Muh ciil Melbourne – 4 ~ Hau Za Cin

Muh ciil Melbourne – 4

…BBQ bawl khit ciang Zomite car hoihnono teng kizui deetdaat in inn lam zuan in ka ciah uh hi. Mikang gam ah a nuam mahmah, amau zong a minthangsak mahmah uh khat pen BBQ hiden a, lawm leh gual, innkuan sanggam kimuhkhopna hun peuh ah deihsakte tawh annek khopna pen BBQ hisak nuam pha deuh uh hi. Koh zong Zogam Thak Australia a tung Zomite tawh BBQ a pai ka hi uh hi. A zindo (host) pen a nek ding a vanteng hong lei ka inntekte hi uh a, a em, a bawl khempeuh mipi in a hihkhin pah hi. Zogam Thak Australia a nopna a ciamkha ka hita uh a, taam suak bang ki ut mawk hi.

Gilvah phitphet a innlam zuan in lampi ah Upa Tun Khan Pau inn ah ka bang uh hi. Nitak nai 7 sat ding hita a, ahi zongin tung sunni tum sawm nai mahmahlo in Sakhi ni san zilzial in suak lai a, mualbo leh mualsanglo te sawi kaap hihiai in mual leh guamte etlawm mahmah hi. Sakhi nitak lam annzong ding hong vak hialhial leh kilawm cih bangin ka khuadakdak uh hi. Innsung ka lut uh leh ‘white house’ a cih bang un a sung khempeuh siangtho sitset in zakang kinuh sitset a, khe tawh sik dingin pammaih hiphial leh kilawm hi. Inn dawlnih hi a, a tung ah innpi, a nuai ah lengla khan nih leh annbuk khat om hi. Gam khangto ah mihaute inn, mi nuamsate inn te pawl hi a, inntekpa in, “Topa thupha hi”, a cih in gen khin kasa hi. A mai ah amau mawtaw nih kikoih a, a pang ah huan, a kong mai teng ah paak kisuan dimdiam in hing dipdep a, tenna inn nuam mahmah hi cih i muh bek in zong kitel pah hi. Pa Pau te innkuan etteh huai mahmah a, a tate in laisim hahkat in mikangte lak ah zong a maizum huai hetlo dingin pilna sangkah in degree nei ciat pah ding uh hi. Mi gam ah i om in, eima Zogam ah i om zongin hih banga pilna sinna i hahkat a, nasep i hahkat ding pen leitung ah hamphatna lianpi khat hi ciin ka ngaihsun hi.

November 12, 2012 Monday ni pen khualzinna kigim pian ahih manin koimah vaklo in inn ah ka om uh a, Bawngsa khai 4 (4 Kg) ka em sitset uh a, sun ann leh nitak ann in mi li in ka ne uh hi! Australia Bawngsa pen a minthang ahih manin duhkhop nek ding ka lunggulh gige hi a, tuni in kidam hetlo in a em sitset duh zahzah nek ding hong vaihawmsak uh ahih manin hampha ka kisa hi. “Bal nek” a cih bang un a bak ka deihdeih uh la in kisuanglah hetlo in ka ne ziahziah uh hi. Pai man om kasa a, nek man om kasa hi. Mundang, gamdangah hih banga sa em keu duh zahzah nek ding a baihlo hi a, Australia gam hauhna a kilatna, nek leh dawn a kiningcingna a kilatna hi. Mailam ah hih gam a tung dingte hampha ka sakhol hi.

November 13 ni in Singapore pan ka kitheihpihsa uh lawm Mungsen te innkuan in Melbourne khuapi sung hong vakpih in amau mawtaw tawh hong dawn in hong kha kik uh a, amau inn ah gilvah takin nektheih tuamtuam hong nekpih uh hi. A zi Nu Thangte in a tano uh Benjamin Khen Za Mung pua kawm in khuapi hoihna tuamtuam – RMIT University, Victoria Market, Casino, Melbourne Aquarium, Melbourne Visitor Centre leh luidung a mun hoihna teng hong vakpih a, “inn ah ann kong nekpih taang uh” ciin sun ann Chinese Buffet ah duh zahzah nek ding omna mun ah hong nekpih phitphet hi. A tapa Benjamin Khen Za Mung pen kha 7 a pha lian hi napi tei mahmah a, kap seselo, nuih a kisinsin laitak ahih manin a muh peuh nuihsan in it huai mahmah a, a tawi peuhpeuh ngai in gennop mahmah ahih manin koh hamphatna hi ka ci hi. Inn ka tun uh ciang amau inn nuam mahmah ah niangtui leh nek ding kicing tak nitak lam in ne leuleu in tua pan a innkuan un ka tunna vuah a Ford Car mawtaw uh tawh hong kha kik uh hi. Gam hausa leh gam khangto ah mite nuntakna bek a nuam hilo in Zomite nuntakna zong a nuam hi cih ka mu, ka ciamkha uh a, hampha kisa uh hi.

Gam khangto leh nuam a tung Zomi khempeuh hampha kong sa a, na nuntakzia uh a nuam mahmah hi cih kong muh ciangin nuam kasa hi. Khe tawh pai cih om nawnlo a, nomau car ciat tawh kitholh hialhial cih ciang ‘mi nuamsa’ lak ah kihel hilo hiam cihloh theihloh hi. Hamphatna te a mawkna in hong pai ahih ding ka um kei a, hamphatna ngahna dingin thuakna tampi om khin dingin ka um hi. Gimna tawlna om khollo in a gah khum kilo theilo hi. A gim a tawl hunlai in a haksat hang Topa in a nuam mahmah hun ah hong omsakta ahih manin Amah i mangngilh loh ding thupi mahmah ding cih khawng ka ngaihsun hi.

Inn gei a vasa hamte lah ging deuhdeuh, nitak a giakna mun uh a tung ahih manun amau zong lungdam lasa hi ding ciin kei zong nitak nitum khuazing ding hun ah tuibuk lut in ka kisil leuleu hi…

(zop lai ding)

Hau Za Cin
Phuitong Liim
www.hauzacin.blogspot.com