Singapore gamsung ah IS tetawh akizom numeikhat leh pasalkhat kiman

Singapore gamsung ah IS tetawh akizom numeikhat leh pasalkhat kiman

Singapore gamsung ah buaina abawlsawm migilo Terrorist tetawh akizom mi 2 kiman hi ci’n Ministry of Home Affairs (MHA) te’n tuni Thursday (September 07) ni in genkhia uhhi. Tua akiman Singaporean gammi tepen numei khatleh pasal khat ahihi.

Singapore gamsung ah ngongtatsawmna vai hangin “Internal Security Act (ISA) for terror-related activities” tawh mat athuak uh ahihi. Tua akimante pen kum 23 aphakhin Shakirah Begam Abdul Wahab kici numeikhat leh kum 34 aphakhin Imran Kassim kici pasalkhat ahi uhhi.

Ministry of Home Affairs te’n tuni News Release abawlna ah Imran Kassim kicipa pen Singapore gamsung aom Logistics Company khatah Managing Director aseplaitak cihi. Ahi zongin IS te’ Propaganda in nathuzawh in, nalunglut khamawk hi.

Tuapa ii sepsawm pen IS migilo tetawh kipawl in Singapore gamsung Singapore Armed Forces (SAF) Personnel te doding cih ahihi. Tuaban ah Hostage in matzawh aomleh kemcip in, Singapore kumpi tungah sum tampi tawh kitansakding, tua sumte pen IS te kisapnana ah zekding cih himawk hi.

Hihpa pen abeisa hunsungahzong Syria gamsung aom IS galkap tetawh kikhawl kithuahding, IS galkap tumding in nihveibang aki thawingei cihi.

Abeisa 2014 February khasung in anasepna Logistics Company panin nasepvai tawh Syria gamsung ah ki zinsak hi. Refugee Camp sung aom te huhna apuakding, Humanitarian Aid ahawmding in apai uh hi a, tuahunsung inzong khatvei IS tetawh kizopsawm himahleh lemsak zolo hi.

2015 March khasung inzong IS makai tetawh kizom in, Syria gamsung ah bangci luttheihding ci’n lampi azon kawikawi hangin, lemlo leuleu hi. Tuabang kawmkal ah Social Media tungtawn in Accounts tuamtuam bawlkawikawi a, IS te gamtatna te panpih mahmah hi.

Alawm agual tezong IS thu bekbek genpih in, alunglut theihtheih nadingin zolzol hi. Tuabang in IS te ahoihmuhnalam bekbek agengen, azolzol ciangin alawm te’n Singapore kumpi thunei te tungah Report nabawl uh a, tuapan in aki mankhia ahihi.

Related: Migilo te’n Rocket thaupi tawh Singapore kapsawm

Kum 23 bek aphapan akhatzaw numei Shakirah Begam Abdul Wahab pen ahihleh Syria gamsung aom IS galkap tetawh Online Social Media tungtawn in kinakzop mahmah cihi. Amahpen Singapore gamsung ah Administrative Assistant nasep asemkhat hi a, IS galkap te’n alunglut uhciangin tuatengzong nuam asamahmahkhat cimawk hi. Sawltak #zomidaily