Tutung khualzinna (Myanmar Ethnics Entrepreneurs Association) ~ Kapno

Tutung khualzinna (Myanmar Ethnics Entrepreneurs Association) ~ Kapno

MEEA, Myanmar Ethnics Entrepreneurs Association ngiimna pen. Myanmar gam ah Sen, Kala leh gamdangmite dem a Ethnics innteek mihau tampi apian nading, khat le khat kizom kihuh a nasep ding, sepkhopna tawh gam khangto sak ding cih hipen hi. Tuma kum 1 leh 1/2 kiim a kiphuan hi a minampi giat (Kachin, Kayah, Karen, Chin, Bamar, Mon, Rakhine, Shan) leh aituam kiukna angah namke 5 (Pa O, Da Nu, Pa Laung, Naga, Kokant) leh Wa gam khen teng tawh kiphuan ahi hi.

Chairman pen U Yawsep, Golden Butterfly Hotel neipa, Secretary pen U Min Ba Nyar San, Hinthar Media neipa hi. Kei pen Associate General Secretary ka hihi. Kipawlna phuan kawikawi a MEEA tawh kizom a nasep ding ngiimna om bang mah in, tampi mah ki phuan khin in tutung pen PaO leh DaNu ah pai a vaphuan hi ung. Chin Ethnic Entrepreneurs Association CECA zong kiphuan khin a, kei Chairman, U Pachunga pen Secretary hi.

PaO gam pen nidang PNO galkap nei uh a, U Aung Kham Thee in makai in ki lungtuak mahmah uh hi. A gam uh leitang hoih mahmah a huanbawl in nungta uh hi. Tanatphet akici zapi zialna singteh, Laphet-niangteh, Arloe, Gorphi tampi piang a nisim mawtaw pei 20 kithuahte 50 bang in Yangon leh Mandalay ah puak ziahziah uh hi. Kumpi mei zong ngah in lampi zong hoihta ahih man in Industry lam ah kihei pianta uh hi. Innle Lake kiim ah hotel hoih tampi nei uh hi. Kum khat thawl teng nga a piang Red Mountain wine factory zong nei uh hi.

A thupi mahmah khat pen Naung Taung khua ah Phungyi khat in sang nei a numei pasal 2600 bang kah hi. Tapidaw zong tampi om a Buddhist ah lutsak tuanlo hi. Nisim an vak zihziah a laihilh zihziah hi. Laisim tha hatlote ading puankhui sinna leh khutsiamna atuamtuam sinna zong nei hi. Tan sawm a on uh ciang college a zom nuamte’n zom uh a pawlkhat in tua sang mah ah sangsia sem kik uh hi. A lai hilhdan uh zong American center tawh kibang hi. US ah scholarship tawh sangkah zong mi 5 om khin ci hi. Sang huang acres 60 val pha a siangtho sitset hi. Anbuk leh umlebel zong siangtho sitset hi.

Da Nu gam leuleu ah kumpi galkap leh minam galkap neilo uh hi. A biakna makai pa un ka gam ken tavuan la ing ciziau hi. Lampi leh mei hoih mahmah ta hi. Genius Coffee bawlna mun hi a, gamdang zong kum khat ton 100 kim puak ta uh hi.

Maw Shan laphet zong minthang mahmah a gamsung gampua ah zuak zihziah ta uh hi. Nidang mihingtha kizatna ah set-tha zang in nasep telh mahmah hi. Minphatna tampi ngah khin uh hi. Huan nasiatak in bawl uh a Yangon le Mandalay ah mehteh mehgah puak ziahziah uh hi. A muhnop huai mum tampi om a a sawtlo in gandangmite lut ziahziah tading hi. Private high school hoih mahmah khat om a, a neipa in sangnaupangte’ etteh ding in Zu, Za, Kunza leh guihtheih khamtheih bangmah kazang kei hi. Kasang pan a ongte pen character hoihlo omlo hi. Ethics ka thupi sak hi ci hi.

Kapaina peuhpeuh vuah a MP te uh leh Ulian ten ongmuak in holimna ong neih pih zihziah uh hi.

Tu tung khualzinna ah kei gen pen, Thau tawh revolution kum 70 bang bawl hang a khantohna taktak omlo ahih man in i revolution i khel ding a tua pen “Industrial Revolution” “Setmu Tawlanyee” ahi hi. PaO leh DaNu pan i pan ding a gambup i lawh ding hi ka ci hi. Thukim mahmah uh a, ka min bang Tawlanyee – Revolution ong ci uh hi.

A sawtlo in khualzitna maban ka zom toto ding uh hi. Kapno @ Kap Khen Pau, (August 2-8, 2019)