Tutung Zomi Minpua Party leh MP Tha Piak Ding Kilawm

Tutung Zomi Minpua Party leh MP Tha Piak Ding Kilawm

Pasian nasemte leh a dangdangte Politician ih hih kim loh hangin gam huam sunga om mi khempeuh politician khut nuai ah om ahih manin hih ki telna tungtangah a kisailo cih kuamah a om kei hi. Pawl khat in Pasian nasemte na kicinglah se dah un aci zong om kha ding hi. Ahih hangin biakna thu leh bangzah ta in na pil a, na hau zongin hong uk mangte khut nuai ah ki om ngeu ahih manin vote khia thei a, khia theilo ahi zongin, politics tawh a kipeng thei kuamah a om kei hi. Pawl khat in Vote khia theilo ding teng internet ah awngawng a cih hangin Dong tuahna ah zong a khia theilo ding teng mah a lung himawh pen hizel hi. Tua banah Census 914 pan kipanin leitung bup a om Zomite lungsim leh sisan sungah Zomi ih hihna, za khat lakah sawm kua bangin zo khin hi.

Mailam hun ah party tuamtuam pan MP ding a hoih zaw, a kicing leh a muanhuai zaw tampi hong om phial zongin Census a kipan Zomi movement ih kipat a kipat vet, Zomite’ kipawlna sanga hong khual zaw ding lamet huailo hi. Tutunga kitelna ah Zomi party MP Candidate sung pan a muan huai a, a muan huai kei zongin ih deihna bulpi ah, Zogam aading hong phut sak ding, hong gensak ding, khantohna lam hong hon sak ding mi a kisam pen hi hang. Tua ahih manin ZCD pan MP Candidate te muanhuai nasa kei phial zongin ih minam itna tawh ih minam Party mah tutung limlim in tha piak ding kilawm pen ding hi. Party dang pan MP candidate te muanhuai kei cihna hilo a, ahih hangin ih minam itna tawh ih minam party mah tutungin piak ding kilawm hi.

A zenzen in tu term sungah ih minam party leh ih piak MP te ih muan hong bat kei leh tua ciangin ih lungsim khat hei leng hoihlo ding hiam. Tua ciangin ih Zomi party pan ahilo party dang pan MP candidate dingte pen, amau in na zadah kei henla, minam veina taktak sangin angsung khualna tawh nasem nuam leh Zomi nam thupi ngaihsut khollo te hizaw kha thei hi. A tawptawpna ah inn gua hahlo gamgua hah ih suah khak ding lauhuai hi. A zenzen in tu a ih tha piak ding ZCD MP candidate te pen pia in ngah napi a kilawm banga hong sep kei leh ki thu hilh ngam dinga, tualo party dang pan hong kahte pen ki thuhilh ngam khollo kha ding hi. Leitungah omlai ih hih manin leitung thu pen leitung dan mah tawh kalsuan leng ki khiallo zaw khading hi.

Hih thu pen Zomi khat ka hihna leh Zogam ka veina tawh kong pulak khiat hi a, a mimal deihna, deih lohna hilo in Zomi Nam mit tawh ka et ahih manin na lungsim tawh a ki tuak kei leh a minam khan toh ding a deihna tawh hibang ngaihsun hi hong ci lel un. Lai nong simsak ka lungdam.

Zomi Zogam veina tawh,

Mang Khan Khup
Canada