Kuala Lumpur khuasung nasepna khatah leitoset Excavator in nasemkhat denglum

Kuala Lumpur khuasung nasepna khatah leitoset Excavator in nasemkhat denglum

Malaysia gamsung Construction Site khatah leitoset “Excavator” te khatin nasem mikhat denglum cih NST pan kiza hi. Kuala Lumpur, Bukit Bandaraya sung Jalan Kapas lampitung aom Construction Site khatah tuni nitaklam in thupiang ahihi.

Hih Excavator in nasem mikhat adenlupkha ahih manin nitaklam 4:52pm hunpawl in kokiang ah hongki zaksak hi ci’n Kuala Lumpur Fire and Rescue Department director Khirudin Drahman in genkhia hi.

Tua denlup athuak nasempa pen amin Tan Kok Ming kici a, kum 31 aphakhin khat ahihi. Amahpen Kuala Lumpur sung Jalan Puchong ah ateengkhat kici hi.

Leitawhna setpi Excavator in limdengkhak mahmah ahih manin, tuapa pen aphual mahah sipah hi ci’n Hospital Personnel te’n genkhia uhhi.

Tusungteng Malaysia gamsung aom Construction Site te ah tuahsiatna Accident kinawhzak simtham hi.

Nung Friday ni in Penang aom Construction Site khatah Myanmar gammi khat Wire khau akhih laitak in angawng ah kivialkha in agawlgui zuttak cimawk hi. Alu leh apumpi kikhenkhia leulau “Decapitated” ciliang hi.

Zanhal Sunday ni inzong Kuala Lumpur khuasung aom Construction Site khatah innkilamsan laitak atunglampan pawlkhat kiasuk in, anuai ah nasem gamdangmi 3 dengkha ahih manin zato kipuak cih kiza hi. ZD Sawltak #zomidaily