Tulai Zomite dinmun leh mailam ding ~ Khup Lian Thang

Tulai Zomite dinmun leh mailam ding ~ Khup Lian Thang

Zomite leitung mun tuamtuam ah ki theihthang in, tua sungpan in USA, Canada, Europe gamte leh Australia, Newzealand, etc… cih bangin gam thupi diak ah atung Zomite pen tua gam ah tengsuak dingin a ki gelciat a ki khensat zaw ciat ahi hi. Thatang, pilna siamna masuan in Singapore, Japan, Korea, Malaysia etc… cih bang gamte ah zong kum tawmvei sung nan va sem in, ngah zahzah khol zahzah tawh inn ah ciah kik in nasem ding cih ngimna tawh nasep zong tampi tak mah ki om hi. Zogam aa a teng Zomite in zong kumpi nasepna, sumbawl pai bawlna leh gamdang a tung a sa a tu a ta te’ sum khakna tungah kinga in anungta, cih bangin a tuamtuam in leitung mun tuamtuam ah Zomite ki zel in nuntakzia ngimna a tuamtuam tawh na nungta na khuasa ciat uh hi.

Zogam aa om Zomite te, gamdang tungin gamdang mi a suak ding Zomite, tawmvei sumzong paizong in a zin Zomite, nuntak khuasak zia, kim leh pam ki omna a ki lamdang na hangin a thu ngaihsutzia te leh tatzia khawlzia te uh damdam in ki lamdang hiaihiai ta uh a, hun sawtlo khat teh minam dang ngeina dang suakin, sanggam u leh nau ki itna te kiam in, a sawtlo in minam dangte ngeina leh tatzia uh, minam dangte in a nawmvalh thei ding dinmun ah theihloh kal in a kalsuansuan na hi ta gige ta uh hi.

Zomite Khantohna A Etkik-pakna

Leitung ah gam, minam, pau leh ngeina tuamtam tampi tak a om hi in tua sungah Zomite zong ngeina pau leh ham a tuam vilvel a nei minam khat in na kihel uh hi. Leitung mihingte’ pianzia a kankhia tangthu kan siamte tungtawn in leitung mihing te pen khantohna lam ah kikhelna a lianpi nam 5 bang a ki nawkkha dingin na ciamteh uh hi. Amasa pen in leitung mihing te sungah thu ngaihsut siamna aneih hun (Cognitive Revolution) hi in, hih hun sungin mihing te in nungta khawm, nasem khawm, gamsa te beng khawm cih bangin na nungta uh hi.

Tua pan in na khangto uh a, singteh meteh mehgah te cing in lohawh natawh a kivak theih hun (Agricultural Revolution), tua pan in leitung ah pilna siamna te khangin leitung nate’ thu a ki kankhiat a ki muh khiat hun (Scientific Revolution) AD 1500-khit lam pan kipan hi. Tua letung nate’ thute muh khaitna tungtawn in Setvan tuamtuam te hong ki mukhia in, Setvan te mihing te mun ah na a sep hun (Industrial Revolution) AD 1780 khit lam, Setkhuak zangin na aki sep hun (Information and Telecommunication Revolution) AD 1970 khit hun ci-in leitung khantohna pen hunpi 5 bang in ki ciamteh thei hi. Tuni in hih leitung khantohna hih bang dinmun a tunna pen kikhelna hanciamna tampi a ki gawm toto hi in, tha khat thu zankhat thu in a piang vat hilo hi. Hih hun kikhel na lianpi tampi te leh Zomite thu en kak in, Zomite te mailam masuan ding tawm kikum suk dih ni.

Zomite pen hun khat lai in Mongolia gam, tua pan in Tibet, tua pan in lal khia uh a Kawlzang ah zong hun saupi mah a teng dingin ki ciamteh hi. Tua pan in Zogam lam ah kikhin to uh a, AD 1420kim pawl pan aa Ciimnuai ah na teng uh hi ci-in Zomite tangthu kan siamte in na ciamteh hi. Gam sa man in lokhawh sing puakna tawh kivak uh aa, Ciimnuai ah mi a tam ciangin mun dang ah khua thak sat in khua tampi na pha uh hi. Tua hun laitak pen mun dang leitung khangtohna lam ah hi leh leitung nate’ thu a ki mukhiat hun (Scientific Revolution) hi in, Zomite pen leitung mundang tawh kizopna om nai hetlo ahih manin lokhawh singpuak, sa beng in tua mah tawh nuntakna a kivak dinmun ah na om suak uh hi. Amau leh amau’ bawng, a khua leh a beh cih bangin na teng khawm uh a, upa hausa ukpi te cih bangin ki uk in ki makaih uh hi. Kum zalom 19 a bei kuan ciangin gamkek British Empire te’ khut sungah tung uh a, British te’ ukna nuai pan in a neih ngeisa Ukpi te’ tungtawn in ki uk suak uh hi.

Tua hun pawl mah in America pan in Sangmang te na tung uh a, Sangmang te’ hangin gupkhiatna thu, lai lam leh leitung pilna thu ah Zomite in a mit uh tampi hong ki hong hi. Tua hun pen minam dangte tawh hoihtak in a kizop cilna uh zong kici thei hi. A diak in 1917 kum, galpi khatna hun in Alliance Force te ahuh dingin France gam ah Zomite tampi tak na pai thei uh a, Zogam khengin mundang gamdang na sik uh masa uh hi. A thumuhna athu theihna uh nakpi tak in khangin, tua hangin khantoh nopna lungsim na nei uh hi. Tua hun taktak pan in Zomite’ mit kihong in, khantohna te na ciamkha na mukha uh hi. Galpi nihna hangin British kumpi te thanem mahmah uh a, a khut sunga om gamte hoihtak in len zo nawnlo uh ahih manin suahtakna piak dingin khensat uh a, Zogam, Shan gam, Kachin gam, Karenni gam leh Kawlzang tawh kigawm in belpawl gam khat in na ding uh hi.

Suah takna ngah cil hun lai in Zomiten a khuamuhna hun uh a sawt luat nailohna hangin mipil misiam pen tam lua nailo uh hi. Ahih hangin a mipil om sunsun te hita leh, galkap tum in kumpi nasep sunsun te hita leh citak mahmah kuhkal mahmah uh ahih manin Kawlgam bup phial in Zomite na zahtak leh a citak a thuman minamte ci-in na ciamteh ngiat uh hi. Setvan leh setkhuak te zangin leitung gam tampi te khangto in nuntakna nuam sa in aom laitak in, Zomite ahih leh a tenna a belpawl pih Kawlgam leh amakai Kawlte hangin a bangbang ah khangto hetlo in, a tualniam mahmah minam khat gam khat ah a na teng kha a na nungta kha na hi uh hi. Mimal khat bek, mipawl khat bek in thuneihna teng a letna hang hipi pen a, Zomite ahih leh a sepsepna ah citak leh thumanna bulphuh uh a, kumpi nasepna (a diakin galkap lam ah) ah maipha a mu tampi tak om hi. A hih hangin ahuampi in minam leh biakna ki deidanna a khauhpai luatna hangin galkap hita leh kumpi nasep hita leh, Zomite te lut nuam nawnlo or ngimna bulpi in nei nawn pha lo uh hi. Lam khat pan in, nuntakna haksa lua ahih manin hih haksatna pan koici suahtak ding cih bek ngimna bulpi hong nei ta uh hi.

AD 1988-2000kum khit lam ciangin a vei a kin a hanciam mi masate in gam haksatna hangin Zogam aa om Zomi a neu a lian cih omlo in gam thumna, or gam thupi lam ah lampi tuamtuam tawh na phukhia masa uh hi. Galtai leh gambel in Malaysia, India leh Thailand pan in gam thumna (adiak in USA, Europe gamte, Australia leh Newzealand) ah mi tampi tak na lut thei uh hi. Tua mah bangin pilna siamna, thatang hatna te zangin gam tuamtuam ah sum thalawh ding sum zong paai zong dingin na pai khia ngeingai uh hi. A diakin Malaysia, Korea, Singapore, Japan te an sum leh paai zongin kum sawtpi na teng uh a, pawlkhat te a gammi a na suak zong om phial uh hi. Gam tampi ah ki zel mangin tulai takin leitung gam 36 bang ah Zomite ki thehthang hi ci in Rev.Dr.Jm Paupu in na gen hi.

Tua a pai na uh leh a tenna gam thumna te ah ahi zongin, a sumzonna gam thupi te ah Zomite a tun uh ciangin a nuntak nate uh tampi kilamdang pah a, tua mah bangin a zon sunsun sumte pen innlam ah Nu leh Pa, U leh Nau te in na noptuam pih mahmah in Zogam ah ci leh sathau ki zangzo pah in, ankhing zong na kham zaw deuh tham pah uh hi. Tua kawmkal ah 2010kum khit lam ciangin Kawlgam gamvai khuahun kikhelna na om a, kumpi kiuk zia kikhel in, kumpi nasepna zong nidang sangin hoihzaw a, nasep zong tampi ki hong zaw hi. Tua teng a kigawm ciangin tu laitak Zogam leh Zomite nuntakna pen hun dang tawh the kakna in hun hoih mahmah or hoih hoihpen laitak hi kici thei hi. Lam khat pan in, hun dang sangin a hoih mahmah tawh akibang a nop penpen hun tawh a ki bat hangin, minam bup kiamsukna , kisiatna leh mangthanna a om thei ding dinmun tawh a ki nai penpen hun zong na citciat hi.

Zomite Bek Hilo

Hih bangin gam khat pan gam khat ah a lal, haksatna tuamtuam hangin a minam bup, a lomlom aa kikhinna pen Zomite bek na hihetlo in minam dang tampi te zong tua bangmah in na tuak kha ngei uh hi. AD 70kum pawl in Rome kumpi pa in Jerusalem a suksiat ciangin Jews mite khempeuh in a gam uh pan in tai in, leitung gam tuamtuam ah ki thehthang mang uh hi. Asia, Africa, Europe ah kitheh thangin AD 1776kum in America gam aki phuh khit ciangin America lam ah zong nakpi tak in lal uh hi. Amun hoihna, nuntak gim a namna ah kituah kawikawi uh hi. A diakin galpi nihna hun lai in Germany gam ah Jews minamte in bawlsiatna leh minam bup a lomlom in kithahna aom ciangin Germany gam pan bek hilo in Europe gamte sunga a om Jews te tampi tak America gam ah gal na tai uh hi.

Vietnam te zong a gam ah Veitnam gal (1950-1975) khauhpai lua a hih manin a gam sungah daihna omlo lungzinna bek tawh kidim ahih manin mi tampi tak galtai in Europe gamte leh America lam ah lal ngeingai uh hi. Amau tawh ki bangin Korea te zong gal tai in, gam hoihna ah na lal uh hi. Sen mite leuleu pen galvai savai cih a hih lianloh hangin leitung mun tuamtuam leh gam tuamtam ah sumbawl paai bawlin zin kawikawi uh a, a tuntun na ah inntek theih ding hanciam pah uh in na tengden pah uh hi. Tua hangin gam thupi khempeuh leh sum ki bawl theihna gam khempeuh ah Sente na tung uh hi. Singapore gam bang pen tu laitak in Sen minam 78% phial bang ahih hangin, hunk hat lai in Sen gam pan in sumbawl aa a tengsuak Sente vive ahi uh hi.

Kawlgam sung mahmah pan in Zomite mah bangin gal leh sa a tam deuh leh a thuak deuh ahi Karen mite, Kachin te zong tampi tak mah gal tai in gam thumna ah na tung ngeingai uh hi. Tu hun diakdiak pen leitung khantohna hangin leitung gambup pen khuata khat a suakta phial hi in, tua hangin nasepna khat peuhpeuh sum bawl pai bawlna hangin mun tuamtuam gam tuamtam ah ki zin kawikawi in, a lem nana ah ki teng zaw mai ta hi. Kizop na dingin Smart phone te zangin leitung a lu leh a taw ah a kikhen ahih hangin inn sung khat bangin kimu kiho in zingvai a kihawm khop theih hun hi ta hi. Tua hangin mun tuamtuam ah kikhenna pen gamvai hatsatna hang, nuntak haksatna te hang bek hilo in, khantohna hangin zong a om toto ta hi a, Zomite in zong tua teng mah a tuakkha a phukha toto ta uh a hi hi.

Gam dang tungna hangin Zomite Hamphatna te

Hih bangin gam nuamzaw ah a kikhin Zomite’ nuntakna pen tampi kilamdang pah hi. Khantawn in nei zolo dingin a a ngaihsut uh ahi inn hoih pipi te na neizo na leitzo pah uh hi. Neek leh dawn silh le ten cihte ah lungkham om nawnlo hi. Puan hoih nono leh motor hoih nono, an zong a duhduh na ne zo uh a, tua hangin a vallua in thaugawploh na ding bang ki dophuai zaw dinmun hita hi. A tunna gamte zui in nasem in nungta uh ahih manin nasep siam in, mite tawh kizopna leh mite’ nuntak khuasakna te thei kha mukha leh ahoihna tampi etteh thei uh ahih manin bangmah tawh a ki lei theilo ding hamphatna ngah uh hi. Zomite te in a kihtak penpen lak ah khat ahi natna satna hi in, tua bangin natna satna a tuah ciangin zong zato hoihpen te ah ut hunhun in ki lak thei uh ta uh hi.

A thupi pen ahi a tate sangkahna dingin lunghimawhna tampi zong kiam tuam hi. Gam khangto te ah tan 10 sang ciangciang pen a mawkna phial in kahsak uh ahih manin a tate uh in tan 10 sang a kahzo hamtang ding cih hi limlim hi. Zogam ah hi leh tan 4 nangawn a kah zolo ding innkuan tampi a om hi in, tu in gamdang pilna leh leitung ah a hoihpen sang hoihpen a omna gamte ah tan 10 ciang kah thei ding uh hi limlim ahih manin hampha mahmah uh hi. A hangciam na zui in College, University te zomto thei uh a leitung ah mipil pente’ sangkahna mah pan in lukhuneikaai la thei ta uh hi. A pil a siam uh a hih nak leh a ut tantan khantohna ding uh ki ciangtan lo hi. Tua gamte’ MP khawng, President, Secretry pipi zong a suak thei uh ahi hi. Kawlgam bangin minam leh biakna paulap in ki deidanna a omlo phial kici thei a, a hamphatna uh pen genvet a kullo cih ding hi mai hi.

Pilna leh thatang tawh nasem in sum thalawhna na hangin gamdang atung khempeuh in zong, a tungna gam pan in pilna siamna tampi ngah uh hi. Engieer te in amau tawh kituak pilna, Siavuan te in amau tawh kisai siamna, an sai ah asem te in an lim meh lim nono bawlsiam huansiamna, inn nasem te in mite nuntak zia leh innsung kilamh zia, inn sungah a hoih pen in nasep silbawlzia, etc… cih bangin sum bek hilo in sum tawh a ki lei theilo nasep siamna, mite tawh kizop kiho siamna, amau mahmah in a tuahkhak thute tungtawn in pilna a ngahna cihte khempeuh pen gen zawhloh in pilna leh hamphat lomtang ahi hi.

A Lauhuai Leh Zatkhialh Theihna

Lokho singpua nuntakna dinmun pan in thakhat thu in setvan zatna hun kheng in setkhuak te a kizatna gam khangto khin sate ah a tung uh himawk ahih manin, leitung khantohna te’ kikhelna tawh a en kak hi le hang Zomite pen kum 400-500 hun sung bang kantan in setkhuak zatna hun leh gamte ah a na tungkha vat uh na hi uh hi. Rev.Dr.Jm Paupu in “Zomite tawmvei sung vanleng tungah a ihmut sungin kum 300 bang kantan uh hi” na ci hi. Tua a hihman in Zomite in thakhat thu in muhkhak thute leh a tuahkhak thute hangin na lung-am mahmah uh a (Cutural Shock), koici gamtat luhek ding cih theilo in amau khop takin buaina haksatna leh kisiatna a na tuakkha innkuan tampi tak zong om khin hi.

Internet te, Smart phone te pen mite in khantohna leh amau sumbawl paaibawl na in a zat laitak in Zomite in vedio etna, kihona ciang bek in na zang thei phot uh in, Facebook leh Viber cihte ah kitot kiselna leh mi gensiatna in zong hun tampi sum tampi a beilawh na om veve hi. Naupang te in motor no khat a ngah ciangin deihlua pakta lua ahih manin zan ciangin a luppih liang bangin Zomite te zong sun leh zan in phone en in buai thei mahmah uh hi. Tua in a hun manpha teng beisak a a kisam bangin a zi a ta a pasal a nu a pa ten a kinzo nawnlo uh a, tua hangin innkuan sung kizopna nupa kal kizopna, pawlpi sung kizopna leh, lawm leh gual kizopna ah tampi tak na kiamsuk sak zo mawk hi.

Khantawn aa neihzawh dingin a ngaihsut khakloh motor hoih nono, inn hoih nono te neizo uh ahih manin amau leh amau hi kisa kha in kiphat sakna lungsim na lut thei zel a, tua in khat leh khat kizopna kisia sak in a diakin innlam aa om innkuanpih khuapih tuipih te tawh kizopna ah na nawngkai khop thei mahmah hi. (Mangkangte, Minam dangte in hih bang dinmun a tungna dingun kum 400-500 bang hun bei in hanciam in a lawhtak uh ahih manin, neih leh lamh huahna sum le pai, pilna tuamtuam te a neih uh hangin kipilsak selo ki phasak selo in picing takin a om thei uh na hi hi).

A khankhiatna Zogam leh Zomite, Kawlgam mite peuh hai sa pianpian zawng a sa mahmah zong na om thei zanzan ta hi. A nun lui uh a mangngilh ta honpi khat na omta a, inn lam aa aom a nu leh pa te zong a ci ziauziau a ut bangin a tai ziauziau ngam zong na om ta hi. A tunna gam mite ngeina hoihlo tampi mah zong na ki lawh veve uh hi. Getn; khangno te in kum 18 cing khin leh nu leh pate thu mang nuam nawn phalo cih dante, numei pasal kiteng nailo aa ut bangbang in omkhopna te, biakna thu-upna thupi sak lo in amau pilna le a theihna te thupitsakna, pau leh ham minam leh ngeina cihte a thupitsak lohna cih dan in ngeina hoihlo tampi tak mah zong khangthak Zomite tungah na kizel man veve hi.

Mite’n Koici Kantan Uh

Kum 2000 val sung bang mundang gamdang ah pemta in a om den Jews minam te in a minam a ngeina, a biakna uh khahsuah hetlo in kem cip zo uh hi. AD 70 kum in a ki thehthang uh pen AD 1948kum ciangin a pupa te pianna gam leh leitang tungah Israel gam thak khat phut kik zo petpet uh hi. Hih bangin a hihtheih zawhna uh pen, a innkuan sung mah ah a neutung pan in kipan tah ngiat uh hi. A minam uh a itna leh a veina ding, a pau a ham a biakna a mangngilh loh na ding, thumna citak in nasep hanciam na ding cih bangin a innkuan sung pan in hoihtak in kipan tah ngiat uh hi. A nuntakna ah a neih uh pilna le a neih leh lamhte khempeuh pen amau innkuan amau aa ding bek hilo in, a mipih a sapih te’ phattuamna khat peuhpeuh a piakhia a sem khia zo ngiat ahih nangin ngimna nei uh hi.

Tua bangin a kipantah innkuan pan in a khangkhia Jews khangthak te in, Israel gam a phutkik zawh na dingin leitung munkhempeuh aa om Jews mite khempeuh khut kilen in, sum nei ten sum pia, pilna a nei te in a pilna uh hawmkhia, a khangno ten a nuntakna a tha leh ngal pia khia cih bangin a mau gam leh minam aa dingin a pilna leh siamna, a neih leh lamh khempeuh zangin mapang khawm ngiat uh hi. Tua ahih manin tuni in leitung ah a zahtaakhuai gam leh minam khat in angtang huai takin ding zo ta uh hi. A gam kiphut zawh kum 70 bek kipan aa, tuni in USA khit ciangin pilna muhkhiatna ah a siampen gam khat hita hi. USA aa Silicon Valley ci-in setkhuak pilna phualpi a om mah bangin, Israel gam zong leitung ii Silicon Valley nihna in kiciamteh ta hi.

Mun dang a tung Sente zong a tuntun ah gamte ah nasep hanciam in a ngeina, pupa te bia in zahtak piakna, a lai leh a kampau uh a kepcing siamna, amau minam te khat leh khat kipanpih in kihuai siamna cihte na nei ngiat uh hi. Minam dangte lak ah omdan khawldan siam in, a inntek te tawh kipawl khawmthei ki khawl khawm thei diamdiam lel uh hi. A ngeina pawite thupi bawl uh a, a ngeina puante hoihtak kem cing uh hi. A tuntun gam ah a lomlom in tengin, China Town cih dan nei in khat leh khat kizom uh hi.

Zogam aa Zomite, Mun khampeuh aa om Zomite

1) Mihing te in a kham theihloh leitung gamte khuahun kikhelna hangin leitung kiu li aa aom Zomite khempeuh in zong a teel ding uh lampi nih bek om hi. A tuntun na gamte ii pau leh ngeina teh ah kidiah cip in, Zomite ngeina, pau leh ham, leh biakna te awlmawh lo in taisan ding zaw maw? Tua hi lel tu zawh kum 30 sungin gamdang a tung masa a nu a pa te a sih khit ciangin a khangthak te hun ah minam mangthang khat suak ziau ding uh hi. Minam neu leh a tawmzaw te pen a mangthang baihzaw mah hi in,tuasung ah Zogam teng , gamdang mun tuamtuam aa teng Zomite zong a kihelkha ahihna phawkhuai hi.

2) Jews te , Sente bang mah in, Zomi Nu le Pa te in a innkuan sung uh hoihtak makaih aa, a zi a tate a makaih siam ding uh pen a thupi penpen ahi hi. A tate un na khangkhiatna Zogam, Pupa luahna Zogam a it a phawk theihna dingin ki gengen ki hilhhilh ding thupi ding hi. Zo ngeina Zolai Zopau te siamsak in a pau setset theih nangin kipat-tah ding thupi ding hi. Bangmah lo dinmun pan in tuni tan ciang dong a lamsang a biak Pasian uh mangngilh lo in, a nuntakna vuah a thupi pen in a koih den theih nangin nu le pa te in a tate hoihtak in a pattah ding vaipuak lian mahmah nei uh hi.

Tua bangin a tuntun na gam leh lei ah hanciam in, tua gam ah mipil misiam milian zalian te suak in, a tunna gam ah kumpi nangawn a ngah zawh na dingin inntek lungsim nei in a hancaim na dingun nu leh pa te in a tate a hilh den ding thupi mahmah ding hi. Gamdang mundang panin Zogam ah a ciah uh ciangin ahi zongin, Gamdang mi suakin Zogam ah hawh in a pilna a theihna te a hawpsawn theih hun ciangin itna taktawh a kipia zo mite ahih na dingun hoihtak in kigen khol in a ki pattah kolh loh phamawh uh hi. Zogam Kawlgam ah ciah in, a theih uh pilna leh siamna tuamtuamte, a neih uh a thatang te zangin it sitlo in a hawp khiat ziahziah theih hun a tun ni ciangin Zogam hong pallun ding hi.

3) Zogam Zolei aa a om Zomi mimal kim in zong, a tate uh hoihtak pantah in, minam tawmzaw ahih zenzen hangun Kawlgam a phutkhia minam pite ahihna phawkden in awm-pho sa in a om dinguh thupi ding hi. Mimal tha tawh, Kawlgam ah mun leh za ngah zolo ding uh a, ahih hangin pilna ciimna thuman leh cihtakna tawh a ma uh nawt zo bek ding uh hi. Kawlgam ah mihau pente, University ah Professor vive, zato khempeuh ah Siavuan pi vive, la leh music a siam vive, pilna tuamtuam ah zong amakai a madawk vive a hih theihna dingin, a innkuan sung mah panin hoihtak kipantah ngiat in, nu leh pa in nakpi takin a hanciam ding uh kisam ding hi. Tua hi keileh amau zong mi a tam zaw tham te lak ah a beimang khak ding uh pen lauhuai mahmah hi. Kawlzang, Kawlte lak aa a teng Zomi nu leh pa te in zong a tate uh Zopau Zolai mah siamdak tangttangh in, Zogam Zomi itna mah a na gengen ding uh thupi mahmah ding hi.

4) Zogam aa om Zomi khempeuh, Kawlzang aa om Zomi khempeuh, Gamdang mun tuamtuam aa om Zomi khempeuh in, u nau khat minam khat a hihna bulphuh in gambup minam bup hoihna ding masuan zaw in, mimal vai beh leh phung vai, pawlpi kipawlna tuamtuam leh gamvai party vai ciang tawh ki tawngtawng lo in, a golzaw a zaizaw gam leh minam itna lam ah a kalsuan khoploh uh phamawh ta hi. Zogam a om, Zanggam om, gamdang aa om te cih bangin a kipil sak zaw a ki teisak zaw, a ki siamsak saw, a ki inntek sak zaw omlo in, a lianpi ngimna te nei khawm in khut khat tawi khe khat khai bangin mapang khawm liailiai in mual suah khop hun mahmah ta hi.

Nu leh pa cihna mun ah ah nam 3 in kikhen thei ding a 1) pianna nu leh pate 2)biakna upna lam ah nu leh pate, pilna simna sinna lam ah nu le pate leh 3) gam makai pawlpi makai minam makai nu leh pa khempeuh pen a tungah Nu leh Pa cihna sungah a kihel uh ahi hi. Tua ahihmanin hih Nu leh Pa khempeuh te in, na tate tungah ki itna ki lemna a piangsak thei ding thute bek hilh in nei un. Gam leh minam itna ah a dik taktak thuman taktak, hun saupi aa dingin khualna tawh na hilh na pattah ding uh a hi hi. Neih leh lamh a nei, pilna siamna a nei Nu le pa te in zong, na neih na lamh uh na Zomi pih na tate aa dingin itsit hetlo in na piakkhiat, na zat khaitna ding hun mahmah ta hi. Tua bangin leitung bup aa om Zomite khempeuh in khut kilen in a kalsuan nak leh Zogam Zomi sung bek bek hilo in Kawlgam bup a khel zo ding, a hon khia zo dingin, a makaih zo ding Zomite a hi taktak ding uh hi. Lungdam, Khup Lian Thang

Reference:

• Zomi in Diaspora, Rev. Dr. Jm Ngul Kha Pau
• Homo Sepians, A Brief History of Humandkind, Yuval Noah Harari