Ha Siavuan te’n bangsem hiam? ~ Dr. Kaipi

Ha Siavuan te’n bangsem hiam? ~ Dr. Kaipi

Ha Siavuan te nasep in kamsung, hani, ha, khaguh leh maiguh te damlohna telkan, natna apianloh na’ng dalkhol leh natna a piangkhin te a dam nading a bawl uh hi. Hih kamsung damlohna te hang in ih pumpi kungtung ah natna tampi na piangsak thei hi.

Ha Siavuan icih kua te hiam?

Ha Siavuan cihciang in kamsung damlohna te kantel, dalkhol leh natna te adam nading abawl thei specialist te ahi uh hi. Na Ha Siavuan pa/nu pen tan 10 science subject te ah mat tampi tawh a zo te bek thamloh in, college kum 6 tungsiah a kah ngiat te uh ahi uh hi. A buaih degree min uh pen B.D.S ( USA lamten D.D.S or D.M.D) hi. Na ha siavuan pa/nu pen naupang ha siavuan pediatric dentist ahih leh naungek suaktung pan kum 10 val kikal naupang te’ ha a special a en thei/ bawlsak thei te ahi uh hi. Naupang ha siavuan khat hihtheih na ding in a tuam vilvel in hoihtak a sinbeh uh kul hi. Adang ha specialist line te pen:

• 1. Endodontics ( Ha zungthat siam)
• 2. Oral and maxillofacial surgeon ( Kamsung, khaguh leh maiguh te operation a bawlsiam)
• 3. Orthodontics and dentofacial orthopedics ( Ha tangsak siam; ha le maiguh a etlawm ding a bawlsiam)
• 4. Periodontics ( Ha ni hoihlohna/natna te bawlsiam)
• 5. Prosthodontics ( Ha suan siam; ha ni guh sungah sik/ zavui phut in hasuan siam- implants)

Ha Siavuan te kiang va kilak zelding a thupi hiam?

Ha Siavuan te kiangah a hunhun in hoihtak na kilak zel man in na ha leh kamsung cidam bek thamlo in, na pumpi bup cidam nading zong hi pah hi. Ha hoihtak na etsak/puahsak ( Dental care) man in:

• 1. Na ha te lung nekding dal hi.
• 2. Ha ni natna te dal hi; tua hi kei leh na ha te le na hani guh te bei ding hi.
• 3. Na kamsung uih/namsiat ding dalkhol hi.
• 4. Na nuihmai hoihsak bek thamlo in, na lungkim in nang le nang kimuanna ( self-confidence) ong neisak hi.
• 5. Na ha te paaksak/kangsak sitset thei hi.
• 6. Na nuntaksung tawntung lungdam le cidam in na om theih nading in na ha te tosak/ khauhsak hi.

Na ha te hoih/ bangmah ci kei leh Ha Siavuan te kiangah kilak kul veve ding hiam?

Na ha te pen hoih kha thei lel mah ding hi. Ahi zong in nang muhkhakloh or phawkkhakloh a om gige khat na Ha Siavuan te kiangah hunlap in na kilak man in amau ong muhsak thei ding uh hi. Tuhun in ah Ha Siavuan ten na ha a hoih theithei in ong bawlsak thei ta uh hi.

Na ha a nin or a etlawm lo te hoihtak ong puahsiang sak in a kang sitset in ong bawlsak thei uh hi. Na ha heng a etlawm lo te zong a etlawm mahmah ding in ong phopsak thei uh hi. Na ha omlohna/tok na te a etlawm mahmah tawh ong behlap/suan sak thei uh hi. Tua ahih man in lungmuang takin nui hitiat thei ta hi teh!

Ha Siavuan hoih koici tel ding na hi hiam?

Ha Siavuan te kiang na pai ding ciang in kua kiangah pai leng hoih pen ding hiam cih na ngaihsut masak kul hi.

• 1. Appointment ongpiak dan nang ading in a lem hiam?
• 2. Na pai nading a mun nang ading in alem diam?
• 3. Amun leh a sung a siantho tuak hiam?
• 4. Ong thudot dan, ong vel dan leh ong hopih dan, a ciapteh dan kicing na sa hiam?
• 5. Na kamsung cidam nading, na ha cidam nading leh adang nang theihkhakloh a manpha atheih huai thutuam tuam ong gen thei hiam?
• 6. A sum bei zah ding hoihtak ong genkhol sitset thei hiam?
• 7. Na Ha Siavuan pa/nu pen Kawlgambup Hasiavuan kipawlna letmat ( Myanmar Dental License) a nei mah hiam?

Na ha te na lakkik hun a tun ma sungteng koici kepding na hiam?

1. Ni khat in nihvei (zing le nitak) ha nawtsiang hamtang in. Na leizong nawtsiang in la, na ha kikal a an/nin neng te zong khau ( dental floss) tawh lakhia zel in.

2. Na ha za sungah flouride dat a om mah hiam. Flouride pen ha ading ahoihpen/ a kisam pen ahi hi.

3. A khum tamnek kei in; na ha lungnek/heng sak ding hi. Za tep kei in, kuanza hai kei in, sahdah le khainii te muam kei in; na ha te ninsak/sansak ding, kam uihsak ding, hani te natna piangsak ding leh alauhuai penpen kamsung cancer natna zong piangsak ding hi.

4. Ha Siavuan te kiangah hun manman in ki lak zel in. Hi thei leh kha 6 ciang khatvei ta ki velsak zel zo lecin hoihpen hi.

Naupang te kum or kha bangzah pan kipan Ha Siavuan te kiangah lak/paipih ding?

American Naupang Hasiavuan kipawlna (AAPD) te gen ah naungek kha 6 pan kipan Ha Siavuan te kiang kilak thei-a, kumkhat a phak ma peuhmah in lak hamtang ding ahi hi. Hih hun sung in na Ha Siavuan te’n na naungek ha omsunsun/ tawmno te hoihtak in ong sit sak thei pah ding hi. Tua khitciang in kha 6 a cin sim in khatvei ta na Ha Siavuan te kiang pongman in lakkik zel in.

Banghun/ bang tanvei kihal ciang Ha Siavuan te kiang kilak ding?

Naupang pan kipan khangno, u ham dong in a vekpi in kha 6 ciang khat vei ta peuhmah Ha Siavuan te kiangah kilak hamtang ding hi. Ha ni natna nei te leh kamsung cancer nei thei ding upmawhna a om te pen kum khat in nih vei sang a tamzaw kilak kul hi. Na kilah kik hun ding pen na Ha Siavuan te in hoihtak ong gen thei ding uh hi. Dr. Kaipi (Special Dental Care)