UN Thuthang: US Lahwahka kipankik tading, na tangthu kiging in

UN Thuthang: US Lahwahka kipankik tading, na tangthu kiging in

18 January 2018 ni in UNHCR ulian te leh Refugee Community tuamtuam panin makai te ki muhkhopna kinei hi.

USA paitheihnang lahwahka (DHS) Interview

February khasung in US Lahwahka (DHS) nasem Officer te Malaysia gamsung ah hongpaikik tading hi. Tua ahih manin, USA apaithei dingte DHS panin Interview asawtlo in hongki samkik tading hi.

Tua ahih manin OPE (RSC) Interview amankhin te, adiakdiak in abeisa kum 10 sung omna, nasepna cihte agenkhin te’n abeisa Interview hunlai in nagensa thute uh hoihtak ngaihsunkik in, akigingsa in omdetding thupi hi. Asawtlo in DHS Interview hongki samkikthei tading hi.

UNHCR zumpi panin Department khatpeuhpeuh in Interview dingin hongsapnak leh na tangthu te hoihtak ki gingkhollopi in paikha hetkei in. Alimlim in Card Renew dingbek nahiphial zongin UNHCR zumpi ah napainak leh na tangthu, Case te hoihtak atheisinsen dingin kigingden in.

OPE (RSC) vaitawh kisai

OPE vaitawh kisai in abeisa tawlkhatsung bangmah kisemlo ahih manin, OPE Interview akisamlo ahihi. Ahi zongin asawtlo in OPE Interview zong kizomkik, kisam kikthei tading hi. Tua ahih manin, RST amankhin peuhmah in OPE Interview hongki sapkhakding akigingsa in omdetding thupi hi.

Fraud Case tawh kisai

Min kitaih “Fraud Case” tawh kisai in mimal khatciat ii Case tungtawn in aki en hi a, asap nailohzong tampi omlai hi. Min kibang “Fraud Case” vaitawh a awkcip sungpan gamthumna aleng khinzong tampimah om ahih manin bangmah lungkiatluat nading omlo hi.

2013 UNHCR Card angahte lobuang, adang UNHCR panin Refugee ciaptehna taktak angahkhin tepen angei bangmah in semtoding uh ahih manin, lungkham nading omlo hi.

Kimat kihen tawh kisai

UNHCR laidal atawite sungpanin kimat kihen atuakte pen UNHCR in angei mahbangin suahkhiazel uhhi. UNCHR Card atawite, laidal atawi khempeuh in na nambat uh hoihtak in ciamteh tawntung un. Palik te’n hongmat ciangin na UN Card hong sitsakding uh a, na nambat hoihtak nagentheih keileh hong muangmawh khatheiding uhhi.

Kimat kihen natuahkhak zenzenleh hong kimatni leh hong kimatna amun cihte hoihtak ciamteh hamtang in. Tua hileh UNHCR zumpi ah Report kiciantak in kibawlthei dinga, UN Officer te’nzong hong kankhiatna uh baihtuam dinghi.

More: EU gamte’n Africa leh Middle East panin Refugee mi 50,000 laksawm

UNHCR Card aneipipi palik te’n sum hongngek khakleh UNHCR zumpi ah ki Report theihi. UN Card atawi akiman pawlkhatte pen UNHCR zumpi ah Report apiaksak kuamah aomloh hanginzong palik te’n UN zumpi zasak veve uh a, UN Officer temah in asuahtak nadingin aki buaipih veve ahihi.

Sumlepaai huhna

UNHCR in nidang bangdanin sumlepaai neilo, Fund neinawnlo ahih manin adangdang vaite ah sumtawh honghuhthei nawnloding uhhi. Sawltak #zomidaily Ref: Chin Express