Amun tektek mahah om inteh ~ Dong Mung

Amun tektek mahah om inteh ~ Dong Mung

Zan khat mi khat in lam kiang mei taan’na nuai-ah a Mawtaw tawh zongin akipei keei mi khat in a muh ciangin a kiangah va pai a, “Bang hih buambuam na hia,” a va cih leh “Ka Mawtaw tawh a zong hiveng aw,” ci-in a dawng hi.

Tua mi in zong a zon pih hi. Nai khat sung bang a zon’ khit uh ciangin mulo uh ahih manin “Na Mawtaw tawh hitak a na mansak takpi mah maw,” ci-in a dot kik ciangin “Ka inn sung hikha ngel in teh….Ahih hangin ka inn mei mit aihcia, mei taan’na ah hong zong hi’ng,” ci-in a dawng hi. Tua ciangin “Na innsung a na mansak ahihleh na innsung ah zong mawk ve…Hitak ah na zon hang mu peuhmah kei ni cei,” ci-in genpih a, a paisan hi.

Lungngaih ding

I nuntakna ah khat veivei eima inn sung buainate i ven’sak nadingin a pualam peuh i va zonga, midangte peuh i va ko kha thei hi. A taktakin eima innsung buaina pen i inn sung mah ah i vengsak thei ding hi.

I mimal haksatna pen midangte kiang khawngah i va ko kha thei a, i haksatna hong veng dingin i lamen hi. Ei mimal haksatna pen ei mahmah in i vengsak thei bek ding hi.

I minam sung buaina le haksatnate minam dangte kiangah i va ko kha thei a, mundang gamdang ah i va zong kha thei hi. Ei minam sung buaina pen ei minam sung bek mah ah i vengsak thei ding hi.

I tawhtang i mansakna mun lian mah ah zong ni,,,tua hileh i mu baih ding hi.

I nuntakna ah i buaina, i haksatnate a hang kankhia in, a mun tektek mah ah i vensak ding kisam hi.

I buaina tuamtuamte a vengsak zo dingin Pasian in hihtheihna, thahatna, pilna, siamna, ciimna hong guan hi.

Lungdam
Dong Mung
December 12, 2018