Kuala Lumpur khuasung ah Rohingya vaitawh kisai mi 100,000 in lungphona neihsawm
Myanmar, Rakhine State sung aom Rohingya te buaina vai hangin, abiakna kibatpih te gamtuamtuam ah buailunglung mahmah uhhi. Malaysia Islamic Organisations Consultative Council (Mapim) kici kipawlna te’nzong tuavai hangin lungphona neihkiksawm leuleu uh cih Bernama pan kiza hi.
Mapim President Mohd Azmi Abdul Hamid in agenkhiatna ah lungphona pen Kuala Lumpur, Bukit Jalil aom National Stadium ah kibawlding cihi. Lungphona pen October 28 ahih keileh November 04 ni ciangin bawlsawm uh ci a, tualai ah Rohingya bekbek mi 100,000 bang kihel theiding cihi.
Tuaban ah Malaysia gamsung aom NGO (non-governmental organisations) kipawlna tuamtuam 30 bangzong kihelding a, gamsung kumpi thunei makai pawlkhatzong kihelding hi ci’n genkhia hi.
Tua lungphona pen “A Million People and World of Anger – Rohingya” cih min vawhsawm uh a, ahih theihleh mihing bekbek Million khat ki kaikhawm in, Rohingya te kibawlna teng pulakna neiding cih ageel uh ahihi.
Lungphona neihding pen ani khatzawkzawk lemkhin a, ahi zongin Malaysia Prime Minister Datuk Seri Najib Abdul Razak pen bangni hongki heltheiding cih ki ngaklai in, tua tungtawn in aniding ki kipsakding hi ci’n tuni Press Conference abawlna ah genkhia hi.
Malaysia gamsungpan bekthamlo, leitung gamminthang khuapi tuamtuam ahi New York, London, Paris, Moscow, Istanbul, Jordan, Jakarta, Bangkok, Manila, Singapore cihte paninzong leitung in atheih miminthang, makai minthang te ki sapsawm cihi.
Related: Kuala Lumpur khuasung lungphona panin thumanglo Rohingya mi 71 kiman
Tuabang in mipi lungphona neikhawm in, ki kaihkhopna vaihawmsawm uh a, leitungbup in Kawlgamvai atheih nadingin pholak khiading, kumpi thunei te’n amanlang in Rohingya vaitawh kisai Action alakmengmeng nadingin tawsawnding ci’n amakaipipa in genkhia hi. Sawltak #zomidaily
Comment piaknop aomleh...