A siangtho pen itna

A siangtho pen itna

Nulepa te sibaih in naupang unau nih bek omlai uh hi. Hih naupang no te ahihleh anau-nu ii belhtaak suantaakpi in a-upa ahihman bang in a-upa ii sanggam neih khempeuh pen anau-nu bekmah ahi hi. Tua bang hi in a-upa in anau-nu pen ama ii nuntakna nangawn sang in itzaw hi.

Kaamsiat kikomsuan ciding ih hiam, cimawh zawngkhal tangah unau nihte in tuahsiatna pi khat hong tuak lailai uh hi. Anau-nu cina in hong zawm lua hi. Zato apuak leh anuntakna hutzawh nading sisan kasam cih thu siavuan te genna pan hong thei hi. Dangka tampi tawh akilei ding tua sisan te lei nading naupang pa in sum neilo hi. Ki-at man (Operation) te zato in sum anget loh hangin sisan om kei leh anau-nu nuntakna hu zolo ding cih ahi hi. Unau laigui kizom ahihmah bang in naupang pa ii sisan pen anau-nu ii sisan tawh anam na kibang hi.

Naupang nu ii nuntakna ahut zawh nading naupang pa ii sisan kila khia ding hi. Siavuan pa in “sisan ih lakkhiat ciang in ana nathuak zo takpi ding hiam? Sisan hawm ngam takpi mah ding na hihiam? Ci in dong hi. Kum 17 aval mialmial pan tua naupang pa in siavuan pa ii dotna te ngaihsun mello in alu kun in adawng hi. Anau-nu aading akisam sisan aman apia ding ahi hi. Sisan alakkhiat ciangin naupang pa lau thawng vetlo hi. Alupna gei aa alum anau-nu maitai takin a en hi. Akisam sisan te aki lakkhiat khit ciang in naupang pa in siavuan pa kiangah aw-ling kawmsa in hibang in hong dong hi.

“Sia … kei kum bang zah ka nunta zo lai tam maw?” Naupang pa in atelloh man in hibang aa adotna pen siavuan pa in azak ciangin anuih hong za sim hi. Ahihang in naupang pa ii hansanna in siavuan pa cimul tho sakzo hi.

Kum 17 aval mialmial hih naupang pa ii ngaihsutna sung ah pumpi sung aa sisan te lakhia leng kisi ding ci aa angaihsut mah taleh anau-nu aading asisan te hawm ngam veve hi. Ama nuntakna abeilawh dong nangawn in anau-nu nuntakna hut sawm ahi hi. Anau-nu aading alau pipi ki hangsan sak hi.

Siavuan pa in naupang pa ii khut te len kawm in “Lungnuam in maw. Nang si peuhmah lo ding hiteh. Sisan hawpna in mi sisak zolo hi.” Ci in agen leh naupang pa mit-hah hong kikhel in siavuan pa thu hong dong kik hi.

“Na takpi maw sia. Tua ahihleh kei kum bang zah bang ka nunta zo lai tam? “Kum 100, nang pen cidam na hihciang aa kum 100 bang nunta zo ding hiteh.” Ci in siavuan pa in hehpihna aw tawh maitai sa in dawng kik hi.

Siavuan pa thugen azak ciangin naupang pa thalawp lua in hong diangkhia liang hi. Amah bang mah ci lo ding cih atheih ciang in asisan lakkhiatna phim tawi kawmsa in siavuan pa kiang ah zahtak tak in thu khat hong gen hi.

“Sia aw tua ahihleh ka pum sung aa sisan te alang lakhia inla ka nau hong piaksak ve. Tua hileh ko ka nih uh aa kum 50 tuak nunta khawm thei pah ding”

Naupang pa ii kammal te pen aza kha cina khang sung mikhem peuh in lamdang sa uh hi. Hih in mihing te sung ah angsung ngaihsutna akihel vetlo asiangtho penpen itna kiciamna kammal ahi hi. Source: Youthwant Lailet – Peter Suumpi (Jan 14, 2018)