Upna kician neini
Zomi sungah ih kilem theihna dingin ih lungsim puak zia ih laih hun mahmah ta hi. Khat leh khat ih updan sandan kibang kimlo ahihmanin ih ki theih siam leh ih telsiam ding thupi kha in ka um hi. Pawlpi tuamtuam ih om banah, Laipian, Siangsawn cihbang ki om toto lai hi. Pawlpi khat’ (mi khat’) upna man ih sak kei leh mi khempeuh zak in ih gen khiat loh ding thupi hi. Tua ih genna tungtawnin kilemna ding sang’ kilem lohna lam hong omsak zaw ding hi.
Ih updan ih sandan kibanglo ahihman aa ih thu gen dan ih thu hilh dan kibanglo hi. Kha sang ih om hang a sanglo ki om hi. Tui kiphum na ngawn zong, atak tawh, dialsan nuai ah lut tawh, tuisung a kiphum ngiat tawh cih bangin ih zat dan kibang kimlo hi. Tui kiphum ciang aa phuisam na ngawn zong kibang lo lailai hi. Ei upna tek pen thupi kisa tek aa zong ahih mah ding hi ka ci lel hi. Ei upna midang ten hong up pih ding kilunggulh tekin ei updan ei sandan tek mah kigen pihin a umte ih pawlpi ah hong lut ahihi. Hih teng ngaihsun kik leng khialhna khat zong om kasa kei aa ahi ding mah ahihi.
Pawlpi khat leh khat kigen siatna, kielna, kilang neihnate ih neih leh Zomite ih kipum khat ngei kei ding hi. Kamsang/Kha nasem khat man/dik ih sak lohna mipi zakin ih gen ciang, a sang theite adingin a heh suak huai hong hizel hi. Pasian adingin kipia khia khat ih langpang loh ding pen ei Khristiante adingin hoih zaw dingin ka um hi. Na khempeuh Pasian theih loh aa a piang omlo hi cih ih phawk nak leh gensiat ding omlo hi.
Zomite long khat in ih paikhawp theihna dingin pawlpi khat leh khat kigen siat loh limlim ding thupi mahmah hi. Ei upna pawlpi tek ah kip takin om ding hanciam tek ni. Ih upna len suannokipni, upna kician nei ni. Pawl taitai kei ni. Ih upna aman takpi hiam ci’n sittel ni. Tua pen ih kha ading ahihi. Leitung ih nuntak sungin zong upna kician nei aa a kip ngiungeu te mah lawh cing zaw hi. Zomi sungah hong kipum khat sak lote pen upna kician nei loteng khawng hilel hi. Chin ah a buaibuaite khawng zong en leng upna kician nei mellote hilel hi. A zawng aa ahau phial zongin Zomi a citintente mahin itna man nei thei zaw hi. A minam ama innkuan sung it theilo khatin minam dangte tawh a kipawl hang bang thu suakzo tuanlo ding hi. Ei Zomite ih ki ngaihsut phat dingin hong kipum khat saklo aa hong nawng kai sak dente upna kician neilote ahihi. Thu dangdang ih gengen sangin Zomi sungah upna kician neilote upna kician hong neih theihna dingin ih pawlpi, ih beh, ih khua tek ah han ciam zaw leng Zomi bup ih kipum khat thei zaw tam cih ka ngaihsutna leh ka lunggulhna hong gelh khia ka hihi.
Zomi ka hi hi.
Suanno
Malaysia
HP:017-6402338
http://semkhawm.blogspot.com/
Nothing is impossible
Comment piaknop aomleh...