“University of Nottingham Malaysia” ah Refugee te sang kikahthei
Malaysia gamsung aom Refugees leh Asylum Seekers lakpan in sangkahnuam aomleh “University of Nottingham Malaysia Campus” ah “Foundation Taster Courses Programme” kikahtheiding cih UNHCR Education Unit pan kizasawn hi.
“University of Nottingham Malaysia Campus” kici sangpen England gam aom “University of Nottingham” tawh akizom hi a, International University in akiciamteh sangminthang sangthupi khat ahihi.
Hih University pen Malaysia, Selangor State, Semenyih, Hulu Langat District sungah 2000 kumpek panin akipankhia uh ahihi. Malaysian Ministry of Higher Education inzong sanghoih sangkician khatin “Excellent” Rank apiak uh ahihi.
“Foundation Taster Courses Programme” alunglutte “April Intake 2017” aki hongding hita hi. Hih Program ah UNHCR pan ciaptehna Card atawi Refugees leh Asylum Seekers te honghuh hong panpihna in 100% Scholarship hongpiading uh ahihi. Alunglut tepen kum 17 pan 30 kikal hiding a, gamthumna alengkuan te kisanglo dinghi.
100% Scholarship cihhangin sangsaap “School Fee” lobuang adangdangte eileh ei kisik kulding hi. Gentehna: Neklehdawn, Innsaap, vaksuk vaktohna Transportation Fee leh sanglaibu leina cihte eileh ei piakkulding hi. Full Time ahih keileh Part Time in sangkah ngekngek kulding ahih manin, hih sangkahsung nasemlo hileng kalemtheidiam cihzong ngaihsut masakding kisam hi.
Alunglut taktak leh akahsuakzo taktakding te’n UNHCR Education Unit te kiangah anunungpen 17 February 2017 lapin Application Email tawh kikhakthei hi. Khaknading Email: mlsluedu@unhcr.org
Email khatsungah Application Form, Statement, Scanned copies of Certificates cihte khakkhawm kulding a, akahtheiding in ateelkhiat te uh hong zasakkikding uhhi. Akicianzaw in natheihcian behnopleh UNHCR Education Unit leh nakipawlna Community zumte ahzong kidongthei dinghi. ZD Sawltak #zomidaily
Comment piaknop aomleh...