Tuni (Sept. 11, 2009) ~ Rev. Gin Khan Nang

Tuni (Sept. 11, 2009) ~ Rev. Gin Khan Nang

Tuni bang ni hi ding, Sept. 11, 2009 ni hi. Kei ading a thupi tuam om kei, ahi zongin a tuam pianna khat om. Zingsang ka thawh ciangin internet ka et ngei bangin ka en masa a, tua khit ciangin website tuamtuamah lutin tadensa ka sim zel bangin tu zingsang zong ka lawmnu Maman ka hopih khit ciangin ka et leh ZBC website ah “September Laitai” cih ka mu hi. Zanin October Laitai ka sim khin zo a, ka lungsimah September kha pen Editorpa a nuphalnu sihna hangin Lamka pai ahih ciangin buaia, suaksak man lo hi ding hi. October kici pen September leh October huam hi ding hi ci-in ka bawltawm hi. Tu zingsangin September Laitai ka muh kik ciangin ka simsuk pah a, a thute zong hoih kasa hi.

Upa Z.K. Dong lungdam kohna leh Zokhawthar ah Pawlpi inn 4 a kibehlapna thu, Ngaizawl leh Leisenzo-ah Pawlpi kibehlapna thute ka sim ciangin Pasian hoih si e, ka ci hi. Upa ZK Dong’ tanute accident thu zong hih website mah panin a ni mahin ka sim kha a, Shillonga ka lawmnu kiangah na hopih in ci-in ka hilh hi. Leisenso biakinn lam vai, Dr. Hau Za Cin in a paneu tapa Tg. Lian Muan Kham (Khampu) Computer a leisak vai, Sia Kham Suan Paute nupa in Sia Khawm Lian Suum Computer a leisak vai, Tg. Mung Lem Suum in galkap bu (NDA) sinna ding a cinna thu, Sia Kham Do Pau tapa Tg. Chin Lian Mang in engineering (IEM) sin ding a cinna thu ka sim ciangin Mizogam Zomite zong Pasian in hong lamto nuam ta hi ci-in ka phawk hi. Kawlgama galkap ulian Bo Khen Za Mung zong hih Tg. Suum sinnate pana zo khia ahi hi. Hih bang khangno laisiamte in hong zawh uh ciangin officer hong suakpah ding uh ahih manin lungdam huai mahmah hi. ZBC gam sung khantohna Editorpa in gual diudeu-in a gelhte in lungsim hong lawng mahmah a, Topa thupha tampi kingah hi ci-in ka phawk hi.

Tua bek hi loin website dang nisim a ka et den misual.com kici Mizo khangno pawl in a bawl pen ka et teh Tualcheng khua maan (photo) ka mu hi. 1958 kumin Tan 3 ka examna mun, valeng pana kizaih hi leh kilawm a khua tamphei dide ka muh ciangin a gal khata mualpi kikhungte Murlen Sihzo mual hi ding hi ci-in ka gal-et thei hi. Tualchengah laivuanin ka pai pen ka khatvei khualzinna ahih manin ka lungleng thei lua-in a khuanawl panin Murlen khualu Sihzo mual pen ka enen zel a, tua khawng ka lungsimah hong lutkik hi. Tualcheng ka laivuan laia sangsia hong uk Zotlang sangsia Pu Hauchhawna hi a, tu-in a tapa Pu Vanhela Pachuau pen Mizoram Chief Secretary a suak hi. Tua bek hi loin ka et suksuk leh Ngaizawl khua maan zong na tuang a, Neihdawn khua hi ci zaw lai hi. A gelhte in zong a khua min thei lo lai hi. Maan hoih mahmah tawh kila hi ding hi. Mual nuai-ah a phei om zihziah Ngaizawl khua ka muh ciangin a khuataw-a khe tawh ka tuahsuk tuah toh laite ka phawkkik a, ka khuk bang zaw thei lai hi.

Ngaizawl khua ZBC upa Thang Khan Zuang tapa Tg. Hau-a in tukumin BA ong hi cih thu Laitai pan ka sim tawh hong kituak leuleu hi (2010 kum panin ZBC Pawlpi sawlin Aizawlah B.D. sin ding). “Zo Khua” ci-in gelh uh a, khuapi leh khuata a tehkak nopna uh hi ding hi ven Aizawl khuapi Durtlang lam pana kilakna hong suak leuleu a, Aizawl ZBC biakinn phei khawng ka mu zihziah hi. Tua bek hi lo lai, Hnahlan khua maan 5 khawng na om leuleu a, Dam Veng khualu lam pan Mualveng lam kila biakinnpi kigal muhna damveng suk leh mualveng inn pawl khat kimu thei hi. Hnahlanah ka sangkah lai (1959) khawngin khualu mualah tualkiakte hing dipdepin nopci mahmah a, tu ni a maan pan ka muh kik ciangin khua keu-in san giapguap mawk hi. Nipi ni ciangin nungak leh tangval vak khopna kikholhna munin kinei a, ko pawl bel vakpih ding a nei thei nai lo pawl ka hi uh hi. Inn 500 val ahih hangin khua deih bangin kimu zihziah thei lo hi. Pu Haukhum Hauzel IAS pen Hnahlan khua a piang hi a, Hnahlan khua gei-ah Leng huan a bawlsawm a kivat sa tuma-in ka muh ngei thu ka phawk kik hi. Tu-in kung bangzah suan a, bang ciang tung hiam cih ka thei nawn kei hi. Amah zong Goa pekah om ahih manin a huan puah man nawnin ka um kei hi. Tua tawh kizomin Hnahlan a leeggahtui bawlna ding (Winery) zatui zong Hnahlan khua tungta hi cih ka sim kha sawnsawn hi. Tua leh Sia TK Khual in Laitai-ah a gah lawh baih ding cih thu kha lam panin a gelhna ka muh khak ciangin Hnahlan khua tawh kituak mahmah hi ci-in ka ngaihsun hi.

Tua khit teh sun an nek hong hun ta a, ka lungsim ah ankam tui siang ka duhna hong suak hi. Zan hal lama sun meh dinga ka koih alu, patang leh ankam lom khat om lai hi cih thu ka phawk khia hi. Tuate pen zan hal pek a huan dinga ka koih hi napi-in ka huan man nai kei hi. Zan halin (9.9.09) Dr. Lalliana Mualchinte nupa a omna uh San Francisco panin Los Angeles khuapi-ah hong zin uh a, sun an Sen sai-ah hong nekpih a, zanin Rev. Kim (ka lawmpa) tawh a office ding ka puah khit uh ciangin sai-ah an ka ne khawm leuleu uh a, ka meh leisate nek lohin om den hi. Ankam tui pen duh hun hong suak thei hi; nung lamin zong Sianu Lucy Dimnu kiangah ankam tui na huan in hong ne ding hi’ng ci-in a inn vuah ankamtui siang limtak ka va dawn hi. Mi khat ading kamtui huan pen buai huai tak hi. Ankam tam pian leh a tui zong lim se a, khat bek nek ding tawmcik huan pen a tui lim tham lo leuleu hi. B-u-a-i-s-a-k tak hi.

Tua khit ciangin Zonet ading article “Aizawl Khua Hun” ci-in tawm ka gelh a, Manipur numei minthang Sarmila Devi leh Aung San Suu Kyi kibatna thu Penguin laibu sunga kigelhte in ka lungsim hong khoih ahih manin tua thu zong ka gelh hi. Sarmila in Manipur a galkapte thuneihna deih loin anngawl a, kum 8 anngawl ta hi. Galkapte khut lum thuakin mi tampi in sihna tuak a, tua a deih loh etsakna dingin sih dongin an ngawl ding ci-in kiciam hi. Kumpite in Zato-ah aana (force) tawh a nak panin bawngnawi thun uh a, tua tawh nungta hi. A lungsim khauh zia leh Suu Kyi lungsim khauhzia kibang a, a deihna uh zong galkap thuneihna deih loin mihingte suahtak ding deihna tuaktuak ahi hi. Tua thu hangin amau geel pen “Iron Ladies” kici hi.

Tua teng ka ngaihsut kawmkawm America ah tuni 9/11 (Americate gelhdan) ni thupi takin kizang cih thu ka ngaihsun leuleu hi. Nambat in mihing hong thuzawhzia ka ngaihsun a, Kawlgamah 888 in thu nei a, America ah 9/11, India-ah 11/26 in thu nei leuleu hi. Tham loin 999 in minam pawlkhatte lungsim na zo mahmah leuleu hi. Kawlgam adingin bang hangin 888 thupi hiam I cih leh 8.8.1988 ni-in galkapte khut lum le thau tang thuakin sangnaupang tampi in sihna thuak hi. Tua buaina in tu dongin lungsim khoih a, kum simin Aug.8 ni pen sangnaupang site phawkna-in kizang hi. Tukum pen a 11 veina hi ta hi. 888 in Kawlgam mite lungsim zo mahmah hi. 9/11 in bang hangin America mite lungsim zo hiam i cih leuleu ciangin Sept.11, 2001 ni-in World Trade Centre (WTC), New York leh Washington khuapi a Pentagon kici galkap zumpi migilote in a kapsiat ni hi a, mi 3000 val a sih ni hi.

WTC innpi nih a siat ni leh mi gilote khut thuak ni, dahna ni ci-in America-ah kizang hi. India mite adingin 11/26 i cih leuleu ciangin November 26-29, 2008 ni-in Pakistan mi gilote in Mumbai khuapi a sim ni hi a, mi tampi a thah ni uh hi. India in mi gilote khut a thuak ni ahih manin India mite adingin hih ni pen dahna ni, khitui luan ni leh migilote khut thuak ni ci-in kiciamteh leuleu hi. 888 pen nambat hoih hi kici hi. Nung kum 8.8.2008 ni-in minam pawl khat in kamphatna thupha ngahna ding ci-in nupa kiteng kop tampi om hi kici hi. Ni 9.9. 2009 pen 999 kici a, nambat hoih lo hi kici leuleu hi. Nambat 9 vive thum akizom pen minam pawlkhat in nambat sia ci uh a, tua ni-in biakna lim takin bawlin, zehtang uh hi. Nambat in mihingte hong uk zawmawk hi. Hih nite in mihingte hong uk ding hi zaw loin, mihingte in tuni i uk ding hi zaw hi. Tua in bang hong phawk sak hiam cih leh Zo gamah singlamteh in hong uk na thu ka phawk khia hi. Inn sung, inn kong, mualtungte-ah singlamteh kikoih zihziah hi. A sia hi cipah kei hang, ahi zongin singlamteh lim in ei hong uk ding hi lo zaw-in i nuntakna-ah singlamteh lim i lah ding hi zaw leh kilawm kasa hi. Tua ahih manin tuni-in na lungsim bang in hong uk a, bang na ngaihsun a, tuni na lungsim bang in hong zo a, cih kidong ciat dingin hih thu kong gelh hi. Pasian in nuntakna hun “Tuni” hong piak pen ama minthanna dingin zat sawm ciat ni. Topa’n I omna tekah thupha hong pia ta hen.

Rev. Gin Khan Nang