U pen numei tawh kisai

U pen numei tawh kisai

Innkuan sungah u pen numei icih pen a nihna ih nute ahih mah bang un naute adingin Pasian hong piak thupha ahi uhhi. Naute in amuan mahmah u pen numeite ahih mahbangin nute in zong amuan mahmah u pen numeite ahi uhhi.

Naute adingin kiniamkhiatna athuak mahbang un, innkuan sung adingin tui puanpi khat hi, kici thei hi.

Innkuan sungah u pen numeite a cihtak vualeh naute adingin a et-tehhuai u pen numei suakding uh a, innkuan ii thupha zong suakthei uhhi.

Innkuan sungah u pen numeite in naute ading ahoih ngaihsutna nei uh a, naute ii siatna leh hoihnate khempeuh nu leh pa mahbangin thuakthei uhhi.

Neek leh dawn lamtawh kisai naute ading deihsak zawkna lungsim nei uh a, vanzat lam tawh kisai in naute ading deihsak zawkna hangin a deih uh ngah zolo thei uh a, hehpihna lungsim aneite ahi uhhi.

Akisap leh zong innkuan ading neek leh dawn, silh leh teen akipan nu leh pa mah bangin sukvak tovakin zong uh a, naute ading pilna deihsak zawkna hangin amau leh amau kiniamkhiatna lungsim anei u pen numeite mah ahi uhhi.

Anbuuk lam tawh kisai vai khempeuh leh nu leh pa, naute ading silh leh teen neek leh dawn akipan lunghianglo takin a sepsak u pen numeite mah ahi uhhi.

Pawlkhate innkuan sung en lehang naute deihsak zawlua liangin nungak hampi a suak u pen numeite mah ahi uhhi.

Innkuan sungah u pen numei cihtak anei naute lam panin “NU” taktak nih nei uhhi kici thei hi. Innkuan sungah u pen numeite icih pen a nihna ih nute ahi uhhi.

Innkuan sungah u pen numei cihtak khempeuh in naute ii kha muanna anglum khat hi a, naute ii lungsim ngaihsutna zong nu leh pate sangin telsiam zaw uh a, hehnem thei uhhi. Hehpihna lungsim anei u pen numeite ahi uhhi.

Innkuan sungah u pen numeite a cihtak vua leh nute ahih mah bang un, nute mah bangin naute tungah seploh aphamawh Tavuan sem zo a, kiniamkhiatna lungsim anei u pen numeite ahi uhhi.

Innkuan sungah u pen numei citak a simmawh bawlte nute zong a simmawh bawlna hi cih phawk gige in.

Upen numei ih cih pen nakhempeuh ah ih te mah bang in thukhual in anau te ading bek ngaihsun in om den hi.

Upen numei te pawlkhat te en lehang asanggam anau teng aneu akipan cingin kem a, sangna ngawn kahkha lo in anau te pil na sin in om hi.

Lungdam, upen numei anei ten azahtak siam te dingin Topa’n thupha ong pia hen. via Cin Khawm Mung