Australia, New South Wales ah gamsung meikang huaisia mahmah
Australia, New South Wales State sungah gamsung meikanggawp in, khuahun satluatna leh huihmutna tawh meikang huaisia semsem ahih manin Australian Authorities te’n khuasung mite ki hepkhiatding thupia uh cih News Agencies pan kiza hi. Tuni Sunday sunkim hunpawl in Rural Area mun 5 ah “Emergency Warnings” kipiata cihi.
Aki hemkhiathei te gamlapi ah ki hepkhiatding a, belhbuk omna te zonding leh ki hepkhiat nading aomnawnlo, a awkcip te’nzong gampa tamna te pelhin kikepding ki zasak hi. New South Wales State mun 86 bangah gammeikang nasia mahmah ahih manin, meiphelhding in Firefighters mi 2000 val kuankhia uhhi.
Tualak ah mi tampi pen meiphelh Firefighters taktak hilo a, ahuhngiat dingin Volunteers in akuankhia uh ahihi. Meikat phadiakna mun 86 lakah mun 38 tepen meikuang huaisialua ahih manin ki phelhsiang zonailo hi.
2009 February khasung inzong Australia, Victoria State sungah gammeikang Bushfire nasia mahmah a, Bushfire lakah ahuaisiapen in kiciamteh hi. 07 February 2009, Saturday ni in thupiang ahih manin, “Black Saturday” ci’n ki ciamteh a, tuahunlai in mi 173 in sihlawh hi.
Tulaitak gamsung meikangzong nasia mahmah in, khuahun satmahmah laitaktawh kituak ahih manin kumpi thunei te’n 2009 “Black Saturday” sangin lauhuaizaw cimawk uhhi.
State’s Rural Fire Chief khat ahi Shane Fitzsimmons ii genkhiatna ah New South Wales State ii tangthu sungah meikang tawh kisai in tuahsiat mahmah nikhat himawk hi ci’n genkhia hi. Meikuang pen manlang mahmah in khuasung mite omna inn, lobuk te leh setvan te kangtum ziahziah cihi.
Mun pawlkhat ah khua lumlua mahmah in, khuahun lumna Temperature pen 45 Degrees Celsius ciliang hi. Khuahun satmahmah kawmkal ah keucihtak in keucip a, Australia’s Desert Centre lampan in huihhatpi in hatsawnsawn hi. Mun pawlkhat ah huihhatna naikhatin 75 kilometer (75 kph) himawk a, tua thahatna tawh gamsung meikuang te mutphei ahih manin, meikuangpen thahatsak semsem lailai hi.
Asi aliam pen bangmah aki zaknailoh hangin, meiphelh in abuai mahmah Firefighters te ahihleh khualumluatna leh meikuanglak ah nasepna hangin thuaklah mahmah cih kiza hi. ZD Sawltak #zomidaily
Comment piaknop aomleh...