UNHCR cidamna lamte leh kipawlna makaite tawh lungsimlam damlo te vai Meeting ki neithei

UNHCR cidamna lamte leh kipawlna makaite tawh lungsimlam damlo te vai Meeting ki neithei

Community kipawl na makai, Pawlpi makaite leh UNHCR pan-in Cidamna lam Ulian te tawh “Lungsim Cidamlo” (Mental Health Issue) vai tawh kisai in meeting kimuh khopna kamkupna nuamtak in tuni 15 July 2021 (Thursday) ni sun nai 2:00 PM in kinei thei hi.

Hih meeting neih na abul pipen in, khuahun siatluat na hang in lungsim lam tawh kisai damloh na buaina gambel mite leh ih om na gam mi-pi te tung mahmah ah abeisa sangin hong ki behlap zawkna hang ahihi.

Gambel mite bek hilo in, tuni ciangciang in, gammite sung mahmah ah zong abeisa sangin kibehlapzaw bek hi lo in, lamet bei-in amau leh amau kisihbawl guiawk zong hong tam mahmah ahih manin hibang khuahun hang in UNHCR Zumpi panin gambel mite sungah pawlpi siate a kipan in minam kipawlna Community maikaite in limtak I mi te I kepcing theihna ding in hih lungsim cidamlohna tawh kaisai thute teltak I theih tek ding leh bangci bangin panla in midang a thanemte kemthei ding I hi hiam cih kihawmsawn theih na ding lunggulhna lianpi tawh hibang kamkupna kinei ahihna thu hong pulak masa uh hi.

Hih meeting hun sungah UNHCR pan Cidamna lam tawh kisai alian pen Dr. Susheela in meeting hong makaih in, Penang panin Médecins Sans Frontières (MSF) Doctors without Border zong akici minam deidan lo in itna veina tak tawh mipite a ding na hong sepsak kipawl na pan in Mss,Sarah in lungsim cidamlo te kisapna, bangci kep ding, bangci bangin amau te huh in ki thuahpih thei ding I hi hiam cih a huampi in hong kuppih hi.

Lungsim cidamlo ih cihte pen nam nih in kikhen hi:

Siatna bangmah ngaihsunlo in om hithiat uh a, midang tawh kikholh sawmlo in amau kiabek tangtat in om uh hi.

Khenkhatte leuleu ciangin asia lam bekbek ngaih sunsun in, amau leh amau ki ngaihsun khial in nuntakna cimtak uh a, hehna thangpaihna tamsak in, kisihbawl nuam leh amau pumpi tungah sisan naisan tawh ki bawlsiat a sawm den zong om hi cih thu a genkawm mah in, hibang mite pen a manlang thei penin zato Clinic, ahih kei leh Zatopi ah amanlang thei pen in puakpah ding kisam ahih nathu hong limgen mahmah hi.

Hih a tunga thunihte tawh kisai kikupna sungah a kihel teng ahi thei bang in kilimkup kik mahmah in, Pawlpi Makaite a kipan Community Kipawlna makaite lampan in huhtheih panpih theihna ding haksat na leh alem loh nate a ki gen takteh, Sanggamnu Mss,Sarah leh Dr. Sushella te tung panin sep leh bawl kalsuan zia ding kicing tak in hong gen baan ah Community makai te leh Pawlpi Sia te tung ah Contact leh mun tuamtuamte ah paitheih na ding hongpia uh in, tuamun te ei tawh ki naizawk na mun te ah amanlang in Ih puak theihna ding hong limgen uh hi.

A diakdiak in hih a tunga thu 1na leh 2na a kikup sung mahin, a kilunghimawh pen ahih leh gambelmi UN card ngah nailote leh bangmah tawi anei lote ki lunghih mawh ahih manin, a zenzen in UN neilote khatpeuh in hi bang hamsatna tuak in hi leh bangci banin UN lampan ong vaihawmsak ding na hi-uh hiam cihthute kidong pahhi.

Hih thu-nihte tawh kisai in, Kumpi zato ah Emergency in na lutpih uh ahi zongin clinic khatpeuh ah a damlo pa/nu kivelcian sak na ding in na paipih ahi zongin a paizia ding pen kilamdanglua lohi a, a ngeina bangin ama’ lungsim puakzia leh cidamna etcian na kinei masa ding hi, tua hun sungin tua acina nu/pa vai tawh kisai doctor memo leh akisam lai khempeuh UN ah ong puak in, UN pan in Cidamna lam tawh kisaite in a kisam bangbang in kivaan sak ding aa, ki ngaihsutpih ding ahih lam zong ki ciantak in hong gen phapha uhhi.

Tua baan ah UNHCR cidamna lam Ulian te tung ah, tulai natdalna kisutna vai tawh kisai mipite haksatna leh mi pawlkhat te thuman kician, theihna zaakna manlo atamna hangin zatui kisun nuamlo in, a lunghimawh leh lungkia lametbei in a omna uh thu zong palaite lampan in dotna hong om takteh UNHCR Cidamna lam Ulian te leh MSF te tungpan-in hih anuai aabang in vaikhakna gencian na hong nei uhhi:

Malaysia gamsungah natna kiamlam sangin khangzaw ahih lam phawk tek ni.

A khangham upa khinsa te sangin khangno a si tamzaw ta hi cih phawk ni.

Leitung buppi milip seh-li suah seh Khat bang hih natna dalna zatui te kisun khinta hi cih phawk tek ni.

Covid-19 natna dalna zatui a kisun khempeuh in natna ngah nawn lo, silo cih na hipah lo in, ahi zongin tua zatui kisutna hangin natna lungno dalna ding a, kitangsam na pumpi tungah aom ahih manin natna dona thahatsak in nuamtuam zawthamtham hi cih phawk in.

Natna dalna zatui kisunlo a na om sangin na kisut limlim hoihzaw hi cih phawk in.

More: UNHCR leh Community kipawlna makaite Meeting

Hih a tunga thute hun sawtpi sung genkhawpna leh kamkupna a kineih khit ciang in, UNHCR pan Dr. Susheela in thukhupna hong nei in, Tuni Meeting nuam tak ki zawh bawl hi. ZAM iNFO