UN huangsung OPE Department ah kamphen asem mi 7 ki khawlsak

UN huangsung OPE Department ah kamphen asem mi 7 ki khawlsak

Malaysia UNHCR huangsung aom OPE Department ah kamphen asem laitak mi 7 te nasep khawlsakna lai kipia cih kiza hi. Tua aki khawlsak kamphen mi 7 tepen Hakha mi 2, Falam mi 2 leh Tedim mi 3 kici hi.

Zanni in nasep khawlsakding vai theihsakna lai akipia uh hi a, asep nunungni ding uhpen May 26 nidong bek ahihi. May 26 nidong nasepdang azontheih nadingun ahun khanih (Two months Notice) akipia cihding ahihi.

Ihlawhdan nuam kisazaw leh dal nalsa ahih manin OPE Department akici ziauziau hi a, ataktak in hih OPE zong RSC ci’n kilaih khin hi. RSC pen Resettlement Support Center cihna hi a, US gamtawh akisai zawdiak teng adingin nasem Department khat ahihi.

IOM kici “International Organization for Migration” nuai ah OPE (RSC), DHS, Medical, Culture Orientation Class, Departure cihbang in adawldawl in omsak uh a, hih IOM nuai ah asemteng khempeuh US kumpi in khasum apiak uh ahihi.

US gamsung ah President dingin Donald Trump hongkahzawh akipan US gamsung ah Refugee alakzahding khiam bekthamlo, asumzatding Budget zong khiampah uhhi. Tuahangin hih IOM nuai ah asem kamphen tezong khawlsak nadingin Notice Letter akipia kici hi.

Tuaban ah Refugee Travel Ban ci’n abeisa March 16 ni akipan khali sungbang US gamsungah Refugee alutding pen ki khakcipmawk ahih manin, hih IOM Department nuai ah asem kamphen tezong nasepding omlo, Interview omlo ahih manin, nasemmi akikhiam kici hi.

Kamphen “Interpreter” te bekthamlo, UNHCR huamsung ah asem Malaysia gammi Officer te, Staff tezong ki khawlsakding cih kiza hi.

Khawlsakding Notice Letter akipia tepen Hakha, Tedim mi, Falam kamphen teng hi a, Rohingya kamphen te kihello cihi.

UNHCR huangsung ah kamphen mi 7 aki khawlsak banah tentan kahna CO Class ah naukem in asem zong mi 2 khawlsak uh cih kiza hi. Avekin aki khawlsakpen mi 9 phata kici hi.

Abeisa nungdiak in RSC ulian khatin kamphen nasem mi 10 khawlsakding cih tehkhia ngei kici a, tu’n mi 9 ki khawlsakding hita hi. Adang mikhat aki khawlsak behlaidiam cih ki theician nailo hi. Ref: Salai Cho Mana Thang

IOM Medical ah asem kamphen tezong mi 5 ki khawlsak cih Theihtlei News te’n gelhkhia uhhi. Tua mi 5 tepen UNHCR huangsuang aom IOM Medical ah asem mi 3 leh Tawakal Hospital aom IOM Medical ah asem mi 2 ci uhhi. ZD Sawltak #zomidaily