U.S Government Partial Shutdown tawh kisai atheihhuai thu pawlkhat
US Federal Government te sumzat ding “Government Spending bill” pen kumkhat khat vei ta US Congress pan September kha bei ma in aki pass den hi aa, tukum in Congress sungah Democrats leh Republicans te kikal thukimna ngah zolo uh ahih manin Government Partial Shutdown ding vai hong gingkhia ahi hi. Congress in Appropriation bills te a pass zawh kei uh leh October 1 ni 12:01 am in Government partial shutdown hong kipan ding ahi hi.
Bang hang, bang ciang Government Partial Shutdown ding?
Atungah i gensa mah bangin Kumkhat sung US Federal Government Spending bills pen White House pan President in US Departments 15 te kumkhat sung zat ding “President’s budget proposal” pen ngetna bawl masa pen hi. Tua Budget proposal tawh kizui in House leh Senate ah kikupna leh behlapna, kipsaka te bawl uh aa Appropriations bills cih bawl uh hi. Tua bills pen House leh Senate ah vote tawh akikhensat zawh ciang President kiang kipuak kik aa President Sign thu na tawh bills kizang ahi hi.
House leh Senate ah bills te thukimna September kha 30 dong angah zawh kei uh leh Government Funding ding sum om nawnlo ahih manin Government Shutdown hong kipan ahi hi. Athukim zawh loh uh bills te lak ah Departments of Defense, Homeland Security, State leh Agriculture te ii zat ding fund tawh kisai te kihel aa, tua te lak ah Ukraine gam huhna piak ding leh Border wall bawl ding cih te zong kihel ahi hi.
Partial shutdown ah bang zum teng kikhak ding?
US Federal Kumpi ii Departments 15 lak pan non-essential departments teng kikhak ding hi. “Essential” federal workers ten kha sum sang lo (without pay) in nasem suak dinguh aa, tua lak ah air traffic controllers, national security agency leh Police cih te kihel uh ahi hi. Hih appropriation bills sungaa akihel lo Laito USPS leh Social Security cih te kikhak lo ding hi. “Reserve Fund” anei department pawlkhat (Gentehna – kei nasepna USPTO, Department of Commerce) ten amau reserve fund aom lai siah nasem suak suak ding uh hi.
Kua teng in thuak kha ding, su kha ding?
US gam mi khempeuh atawm atam kithuak kha ding ahi hi.
1. Amasa pen pen in US department tampi partial shutdown ding ahih manin 2 million federal workers (Kumpi nasem) te leh 1.3 million active-duty Galkap teng nasep them vei kikhawlsak ding ahi hi. Government Contract tawh asem contractor nasem million tampi nasem them vei khawl phot dinguh ahi hi.
2. Abeisa hun ah credit Rating agency ten US gam pen AAA rating pan AA+ ah khiam suk (downgrade) khin ta uh ahi hi. Hi vai hong piang leh gam ii credit rating zong kiam suk suk ding kipatau tek hi.
3. US economics hong sukha ding ahih manin company tampi zong zawm zo thei dingaa company nasem te tampi Lay-off thei kha ding uh ahi hi.
4. Department of Agriculture kikhak ding ahih manin tua pan akipia Food Stamp, WIC, SNAP, School Lunch cih te kipia nawnlo ding ahih manin mipi tampi buai thei dinguh ahi hi.
5. Vanleng tawh khual zin na (Air Travel) teng pawlkhat khawl kha thei ding hi. Ahang in Department of Transportation khut nuai aa aom Transportation Security Administration te nasep khawl dinguh ahih manin Airport ah Security leh checking asem ding om nawnlo phot ding ahi hi.
6. Passport zum khempeuh kikhak ding ahih manin tua hun sung teng passport kibawl thei lo ding hi.
7. Medicare leh Medicaid benefits teng khempeuh khawl ding ahih manin cidam na lam zong buai thei ding ahi hi.
8. Shutdown & U.S diplomacy: State department zum pawlkhat zong kikhak ding ahih manin leitung mun tuamtuam om U.S embassy teng zong nasep khawl dinguh ahi hi.
9. Shutdown & UN vai: UNHCR tungtawn aa US hong lut/leeng ding khempeuh shutdown hun sungin kikhawl phot ding ahi hi.
10. US gam sung om Parks and Recreation, Museums, National Zoo teng khempeuh kikhak ding ahi hi.
11. Tua bek thamlo naupang te apiak uh Children Head Start programs, College Student loans, Food and Drug Administration inspection, Federal Emergency Management Agency (FEMA) huhna cih te zong them vei khawl phot ding ahi hi.
Tuni ciang dong US government Partial Shutdown pen 21 vei om ngei khin aa, tua lak ah 2019 kum President Trump hun sungin ni 35 sung kikhak aa, US taangthu sungah asawt vei pen akikhak ahi hi. US Government partial shutdown in US gam sung om mi khempeuh atawm atam hong sukha ding ahih manin akua mapeuh in thu ngetna ah phot ciat ni. Thomas On Sian Mung (Thomas Mung Guite) Dept. Of Commerce (Washington D.C) September 28, 2023
Comment piaknop aomleh...