United Airlines te’n Passenger khat taalkaih khiatgawp ahih manin mipi so ngeingai

United Airlines te’n Passenger khat taalkaih khiatgawp ahih manin mipi so ngeingai

US gamsung ah United Airlines te’n Passenger khat vanleng sungah atukhinsa, Overbook ci’n taalkaih khiatsakgawp uh ahih manin Social Media tungah mipi te phunpah ngeingai uhhi.

Security Officers 3 takin pasal akum tamsimkhin khat atutna panin kaikhia in, apamlam aom tutna ii akhutngakna tawh anak kitatkha sawnsawn ahih manin sisan naisan tawh kidim zihziah hi. Tuabang pipi mahin vanlengsungah taal kaihkhiatgawp uh a, tuapen Passengers adangte’n Video Record nabawlkha ahih manin, Social Media tungah aki thehthangpah ziahziah ahihi.

Tua vanleng pen United Flight 3411 hi a, Sunday ni in Chicago O’Hare International Airport panin Louisville, Kentucky zuanding in alengkhiading akithawi ahihi.

Tua aki kaikhiapa pen Asian mi hileh kilawm sawnsawn a, akampan siluanggawp in, amit limlangh zong sawileilai a, apuan agil kidawk gawpliangin kikaikhia mawk hi.

Amawkna in atuanglah hisamlo a, sumpiakhin gigu, Passenger khatpen hihbangin abawlgawp uhpen United Airlines te kimawhsak mahmah hi.

United Chief Executive Officer Oscar Munoz in hihvaitawh kisai in anasem te tungah lai khahkhia a, khial kisalo uh cisawnsawn hi.

Hihvai ah akihel Security Officer thumlakpan khatpa zong agamtatzia dik kisalo ahih manin, anasep panin ki tawlngasak phot cih Chicago Department of Aviation te’n genkhia uhhi.

U.S. Department of Transportation (DOT) te’nzong hihvai tawh kisai in United Airlines te’n Overbook Rules zuihiam, zuilohiam cih sitcianna neiding, Passengers tetawh bangci bangin vaihawmding cih Guidelines tetawh sitcianna neiding cihi.

Video etnopleh: United Airlines Passenger Forcibly Removed on Overbooked Flight

DOT Spokesperson khat ii genna ah Airlines te’n Oversold Flight aom ciangin azuiloding in Volunteers aki piakhiading ngettheih hi a, ahi zongin tuabang aomloh nadingin avaihawmding pen Airline’s te mawhpuak, Responsibility ahihi ci’n genkhia hi.

Hihvai pen tulaitak “sparked outrage” acih mahbangin Social Media tungah asosan laitak hi a, bangci bangin United Airlines te’n hong lemtuahdiam lunglut huai hi.

More: United Airlines te’n Leggings pheituam tawh zuihding phallo ahih manin kiphun ngeingai

Nungdiak mahmah inzong United Airlines te’n Leggings pheituam tawh zuihding phallo ahih manin kiphun ngeingai in, buaina lianpi piangngei khinhi. ZD Sawltak #zomidaily