Maikum sung ka lam-etna ~ Pu Thangboi

Maikum sung ka lam-etna ~ Pu Thangboi

2021 kum i nitawp ni hong tungta hi. Tuni ciang ih muh khak pen Pasian’ thupha taktak ahi hi. Tukum kumbei amukhalo ih it ih ngaih tam mahmah a, amaute ih phawk zungzung hi

2021 Kum pen tangthu ah kum hoih in ki ciamteh in ka um hetkei hi. Leitungbup in Covid pulnatna kisikhop mahmah ban ah kawlgam ah ngongtatna hong pung semsem lai ahih man in kawlgam a om kawlgammi tading in kumsia mahmah khat ahi hi.

Mai 2022 kum kawlgam leh Zogam ading ka lam-etna

Mi kikhah leuleu ding

2021 kum abeikuan petmah ciang in misok te’n amimatte uh tampi tak thongkhia ziahziah ta uh ahih man un asawtlo in thongkia mi minthang honkhat khahta ding un ka um hi.

ASEAN tawh kizopna

Misokte leh ASEAN te akizopna uh leitung in a encik ahi hi. 2021 kum April 24 ni a misokte’ sep ding ASEAN thukimna nam 5 (5 points consensus of ASEAN) te misok te’n semkhia vetlo uh ahih man in ASEAN makaite’ kimuhna Summit te ah misokte kihel khalo pah uh hi.

Ahizong in 2022 kum ASEAN amakaih ding Cambodia leh misokte ki uitui mahmah uh hi. Misok gamdang vuanzipa bang Cambodia khat vei vahawh khin hi

January ni 7 ni Cambodian PM kawlgam Ong zin ding cilai uh hi. Ama’ hong zinma maw aciah khitdeuh maw khat zaw sangsang ah ASEAN thukimna nam 5 te sung pan ahih theih zah uh misok te’n hong sem ziahziah ding uh hi. Tua lak ah khat ahi Rohingya vai zong kihel a tuavai van ding in Daw Thet Thet Khaing bang Zakhai gam khat vei vapai khin hi

Piteknu leh U Win Myint te bel khah nai hetlo ding uh a, adang mi tampi bel khah khading uh hi.

2022 Kum March kha ASEAN makaite’ kimuhna ah misokbupa akah khading in ki lam en ahih man in tua lap in na tampi hong sem khading uh hi. February kha sung UN palai vai ki khentat tading cilai ahih man in January kha sung kinak pei mahmah ding uh hi

Zogam

Zogam ah, adiak in Tedim Tonzang Gam ah, thunei taktak om nawnlo hi. Thautawi pawl tampi hong ombeh lai ahih man in mipi ki genthei tektek ding dinmun ahi hi. Thunei taktak a om nawnlohna tawh kizui in guihtheih khamtheih kilei/kizuak/kizatna te hong khang hanhan hi

Tonzang gam bang ah tukum Zavom ciing te’n thuneite” tungah siah pia khalo uh ahih man un nuamsa mahmah uh a, maikum nak behlap sawm mahmah uh hi. Khua pawlkhat bang ah pastor te’n zavom sehsuah ngahta uh hi.

Khangno pawlkhat in Zavom hawmthawh ta uh a, zakang nangawn zangh ziahziah ta uh hi. “Zunek sang tawm bei zaw” cilai uh hi.

Guta buluh zong tam tektek a, palikte’ kiang’ va ap mah leng zong na khahkik pahpah uh hi. “Ko vakzo kei nung. A an ding uh om kei” cilai uh hi.

Misok Maban

“2022 kum February 12 Ni pen belpawl gam Diamond Jubillee hita a, 2023 kum January 4 Ni pen Suahtakna ngah zawh Diamond Jubillee hita hi” cih limgen mahmah uh ahih man un tua gel target in sepsawm mahmah pawlkhat nei le uh kilawm hi.

CNF lobuang mualmi minam thautawite tawh tuni ciangciang kiho thei lai uh hi. Kumbei kuan teh KNU tawh bel hong kinuai pian uh hi. Mualmi thautawi lak pan ahatpen ahi FPNCC tawh zong kihoho uh ahih man in 2022 kum February 12 ni lap in banglo khat vaihawm uh hileh kilawm hi.

2023 Kum August kha in kitelna bawl ding cih zong limgen mahmah uh hi. Amau’ genna ah 1952 Kum Lai in zong tualgal kawmkal ah AFPL in kitelna bawl veve a kumpi phuanzo veve ahih man in ko zong 2023 Kum teh kitelna kabawl veve ding uh a kumpi phuatzawhna ciang ding ka hanciam ding uh hi ci uh hi. Kitelna abawl zawh takpi uh leh bel leitung in tua result pom lel khathei mah ding hi

NUG maban

NUG galkap PDF te zong ong hat tektek uh hi. Kumpi khat suahtheihna ding in thuneihna leitang (Liberated area – LA) kisam hi. Tua ding in Chin state leh Sagaing gamke sung mun pawlkhat piang thei ding in lam-et huai pian hi

Sagaing gamke PDF makai khat ahi Bo Nagar in RFA Burmese tung agenna ah “Vanleng kapna 2 leh thau lawng 500 nei le ung Sagaing sung ah LA piangsak zo nung” ci hi

Vanleng kapna lei theihna ding in UN ah palai dinmun ngahna ding leh Gam Khat peuh in NUG pen kumpi khat in apom ding thupi masa in ka um hi. Talibante Dan in LA gol pipi neizo hileng bel thukhat hi.

District Vai

December 13 Ni in misokte’ meeting ah misokbupa in khazai (district) behlap ding vai gen hi. December 30 in meeting nei leuleu uh a tua lai ah thu tampi khentat uh ci ahih man un tualak ah district vai zong kihel khathei ding hi. 2022 Kum sung Tedim leh Tonzang kigawm in khazai khat hong pia khathei un ka um hi.

Thukhupna

Tuni ciangciang alangnih un kiho ding a utzaw sang om nailo mawk uh ahih man in mipi tading in vaisah mahmah lai hi.

Acihmawh madong uh kiho sawm kei mawk le uh mipi in thuak mahmah ding hi. Zomi thautawi pawl in zong athaumuk uh angatna ding lam ngasak zaw in mipi lam leh amau leh amau hong kingat sak loh ding uh lunggulh huai mahmah hi.

Bang bang aizong Pasian in sep theihloh nei hetlo ahih man in amah mah pom tinten peuh leng ei’ ading ahoih pen mah hong gelsak veve ding hi. Hong tung ding kumthak ah Pasian’ Maipha namu ngiat ta inla, nama kihong ngiat in naci nalu dam ngiat ta hen. Happy New Year To You All – Mung Laan Thang (Tonzang, Zogam)