South Korea President’ lawmnu koimah avakmang theiloding in kimanta

South Korea President’ lawmnu koimah avakmang theiloding in kimanta

Nov. 1, 2016: South Korea President Park Guen-hye’ neu cil pan-a lawm (old friend) leh kum 40 val a lawmhoih mahmah ahi Choi Soon-sil in gamvai tawh kisai (state affairs) ah kigolh in, zuau leh khemna zangin dik lo tak-a sum ngah (fraud) hi ci-in ngawhna tuak a, mipi lungkim lo ten lungphona nei in, President Park a kitawpna ding ngetna nei ziahziah uh hi.

Zanhal in Choi a omna/zinna Germany panin hong ciah kik a, manlang takin koimah ah vak mang lo dingin kikem (emergency detention) a, thusitna naikal tampi kinei hi. Upadi banga nasemmi (prosecutors) ten Choi pen dam lo a, tua banah vanleng man ziau in a len’khiat mang ding lauhuai (flight risk) thei hi ci-in thu bawl uh ahih manin kiman taktak nai lo suak hi.

Prosecuters pawl khatin bel in Choi pen naikal 48 sung tak koihmah a vak mang lo dingin kep dingin kikoih ahih manin tua hun sungin thuman lah theihna ding teci (evidence) tampi susia/nul mang man/thei kha ding hi ci-in Yonhap news agencyte kiangah gen hi. A beisa hunin gam tuamtuam ah gen khol loin leng mang thei zel a, teenna kician (permanent address) hih gamah nei lo ahih a len’khiat mang ding lauhuai (flight risk) hi ci-in gen uh beh hi.

Zanhal in Germany panin Seoul khuapi ah Choi thusitna tuak dingin hong ciah kik lai takin journalist za tampi leh lungphona nei tampi ten na umcih uh a, lungphona nei ten manlang tak-a mat a, gilbeem ah khum ding hi ci-in ha gawi liangin na ot khum ngeingai uh hi. Choi in lukhu khu in puanvom silh a, lungphona neite leh journalist ten umcih uh ahih manin district prosecutor’ zum ah a zuatna lampi ah a lukhu, a sunglass leh a khedap lang khat mangsak hi. Choi in, “Mawhna lianpi (deadly sin) bawl kha ka hih manin hong maisak un,” ci-in district prosecutor zum inn sungah gen hi ci-in Yonhap news in suaksak hi.

Choi in President Park tawh a kilawmtatna zangin thathang hat thu tawh company tuamtuam tung panin sum $70 million val ama’ NGO adingin huhna ngen a, a sum ngahte ama’ mimail leh aituam phattuamna dingin tampi tak zang mang khin hi. President Park in President a let khit 2013 a kipanin President’ inn Blue House ah zong hawh mun mahmah hi ci-in Hankyoreh newspaper in tu ni-in a suaksak hangin hih thu president zum in nial hi.

Park in Nipi ni-in Presidential office leh cabinet ulian Choi tawh kizopna neite paai khia in, puahphatna leh laihphatna (reshuffles) a neih hangin ama’ party Saenuri Party nangawn in zong muan zo nawn loin party tampi kuamah tawh kizopna nei lo cabinet “neutral multi-party cabinet” kici phuan lecin gam kipumkhatna leh mipi muanna na ngah kik thei kha ding hi ci-in a gamtat dindan hilhna (advised) pia uh hi.

President Park tungah a zum a man loin zang hi cih ngawhna a om hangin S.Korea gamte’ upadi sungah president len lai ten thukham palsat hi ci-in ngawhna a tuak hangin thukhenna tuak thei lo ding hi cih tuang ahih manin thusitna panin pen thei (exempt) veve ding hi.
Source: Al Jazeera News And Agencies/ Thang Khan Lian