Pasian’ thu um Zomi hilo namaw?

Pasian’ thu um Zomi hilo namaw?

Nang le nang ki zahtak in! Pasian zahtak in!. Na Minam zahtak in!

Pasian’ thu-um, Pasian’ min tawh kilo Zomi hilo nahi hiam? Pasian’ thu-um genloh mi mawkmawk lak nangawn ah kuate, bangci bang mite, midangte in thupi sa a, zahtak uh ahi hiam? Tuabang a mite’ zahtak, mite’ thupi sak, midangte in a thupi ngaihsut ahih theihna ding in mi khatpeuh in a hanciam kul hi. A thuman kul hi. A cihtak kul hi.

Zuau peuh gengen, mi khemkhem, thadah zulhzuau, muan’ theih ding a omlo, citak lo, kuhkal lo, hanciamna leh tup le ngim cihbang nei mello… etc cihbang mite ki zahtak cihbang om ngeilo a, ki thupi ngaihsut cihbang om theilo hi.

Tua ahihman in Pasian’ thu um, Pasian’ min tawh kilo Zomi khat nahihna tawh… nang le nang limtak ki-en phapha inla… hihbang in ci in, nuntak pih in!

“Kei lawmlawm…
– midang lah hi peuhmah lo, kei himawk lo kahiam? Pasian’ thu um hilai, Zomi hilai…
– Banghang a thadah zulhzau a, zuau gen a vak palpal lawmlawm ding kahiam?
– Banghang a citak kuhkal lo a, banghang a hanciam loding, banghang a mite’ muantheih ding a omlo ding kahi hiam?
– kei himawk lo kahiam? Pasian’ thu um himawk lo kahiam? Zomi himawk lo kahiam?..” ci in!

“A min, A hihna, A vang” a gum, a hum tinten Minamte thupi asa Pasian in Ama’ min leh Ama’ piansak minam a khualna in nang ong tuamhum, ong tuamgup pah tinten ding hi.

Pasian’ min tawh kilo Zomi himawk lo nahi hiam!

(na lehtat leh bel kuama’ sawl, kuama’ nget, kuama’ khiatkhiat kullo in nakhempeuh a mu, a thei, a tel sitset Pasian in ong nuai pah lel ding hi. Khang thumna, khang lina dong.. cilai zen hi.) Pau Khat Suan