Uniform tawhkiteen’na mopawi ~ Lengtong Pauno

Uniform tawhkiteen’na mopawi ~ Lengtong Pauno

Nungak meelhoih khatpen, tangval khatin heel hi. Tamveipi itna ngaihna thu agen hangin, tuanungak in saangzolo hi. Ki teen’pih ding nangawnin kunkun a, nengcik khat zong awlmawhlo hi.

Ngaihsutloh kaalin hunle nile kumte na paipai ahih manin, tua nungak zong atheihloh kaalin akum na hoihkhop mahmahta hi. Ameel hoihna te’n zong, pak bangin vullam manawh hiaihiaita a, tangvalte’ ngaihna le iiplahnate zong kiam seemseem cih amahle amah kithei hi.

Amah zong 50% ki discount ding hong ngaihsunta ahih manin kiteen’pih dinga akunpa’ kua hiam cih akant leh, galkap bu bawkthum (captain) khat ahihlam hong theikhia hi.

Amah’n zong, aheel tuungpan a aitloh angaihloh khak akisiikna thu leh kiteen’ding ut mahmahta ahihna thu gelhin lai akhak hi.

Tangvalpa’n zong tua laikhak amuh ciangin, galkapbu kahihlam hongthei hiding aive maw… cihiatbek hi.

Amah zong nikhat, agalkapbu uniform akimin silhin nidanga angailo nungaknu kiangah vahawh hi. Galkapbu bawkthum (captain) pa ahawh ciangin, tua nungak nidang bang vetlo kamsiamlua, limbawl phalua kisa, zawhngeu muinam duh mahmah bangin tangval pa tungah kitaattaat liang hi. Aki teen’ niding, amo pawi bawl niding zong, tuani in, kiciansak pah uh hi.

Aki teen’ niding uh hong tungta a, nitak nai 3pm a kiteen’na hun kipanding pen, nai 2 le alang satta, tangvalpa meel kimu nailo mawk hi. Nungaknu bel mopuan tawh make up tawh nasia mahmah a, dawite’ sikha suun zawzenliang hi.

Hun kipat nading minit 5 in a saplian laitakin zineiding mopa’ sawltakkhat hong tung a, mopa ahi, galkapbupa uniform teng hong tawi in, mopa’ tutna ding tutna tung ah hong koih hi.

Zineiding mopa, galkapbupa in: ”Civil mimawkmawk banga ka heellai in, kiteen’ding ut peuhmahlo a, ka galkapbu uniform kasilh cianga, kiteen’ding athukimpan ahi hih nungak in, kei hong it hongngai hilo a, ka uniform ait angai ahih teh, tua ka uniform teng tawh naki teeng hen” ci in hong vaikha hi, aci hi.

Ka lungdam, Munkhai’pa

KA SINLUNGSUAK THU KHAT

Pasian lama ahat veva kahihloh hangin, Pasianlo tawh bangmah akiploh, akholoh, ataangtun’loh lam theihcihtak leh sinzatam in katel hi.

Tua hi a, tulai khangthak khangno mipil misiam, Gam le Nam makai dinga hong kipan te’n, nambat 1 na ah Pasian hong koih tangtangh un. Pasianmah Suutpi (foundation) in hong nei un.

Gamlenam makaiding khangno mipil micim mitei’ minavaak ka muhkhak khatin, Pasian thupisak masa sahetlo kahih manin, ka lungnuam theilo a, hong imkhiakhialkhakhong kai’ ve maw. Zomite hong a’ngvaan’den ka Pasian aw,hongseem ta in.

Ka lungdam, Munkhai’pa