat hong bei in, ni khat hong tung zel a, tua bang tawh ni lina bang hong cin ciangin tua a mehthuuk gah puakte uh muatlam hong manawh a hong namsia pianta hi. Ni nga bang hong hihtoh ciangin tua mehthuukte hong namsia mahmah in, amau aa ding zong hong dongkholh mahmah tamawk hi.
Pum tampi a puapen aa ding bangin a van zong hong gik semsem a, hong namsia mahmah ta ahih manin thuak haksa mahmah ta hi.
A ni gukna ciang bangin sang naupangte in a mehthuuk gah puakte uh namsia sa luata uh ahih manin phun ngeingai ta uh hi.
A ni sagih ni ciang bangin a gim’ nam zo nawnlo liang uh hi.
A ni giat ni sang hong kah kik uh ciangin sang naupangte kiangah , “Tukal sung bangci na kisa vua leh,?’ ci-in a siapa un a dong hi.
Tua ciangin sang naupangte in, a van puak uh gik a sakna uh leh a gim namsia a sak mahmahna uh a gen uh hi. Adiakin mehthuuk pum tam a neipen bangin haksa a sakna tampi gending a nei hi.
Tua ciangin a siapa un, “Tu a na mehthuuk gah puakte un na lungsim tawng sung vua na puak uh, na mi muhdahte uh hong gennuam ahi hi. Banghanghiam cih leh muhdahna I sungah sawt a om ciangin hong muatkhia a, tua in gim namsia hong piangsak in, mun khempeuh ah I omdan hong nuamsak lo hi.
Mehthuuk gah muat kal khat sung zong puak haksa sa, namsia sa, dongkholh sa na hih vua leh ngaihsun dih un… Na lungsim sunga om tua muhdahna, huatna, elna, thangpaihna gim namsiate sawtpi puakpuak dingin kilawm hiam? Tua ahih manin no tunga hong mawhte maisak unla, na lungsim uh cidam sak un,” ci-in thu a hilh hi.
Thalakna
I nuntakna sungah sang naupangte mehthuuk gah puak mah bangin huatna, muhdahna tawh kidimin amau minciat vawh ding hileng tampi sim zawhloh in I muhdah mi tampitak om kha ding hi. Ahi zongin tuate hangin eima gimna ding, eima vangik ahi dingin I deih takpi zo hiam?
Mehthuuk gahte muat in hong namsiat mah bangin I sunga om muhdahnate hong muat in hong namsia dinga, ei bek hi loin midangte’n zong namsia hong sa kha ding hi. Tua ahih manin tua bang dinmun I tunma in i lungsim sunga om muhdahnate paikhia ni.
A etlawm mahmah paakhuan tawh kibang I lungsim pen mehthuuk muat peuhmah tawh namsia sak loin namtuina tawh kidimin etlawmna tawh a ithuai a nopci paakhuan a suah theih nadingin ei mahmah hanciam ni.
Matthew 5:44 “Ahi zongin ken kong cih in ah na galte uh na it un. Hong samsiate thupha na pia un. Hong mudahte tungah thupha na bawl un. A hong simmawh mite le hong bawlsia mite aa dingin thu na ngetsak un.”
Matthew 6:14 “Mite khialhnate na maisak uh leh vana om na Pa un zong note khialhnate hong maisak ding hi.”
Mark 11: 25-26 “Thu na nget uh ciangin midang khat peuhpeuh tungah lungkim lohna na neih uh leh maisak masa un. Tua hi leh vantung a om na Pa un note mawhna zong hong maisak ding hi. Ahih hangin na maisak kei uh leh vantung a om na Pa un note mawhna zong hong maisak lo ding hi,’ a ci hi.” Rom 12:20 “Tua ahih manin, ‘Na galpa a gilkial leh an pia in. A dangtak leh dawn ding tui pia in…..” Dong Mung
Comment piaknop aomleh...