Bill Gates in COVID-19 amuhna

Bill Gates in COVID-19 amuhna

Leitung ah mihau pen leh piakkhiatna a hat pen Bill Gates in pul natna Coronavirus tawh kisai muhna thu(14) na gen khia hi. A mau inn kuan in hih COVID-19 lungno beina dingin nasepnate ah dollar million 100 ka pia khia ding uh hi ci-in kamciam hi.

Zomi te aw hih pulnatna pen ei a dingin lauhuai lo hi. Sen gam ah cinate a bawlna uh zatui pen natgual cisa in hong bat ciangin I neek pahpah zatui nam te vive zang uh hi. USA ah a muhkhiat uh zatui pen Nattunza (Galkapzatang I cih/Cloroquine/Kunai) te hi a, Zomi a tamzaw in nattun natna a zo khinsa I hihi. Gamkhangto te leh mikaang in a lelh diakna uh pen a mau gamah tumaa kum (100) laipek pan hih natna te vei kha nawnlo ahih manin a thiaklah uh a hihi.

Eite I hih leh khuahun kikheel sim, tuuk kipat, khuakhaal sim in puanbu tawh ki tuam vilvel in ni (6) ni (7) bang, natgual hilel ci-in a lumcip den te I hih manin I sisan sungah VIRUS a zo ding daat( Immunity System) a nei I hihi. Topa in eite a hong gawtna hilo a, hih bang hunsia a tun ciangin a minthangsak dingin hong tuamkep minam I hihi.

Bill Gates in Wuhan Pulnatna in leitung mihing te hong hilh thuman pha te ci-in The Sun News ah laigelh hi. ‘What is the Corona/ Covid-19 Virus really teaching us?’

Kei pen a piang na khempeuh ah kha lam thusim kisel hi ci-in a um Tapidaw mi khat ka hihi. Ei te in a hoih lam a hih kei leh a sia lam in I la thei hi. Tua ka muh khiat thute kong hawmsawn nuam hi.

1. COVID-19 in mihing khempeuh a kibang I hih lam hong phawksak hi. Ngeina, biakna, neih leh lam-sum leh pai ki banglo-in i minthanna zong ki bang kei mah leh hih puulnatna in guptuam paihtuam neilo in I vekpi in aki bangin hong mu lel hi.(Na up kei lehTom Hanks va dong un/ Hollywood actor min thang hi a, virus tawh a cina laitak khat hi).

2. Mihing tate te khat leh khat a ki nahvawh dimdiam I hi a, khat tungah natna kilawh leh a dangkhat tung zongah a kilawh thei a hihi. Ei te-in gamgi bawl in I buaibuai hangin hih pulnatna in passport/visa kisam lo-in hong lut ziahziah hi.

3. Mihing te a ding in cidamna bangzah in thupi cih hong phawksak hi. Eite in I neek ding an leh tui te thupi simlo in mihing pilna tawh a tuamtuam I bawl hi. Mihing bawltawm teh-leh-gah te mah in hong cina sak ding hi. Sum meet ding bek en in nasem nawn kei ni.

4. Leitung nuntakna paakpalh bang, tuikhu bang a hih lam hong phawksak hi. Bang sem masa ding cih hong hilh a, tua in khat leh khat ki huh kipanpih ding a hihi. Na gei a cina khat na kin kei leh nangtung hong tung ding hi.( Antang leikholh ding leh tawsiakna ding laidal peuh tawh buai ding hilo hi).

5. Hauhna sum leh pai, leitung nopsakna bekbek tawh a buai vannuai mite tungah mihing kisap taktak nate hong hilh hi. Tuate-in nek tawm ding an, dawn ding tui, leh zatui zaha bek hi a, phone peuh, kizemna leh niik hoih puan hoih peuh deih in ki tot-tot ding hilo hi.

6. Hun sawtpi tak I nusiat zi-leh-ta, innkuan bangzah in thupi cih hong phawksak hi. Pulnatna in eite I zi leh ta kiangah hong ciahsak kik in, I innkuan ciat hoih takin a lam kik dingin hong sawl a hihi.

7. Mihing sep leh bawl ding pen sum zonna(nasep bekbek) hilo hi. I sep I bawl ding taktak pen khat leh khat kikep kidon ding, ki gum ki hung in thupha kibawl ding a hihi.

8. I angsung nasepna te kisit kik ni. Bangzah ta in hau kisa-in pil in lian na kisa zongin a neu mahmah virus in navai teng khawlcip sak thei cih phawk in. Bangzahta in na huang na inn a gol a bit zongin, VIRUS in lut zawhlohna neilo hi.

9. I khut sungah suakta takin teeltheihna (freewill) a omlam hong phawksak hi. Eite khat leh khat khut ki len in mapangkhawm ding maw? Piakhia in huh ding maw? No innkuan guak kikhual in kholcip ding maw? I pianpih huaihamna leh angsung theihna I nusiat ding ol-san lo hi.

10. Ei te pen thukhual/lungduai takin a om nam maw? A buai pampam a, ei bek a kikhual nam maw? cih hong kilangsak hi. Tang lai pek pan leitungah pulpi zavat na tung zelzel ngei a, leitung beisam lo hi ci-in lung nuam takin om zaw ding maw? Linglawng patau in leitung beipah ding bekbek in ngaihsun in seploh ding teng sem pampam ding maw? Teel in.

11. Hih pulpi in leitung beina ding maw, a thak in kipat kik na ding hizaw cih ngaihsut huai hi. I sep I bawl sa nate sung pan I khialhna teng ki sit kik hun hi. I muh khak khialhna teng ki puah in mihing vai takin nasepna thak kipat ding a hihi. Lungsim thak, ki ukna thak ki pat ding hun ta hi.

12. I leitungpi cina in gim lua mahmah ta hi. Gamhal/singphuuk kidop huai hi. Tawsiakna ding laidal kituh ziahziah in na om laitak in tua laidal te hangin leitung dammawhta cih phawk in. Eite in natna I ngah hi. Bang hiam cih leh I teenna leitung cina ta hi.

13. Haksatna khempeuh in bei hun/ven hun nei hi. Nuntakna pen a ki peipei hi a, tutung a natna zong kiukhat bek a hihi. Buai gawp kei ni. Hong kheng/hong veng pah ding hi.

14. A tawpna ah mite-in Coronavirus pen pulpi/dawi gilo in ngaihsun uh hi. A hi zongin kei ka hih leh mihing te hong kikhelsak ding khutsiampa (A Great Corrector) bangin ka ngaih sun hi. Lailet- Suumpi