Zolai Sin Tawlnga Kei Ni ~ Hau Za Cin

Zolai Sin Tawlnga Kei Ni ~ Hau Za Cin

Zomi te mah bangin leitung mi khempeuh in amau van leh nate it in kem nuam uh hi. Pau leh Lai bek hilo Ngeina zong limtak kemcing nuam uh hi. Kem nuam bek hilo in puah in zuun in zemzem nuam uh a, nungak limlang maia ding mah bangin zutzut puahpuah leng hoih deuhdeuh in siang deuhdeuh hi. Puah in zun in zang kei leng a beibei hi a, zangzang leng a kikemcing hipah hi. A kizanglo van leh nate a valval, a kinusiasia ahi hi. Tua ahih manin Zomi aw, Zomi na hihna a kip ding, a kho ding, a to ding na deih leh Zolai, Zopau, Zongeina na zatzat ding, na puahpuah ding, na zunzun ding hi. I vek in i sepkhop diamdiam kisam hi.

Pawlkhat in a thu in gensiam in, pawlkhat in a la in sa siamin, pawlkhat in a kam in genkhia siam in pawlkhat in a vang a awng hu siam hi. Pawlkhat in a khanna ding ngaihsun siama, pawlkhat in a behlapna ding thei a, pawlkhat in a kicinglote kicingsak siam a, pawlkhat in a kicingsakte pahtawi siam hi. Zomi sungah tua bang mi ki om kim hi. Thugensiam om a, la sa siam phuaksiam om a, laigelh tawh mapang om a, a kem a cingte thapia om a, a pahtawi huaite a pahtawi om in sum leh pai leh kam leh tha tawh a tawsawn zong i om diudeu hi. Nakpi takin lungdamhuai a, Zolai Zopau a khanna hi a, a kizelhna’ng a kizun nang ahi hi.

Sanginn ah kisin pahlo na mun pawlkhat a om ahih manin a kisinlo pau pen a kitheih hangin a kitheihzia, a kizatzia, a kizunzia kibang theilo a, a mal gawm mahmah zong kibanglo pah hi. Neutung pan a sin leh khangham zawh ciang a sinte a theihna kibanglo a, a telna uh kikimlo hi. Khantawn a siam mahmah ding na leh van khat peuhpeuh neulai pan kisin pah a ngeina hi. Zolai zong tua a kisam hi. Computer cih a min i zak mialmial na gam pan a kizatna mun i tun cianga computer mai ah tu ponga ut teng malsuk, gualsuk gawp tawh a bul, a teeng pana sinte theihna kibanglo hi. Ei tel theih ahih leh i neu lai mah pan kipantah leng a hoihpen ding ahi hi.

Zomi te tenna khua leh gam a kibatloh manin i thuzak leh i duh i deih kilamdang semsem a, Zolai Zopau a kisapna leh a kizatna kidang hiaihiai hi. Mun pawlkhat ah Zomi hi in cih zong a kigen ding a kul luatlohna gam leh khua om thei mawkmawk ding hi. Tua bang munte ah Zokam leh Zolai pen nakpi takin kisin ngakngak ding cih uphuai lo pah hi. Ahi zongin mikim Zomi sisan i paai laiteng in Zomi ihihna a lakkhia pau leh ham, lai leh ngeina te i theih, i tel ding a kisam ahi hi.

A phungcingsa na khat peuhpeuh a muh nuama, a zat cingin a vang zong om hi. Ahi zongin tua bang dinmun ciang a tunna dingin hun khat lai pek pan mi tampi in tha leh ngal sum leh pai ngaihsutna tampi na bei uh a, sepna bawlna, supna baina tampi na thuak uh hi. A kuhkal tintente hanciamna tawh ‘phungcingna’ ‘matutna’ ‘gualzawhna’ a kingah bek ahi hi. I Zolai leh Zokam Zongeina leh Zomi leh Zogam in zong tua bangte a kisam ngitnget ahi hi. Tua a kisam a sem ding nang leh kei i hi a, i mapan theihna lam ciat ah i pan ding ahi hi. Lengtong Pauno in, “Zogam hong paal ding” cih la Lenmual dawn pan puak zuazua a hong sak bek tawh Zogam hong paal lo dinga, nang leh kei in tua aw za a kal i suana, ma i pan ciang hong piang pan ding hi.

I tel mahmahloh thu leh la kizang theilo a, i theih mahmahloh na khatpeuh kipakta theilo hi. Zomi te zong Zomi thu i theih mahmah kei leh Zomi te kipakta theilo dinga, Zolai leh Zokam kipakta theilo ding hi. Zongeina na theih mahmah ciangin na pakta thei pan dinga, Zolai, Zokam na tel mahmah ciang na pakta thei pan ding hi.

Zomi sang namdang paktat zawk, thupi muh zawk na neih leh na hihna Zomi sangin tua minamte a telzaw na hi cihna hi a, nang leh nang kitellopi in midang a kinzawpa/nu na hi cihna hi. Tua minamte in nang hong leh-et ciangin ‘bangci’n’ hong mu in na um a? Nang leh nang kitel mahmah phot inla, tua ciangin midang zong theihsawm, telsawm in. Nang leh nang kitel masalo a Zomi sang midang khat peuh na paktat mawk pong leh nang leh nang a kimu cianlo, a kithei hetlo, a kitel hetlo na hihmanin – limlang lianpi, golpi mai ah na din kul ding cihna hi.

Tua na din khit ciang nang leh nang kimu a midangte Zomi te mah bang madawkna a neih uh om na muh leh nang zong ‘eheh, kei dinna hihsan, amau dinna hihsan’ ciin na telpah ding hi. Mi na makhelhna tampi na mu dinga, mi na delh pian a kisapna zong om kha thei ding hi. Ahi zongin Zomi te in leitungah hanciam peuh leng i phaklah ding omlo, i sep lah ding omlo, i phaklah ding omlo hi. Gam khau khat tawh Humpinelkai, Vompi, Ngaltang a khihzual theite adingin i hihlah ding omlo a, a van leh nate a kicingin i nei naikei cihna bek ahi hi. Tua van leh nate a nei masa te kiang pan va sin, va la, va leia zat ding hilel a, a haksa hilo hi. I tenna gam leh thu leh la in hong pattahlo ahih manin mite a delh phot ihi a, ei zong leitung mite vanzat teng i khut ah i tawi tak ciangin i phaklah ding khatzong a om in ka mu kei hi.

Tua ahih manin sanggamte aw, nang kua, koi pan piang, koi lam zuan, kua tawh kiton nuam, minam khat na hihna mite in hong zahtak ding ut na hih leh na minam hihna na tel mahmah kul hi. Na minam min na theih kul masa hi. Na minam kuate hiam cih na tel kul hi. Na minam tawh kisai khempeuh – lai, pau, ngeina, biakna, khuasung kivaipuakzia, numei pasal kizopna na theih kul hi. Nupa kitendan (kikhendan), nungak tangval kikholhdan, biakna paaina kibawl dan cihte zong theih kul hi. Upa dinmun, numei dinmun, naupang dinmun, khangno dinmun na theih kul hi.

Nang leh nang kitel mahmah phot inla, tua ciang midangte thu zong tel mahmah ‘sawm’ in. Nang kitel mahmah ding, midangte zong tel mahmah ‘sawm’ ding. A kilehbulh leh a kisam khat om cihna hithei hi.

Tua khempeuh a pianna dingin Zomi khempeuh adingin Zolai sin kul a, Zopau siam kul a, Zongeina theih kul hi. Pau dang, ham dang na theihte pilna hi a, Zolai Zopau na theihloh pen pilna kicing nailo cihna hi. Khangham upa nangawn Zolai Zopau kisin tangtang om a, khangno lai naupang ciauciau nangawn Zolai Zopau a sin ut mello om hi. Nu leh pa leh khuasung nu leh pa, innkuan, khua leh tui in i telloh khat om hiding cih hong ngaihsun sak hi.

Zomi, Zogam a paalna dingin, Zomi te’n gual tungtuanna dingin Zolai, Zopau sin tawlnga kei ni. Hanciam peuh leng i seplah dingin omtuanlo hi. Vanleng zong lengsak thei hang. Mawtaw zong taisak thei hang. A hangsan a kihtakhuai Humpi, Vompi zong khawizual lel hang. Leitung ah Zomi khuak in a batloh omlo hi. Zolai sin tawlnga kei ni. Hau Za Cin