Na hun na bangci zat sawm? ~ Rev. Lian Za Tuang

Na hun na bangci zat sawm? ~ Rev. Lian Za Tuang

Chris’ sungah kong it sanggamte, Ih lungdampawi le X’mas innzepnateng kivui khin ta-a kumthak sung i lut khin ta hi. Tu kum sung na hun na bangci zat sawm hiam?

Mi kimin nikhat nai 24 sung i nei teka a hihhang khangkhat sung i hun neih zah kikim lo-in zong i thei khol kei hi. Ngimna thupi nei ta leeng zong Topa’ seh ni teh lei pan kipaikhia ding a hi hi. Tua ih hunte i zat dan zui-in manpha-a ih nuntakna hong kilamdang sak ding hi. Bangmahin i zat kei leh khiatna/ man neilo-in mawk bei dinga ih kum a cin hang khantohna om lo ding hi. Ni khat nai 24 i hun neihzah kikim napi’n a manphatna kikim lo hi.

Zogam Lalpu in Zomite minthan ding a deih luat manin ” Minthang kei mawk ni” cih la a phuah phot zawzen bangin Zomite’n hunzat siam ding i deih luat manin Zomite hunzat dan le namdangte hunzat dan kilamdannate kei muhna ciang ka gen nuam hi.

I. Monywa pan Phakan kikal-a Kawl khuano mite hunzat dan

Kawl zi nei ka pano omna Monywa ah ka om sungin a zi tanau lamte tawh Phakan dong van tuamtuam zuakin kumkhat val bang ka oma Kawlte hun hawmthawh dan ka mu hi. Zingsang khuavak ma-in bawngleng tawh lokuan uha sun nisat teh ciahin innsung, niliim nuai-ah nasem uhi. Khangno nasem theite zong thobaihin nek theih tuamtuam tui tungah gunkuang tawh zuak uha nisan teh ciah kikin niliim nuai-ah a zing cianga ding kigingkhol uhi. Sangkahten zong zingsang a laite en kik, sim kikin, sangtuah teh a nu a pate nasep huhin nitak annek khit teh laisim kipan uhi.

II. EI ZOMI LOKHOTE HUNZAT DAN

Zingsang numeite tho baihin anhuan, vaimim su, tuitawi cihte a hih khit u teh pasalte annek hun khawng teh tho pan uhi. Numeiten zingvaiteng a mankhit uh teh an kine-a nisan khit teh lo kikuan panin nitak nai 3,4 teh kiciah nuam pah sawnsawn hi. Ih nasep hun tatak pen nai 5,6 kiim bek hi zen hi. Sangkahte annek hun teh tho pana, sang hong thuah teh zong koi lam tung cih kithei lo-in a gilkial uh teh hong ciah kik pan thei zen uhi.

Sangkah lo khangnote sakol tawh khualzin-in a sumte uh a pate ap lo-in khangno mahmah ngaihsut kicing nailo khat in a mau deih bangin sum hong zeka, tua sum hang mah tawh a’ pa’ innsungah thu hong neih nop pah teh innsung nuam nawnlo-in amau’ nuntakna mahmah zongah khantohna om theilo-in khangno tampi takin siatlawh hi.

III. LOKHAWH LOHNA MUNA OM ZOMITE

A. Tedim

Tedim khua sungah tuhun teh nuntak haksat luat manin nasep neite le a zinkhia zo
loteng bek ki-om-a nidang bangin ansai, niangtui saite ah kimawkkhawl deda cihte le
lamdunga zukham kilen, kitom cihte tawm ta hi.

B. Tamu

Tamu pen India gam Moreh tawh gamgi ahihna hang le Kawlte tamna hang a hi tam,
Tamu lama om Zomiten nasem sa ing.

C. Kawlpi

Zingsang zii (market) pai dingte thobaiha hong tun teh anhuanin innkuanpih dangten an min ngakkawmin niangphan, niangtui dawn, tadensa (news) simin annek khit nasep maban nei ki-om lo ahih manin phekap, thaikap le sun thapai vakthapna tawh i hunte i bei sak zen hi. Khangno pawl khatkhat bang ni tampi mi in ah tamin ciah lo thei lai uhi. Ih kiim i pama om Kawlte pen khuavak ma-in vanzuak ding kuan khin uha bawngleng ging ngiatngiat pen i lupna tung pan i mangzak lai hi. Kawl khangnote mahin haksapi mahin sum zong uha a ngah sunsun uh tawh lamdung khawngah nektheih dawntheih zuakin a hunte uh mawk bei sak hetlo uh hi.

D. Yangon

Zingsang zii (market) paite hong tungin anhuan uhi. A dangteng anmin ngakkawm mahin niangtui dawn, tadensa (news) sim zin le leeng tawh omkhawm cih bangin ki oma annek khit teh nasep maban nei ki-om lo zel ahih manin Zozum ci-in lamgei singkung nuai-ah hun bei sakna peuhin kikhawl ngeingai lela, annek hun ding teh kiciah pan hi. Nitak annek khit teh TV en-in kilumhak sim zawzen hi.

Zin gina lo pawlkhatte bang inntekte lup khitah ciah pan thei lai-a an na kisiah kei leh khasia thei lai hi. Gamdanga om i innkuanpih khat peuh thalawh sa ngakin ki-om ngeingai lela ei le ei a din zawh ding kingaihsun lo-in hong kikhak bangbangin kine bei pahpah hi. Tua manin Yangon-ah Zomi tampi tak ih om hangin mawtaw nei kitawm mahmah lai hi.

Khualam pan khangno pawlkhat passport siau ding ci-in ih tanaute inn ah a lomlomin kitunga pawlkhatte siau khin ta leh a kum a kha-in tamin inntekten a hul a, a kham ding pen ei om sung a tui in dawn uhi. Inntek pawlkhatte bangin a cih na- ding uh theilo-in kiciah sak uha u le nau sung kitheihkhialhna nangawn om thei lai hi. Zomi khempeuh hi ci khin ka cihna hi lo a hih manin kitel siam ni.

Guai aw, gamdang kei muhna ciangciangah ei Zomite bang lianga hunmawk bei sak ka mu kei hi. India gam, Bangalore, Tamil Nadu le Karala State sunga om khua tuamtuamte ah ka sangkah sungin ka zinkawikawi-a ei lam danin niangtui sai, an sai, lamdung le mi inn khawnga kihawha hun mawk bei sak mu ngei lo hing. Sangkah, zumkah le vai nei a, khuasung vak khempeuh zong dampai dildel cih ka mu ngei kei-a, nikhat sungin na tampi a sep zawh nading bek uh ngaihsun-in, a hunte manpha takin zangh den uh hi.

US. ah zong ei mi a tam zaw-in sen ansai, shusi sai le company te ah kisemin company a semten nai 8 sung hi-a tua lote nai 11 sung bang kisem hi. Sen ansai-a semte le company a semte’n nipi khatin tawlngakni nei uha shusi semten tawlngakni nei lo lai uhi. Inn lama omten lai hong khak zel un hong cih uh hangin a hun kinei ngiat lo hi.

Mangkangte ngiat zong nikhat nai 8 nasem uha inn a om u teh zong mawk om ngeilo uh ahih manin mangkang lawmte kiangah ih hawh nop leh a hun kingen khol hi, tua lo pi-in ih hawh leh ka hun hong guk sak ken cih tawh hong mukhial lai ding uha a nasep maban uh khawlin hong tutpih tuan lo ding uh ahih manin bakmai tawh kiciah kik lel ding hi.

Ih hunte hoihtak gelin zek le hang, nasep theih hunsung pen tom kisa mahmaha Joshua bangin ih thungetna hong kidawng ding hi leh ni le kha aw, hong ngak lai un, ih cih nop hun tam mahmah hi. Tupna gelna neilo pi-in ih nuntak teh ih hunte sau kisa in ih nuntakna nangawn kicimtak thei hi. Hun thupi sima ih zatsiamna in hun hong pia Pasian zahtakna zong ahi hi.

Sanggam aw, gamdang bangin ih gamah company tuamtuamte om lo-in nasep kimu zo lo hi. Tua manin na innma, na loma ding, na zi, na ta vak nading, na maban dingte lungkhamin na om kha hiam???

Na lunghimawhna khempeuh pan hong gumkhia nuamin Pasian in hong ngak hi. Na hun zat dante nakpi tak kisit pha in la, mawk bei sak nawn kei in. Tu kum pen a tuam vilvel-in Pasian’ kammal LSTho simna le thungetna tawh na nuntakna na pan in, Pasian in maban limci hong nei sak ding hi. Pasian pen sehnel gamkeu suangtaak lak pan nuntakna tui a phulkhia sak Pa hi.

Amah tawh na nuntakna na pat nak leh gungei-a kisuan singkung bangin na tehte no den dinga a hunhunin na gah den ding hi. Ama’ thu LSTho in nang aadingin lam hong lak meivak hi dinga na nuntakna hong kilamdang sak tatak ding hi. Topa’n thupha hong pia ta hen. Itna le deihsakna tak tawh; Sya Lian Za Tuang