US, Baltimore ah School Bus leh Commuter Bus kiphukha, mi 6 sipah

US, Baltimore ah School Bus leh Commuter Bus kiphukha, mi 6 sipah

US, Maryland State sung aom Baltimore khuaah sangnaupang apua School Bus khatleh Commuter Bus khat kiphukha ahih manin mi 6 sikhin cih Yahoo News pan kizasawn hi. Police te genkhiatna ah Bus tungah Bomb puakkham mahmah banghi ci’n ahuaisiatzia genkhia uhhi.

Baltimore Police te genkhiatna ah Tuesday ni zingsanglam in thupiang hi a, aki phutkhak laitak in School Bus tungah sangnaupang kuamah omlo cibilbel uhhi.

Yellow School Bus pen Eastbound lamzuan in atailaitak Ford Mustang khat phukha in, tuakhit ciangin agei aom khuamkhat phukha leuleu hi. Tuakhit ciangin MTA Bus khattawh ki vaitang phutkhak leuleu uh cihi.

Kumpi thunei Officials te genkhiatna ah School Bus ahawlpa pen aphual ah sipah cihi.

Tuaban ah MTA Bus tung ah atuang Passenger mi 5 zong aphual ah sipah uhhi. Akigawm in aphual ah mi 6 sipah hi. Tualo adang MTA Bus tungah atuang mi 8 zong liam uh a, tua aliamte amanlang in zato ah kipuaksuak pahhi.

School Bus tungah atuang adangkhat zong om a, sanginn ah naupangte dawnding in azui ahih. Amahzong zato kipuak cih kiza hi.

Baltimore police spokesperson khat ii genna ah School Bus pen apeitaalma cihbanglah kimulo, bangci bangin hih Accident piangthei hiam cih aki kancian laitak hi ci’n genkhia hi. Baltimore aom Zomi te aki helkhalo dingin lamen hang. ZD Sawltak #zomidaily