An Hong Kineekpih Tanghtangh
Ko leh ko bangmah a ka kisim hetloh uh bang lo in ka tun zawh ua kipan meeltheih khempeuh mah in hong pii-bawl in an hong neekpih tangtang tek uh a, ka tun zawh uh khakhat sungin Tulsa a ansai omteng ka phaklohna uh a om kei hi. Mikang, Sen, Mexican, Indian, Thai, Korea, Vietnam leh mikangte ansai zong Cowboy te duh diakdiakna country food cih dan sai a tuamtuam om aa tua teng mah ka pha kim uhhi.
Sa vive baalneek a kine takpi mah hi a, ammtaamm lua kha in gilvah takin ka neek leh gilvah lua in naklah dekdek liangin ka om thei hi. An hong neekpihte khempeuh ka laibu dang sungah ciamteh na veng inh hi lai ah kong kihelsak nawn kei zaw hi. Ka tuncil uh a, a na omsa meeltheih khempeuh teng mah in an hong neekpih ahihi.
US ah zing-an (breakfast) sun-an (lunch) nitaak-an (dinner) ci in thumvei a tawm pen an kine hi a, mailam ka lai atna ah zong eimi pawl khatten breakfast pen kiallap an ci in ken tua kammal zang nawn lo in mikangte zat bangmahin zingan mahin kong zang pah ding hi. Amau kiangah zingan pen 7:00AM pan 10:00AM dong hi aa sun an pen 1-3PM gual vive in ne uhhi. Nitak an pen ane baihte in 6 PM hun in ne uh aa, tua lo ansai liante ah 6Pm – 9PM sung hi pian zaw mai hi.
Zing-an neekna a minthang penpen pen, International House of Pancake (IHOP) hi aa, khuakim veeng kim ah om kawikawi hi. Mac Donald leh Subway cih sai zong fast food kizuakna te lak ah a minthang penpen sai hi a, veeng khempeuh banah a manlang theithei a kihawl thei khualzinna mawtaw lam dungah (express highway) tengah a kulna mun munah omsak kawikawi hi.
Ka zin tunna uh ka nuphalpa apa Lianno (Pastor Richard Suan Za Lian) leh anu Man (Nu Vung Za Man)te inn pen Tulsa khua ii landmark khat ahi, Oral Robert University te’ CitiPlex Towers tawh kinai mahmahna ‘Walnut Creek’ veengsung ahihi. CitiPlex Towers pen gamla pipan kigalmuh thei ahih manin ciaptehna zong ol peuhmah hi.
Azom omlai…
Agelh: Awn Za Pau
Comment piaknop aomleh...