Naupang le thawlhawm (baby and empty bottle)

Naupang le thawlhawm (baby and empty bottle)

Naupangno khat a inn sungah kimawl in a om laitak a mai ah thawl khat mu hi. Tua thawl laidal tawh kituam a hihmanin thawl sungah bangom hiam cih tua naupang in theilo hi. A muhloh hangin naupangin a sungah cikhum om dinghi ci in ngaihsun hi.

Naupang in cikhum duh mahmah ahihmanin tua thawllam manawh in hong kitalpheiphei hi. Pai theilo pipi hanciamtak in hong paipai hi. A sangna ah om a hihmanin banpak zo hetlo hi. Tuk zel aa thokik zek hi.

Sawt simsim ta aa a hizongin la theilo hi. A lakzawh ciangin zong a sungah bangmah omlo takpi hi. Na sem nu in hih thupiang a muh ciangin hehpihhuai sakawm, pakta kawm in thawlsung a khuaizu nesak hi.

Tua naupangno tawh mihingte i kibang hi. Thawlhawm pen zingciang etsakna hi. Zingciang sungah bangteng omhiam cih kua mah in i thei kei hi. Tua thawlsung ah i ut bangbang i koih thei hi. Ih lungsim sungaa i koih (lametna) in hong sawnto ding a hihi.

Tua thawlsungah cikhum, bawngnawi, sathau, a hizongin khuaizu a hizongin om ding hi ci in i ngaihsun thei hi. A hoih a ngaihsun te lawp semsem dingaa a hoihlo a ngaihsun te a omna mah ah om tawntung ding hi.

Naupangin tua thawl sungah a duhpenpen koih hi. Lametna lianpi nei hi. A lakzawh madong khawlsawmlo hi. Zingciang sungah nang bang teng koih na hiam? Zingciang sungah hauhna om theilua hi. Leiba pan suahtakna om thei hi. Innkuan sung damna thak om thei hi. Lawm le gual hoih tampi om thei hi.

Tua thawlsungah bang om cih mukhol lo i hihmanin tuni lungkia lo ding hihang. Lungsim thakhauhsak ding hihang. I puk leh thokik ding hihang. Lametna tawh kalsuan ding hi hang. Naupang in a matha tawh a lakzawhloh hangin huhna ngah hi.

Lametna leh upna tawh i hih theihzah in mainawt photphot ding hihang. I lametna leh i upna in nalianpi hong piangsak ding hi. Galdona pen Pasian hiaa galzawhna ei te tungah hong pia ding hi.

Zingciang a hi thawlhawm sung pan in nang a’ ding a lim mahmah bawngnawi le khuaizu hong luang ding hi. Siamsin Library