Bang hang in “Zomi” kici ih hi hiam ~ Rev. Vung En Thang

• ‘Zo’ cih kammal a khiatna gen na:
• Zo (High Tone): Gualzo:Win; A gualzo te or a zo te: Winner or Winners.
• Zo (Middle Tone): Khuadam den na mun: Climatic Cold Place.
• Zo (Middle Tone): Mun-saang or Mual-saang na mun: Altitude High Place.
• Zo (Middle Tone): Siim or Pawi-siim : Participation in a Ceremonial Event. “Na nau in Ton-khuang kaai-ee
• ‘Hon Zo Aw’ ‘Hon Zo Aw”! Na nau ‘Tong” ding ahih man-in, ‘hong siim in’ cih na hi.
• Zo (Middle Tone): Kammal dang khat tawh kigawm in, khiatna nei mindang khat kisuak sak hi: Zotaang (Zo
• Taang); Zo Khua; Zo Tung, Zo Phei.
• Zo (Low Tone): Kammal dang khat tawh kigawm in, khiatna a nei mindang khat kisuak sak hi: Zozaam (Zo
• Zaam) Zomi te deih mahmah paak namkhat hi.

“ZOMI” ih kicih ciangin, hih a tung-a, ‘Zo” aki ci kammal ii khiatna te khat peuhpeuh la-a, “ZOMI” a kici ihi kei hi.

Khuadam den na mun: (Climatic Cold Place) ah om ihih man-in “Zomi” a kici ihi kei hi:
Mi tampi te in, hih pen naklak mahmah uh hi. A taktak in Khuadam Na Mun aa om ih hih man-a, Zomi a kici ihi het kei hi. Russia mi, Norway mi cih bang te Khuadam mahmah na gam ah a om uh hangin, Khuadam gam mi or Zomi kici thei tuan lo hi. Khuahun tawh minam min kivawh lo hi.

Mun-saang or Mual-saang na mun: (Altitude High Place) ah om ihih man-in “Zomi” a kici ihi kei hi:
A tung-a, ih gen sa mah bangin, mual leh guam mintam in minam min ki vawh khol-lo hi.

Minam min pen Mihingte’ tangthu pan mah in kivawh zaw hi (Anthropological Impact):
“ZOMI” a kici te mihing ihi hi. ZOMI te’ thu ih cih ciangin, Zomi a kici leitung mihing ‘group’ khat te’ thu (ZOMI Anthropology) cih na ahi hi. Mihing te’ thu sinna (Anthropology) a ki et ciangin, tua mite’ kipat khiat na, a omna uh mun tuam-tuam gam tuam-tuam, a ngeina uh, a khantoh dan uh a tuam-tuam te cih bang ki en in ki ngaihsun in ki sin hi. ZOMI Anthropology ih et leh zong tua bang mah in ih et hong kul ding hi.

Israel mi nam sawm le nih te a vek un Israel mi (Israelites/Israelis) kici hi. Tua minam min pen apu uh Jacob: Pasian in amin kheel sak in, Israel ci-a, minthak a piak na pan-a, a ngah uh minam min ahi hi. Pu Israel ii suan le khak minam te cihna ahi hi. Tua ahih manin hih “ISRAEL” aki ci minam min pen mihing takpi ahi ‘Israel” ii thu (Anthropological Impact) pan-a, hong piang minam min ahi hi.

Zomi te leivui pan-a, piangtawm ihi kei-a, singhawm suanghawm sung pan-a, piang zong ihi kei hi. Mihing takpi mah ahi ihpu ihpa te’ khang pan-a, piang suksuk Zomi aki cite ihi hi. Mihing takpi mah ihih man in, ih kipat khiat na ih Pupi (Progenitor) khat a om takpi ding mah ahi hi. Tua ih ‘Progenitor’ pa ii suan le khaak te mah ih kicih hong kul hi. Tua ahih man-in, hih “ZOMI” a kici minam min pen ‘Anthropological Impact’ pan-a, ih ngah, a hong piang minam min ahi hi.

Zomi te in Lai (written language) neilo ih hih manin, ih taangthu ki ciamteh lo in, ih kipat khiat na taktak ki theilo mah hi. Ahih hangin tua cibang ciamteh na a omloh na hang bek tawh, ih piancil na ih Pupi khat (Progenitor) omlo ding hi cih theih lian nading thu om tuanlo hi.

Zomi te in ih tangthu Lai tawh (Written Form) ciamteh na ih neihloh hangin, ihpu ihpa te’ khang pan-a, a ki gen suksuk (Legendary Form) tawh ih nei hi.

Tuhun ciangin Zomi te in Lai neita leh Lai thei ta ih hih man in, ih tangthu te genteh na in: Beh tangthu; Khua tangthu cihbang; Laibu in tampi ihnei khin ta hi. Ih ‘Legendary’ te pen ih ‘History’ dinga ih lakloh hong pha mawh hi. Tua pan-in, ani akha (Date) te nangawn a ki zongkik thei ding ahi hi. Hih ih tangthu te ih et ciangin, ‘Legendary’ pan vi-ve aa ih ngah ahih hangin, ih kipat khiat na Ciimnuai pan bek hi nawnlo in “Pre-Ciimnuai Era” akici ding hun gamla pi dong hong mu kik sak uh hi. Ciimnuai ciang pen limtak in ki ciamteh theilai ahih man in, “Ciimnuai-a, sa kibaak Geeltui ah ki thuk” ci-in, na ki ciam teh na ki gen hi. Ahih hang in, “ZOMI” ci-a, ih kilawh hun pen a ki ngaihsun kik zo nawnlo ih ‘Legendary’ te in a neihloh uh hun sawtpi pek pan hikhin ahih man-in, Zomi mipil masa te in, “We called ourselves ‘ZOMI’ from time immemorial” cih ciangin, nagen uh hi.

Tua ahih man in “ZO” cih kam-mal in khiatna tampi a neih hangin, “ZOMI” ci-a minam min khat tawh ih kilawh na pen ih Pupi (Progenitor) khat pan-a, hong piang ahih kei leh, “Zomi Anthropological Impact” pan-a, ihngah minam min ahi hi. Khat vei genkik leeng: “ZOMI” cih ciangin Khuahun (Climate) gen na hilo, Mual-saang (High Altitude) gen na hilo in, “ZOMI” a kici mihing honkhat te’ thu gen-na (ZOMI Anthropology) ahi hi. “Zo” ahih kei leh “Zomi” ih cih pen mihing taktak mah hi-a, ama suan leh khak te khempeuh “ZOMI” a ki ci ihi hi. Banghun lai pan-a, kipan aki ci ih hi hiam cih pen ki theikik zo nawnlo hi.

Tua ahih man-in, “ZOMI” a kici ih minam min pen, koi mah dang pan-a, ihngah hilo in, “ZOMI Anthropological Impact” pan-a, ih ngah minam min ahi hi.

“ZOMI” Ih Phuah-Tawm hilo hi:

“ZOMI” kici minam min khat ih ngah khiatna mun leh hun ih theih loh hangin, ih ‘Phuah-Tawm’ hilo hi. Lai (Written Language) neilo ihih man-a, ki ciamteh lo cih bek hi-in, hunkhat lai-a, aki phuak-tawm cih bang hi lo hi. Genteh na in, Ciimnuai ah ih om hun sunga, ihphuah tawm cih bang hilo hi. Bang hang hiam cih leh hih pen ‘ZOMI Anthropology’ ahi hi. Tua ahih man-in, hih pen a kipat khiatna ‘Pa’, Mun leh Hun a om takpi ding mah na hi-a, tua ZOMI te Leimai-tang ah khat a om lai teng hih min bei ngeilo ding hi. Hih minam min leh hih minam a bei leh zong, tuni in Leitung in ZOMI a kici minam theikhin ahih man in, Leitung in ciamteh na nei toto lai ding hi. Hun khat lai-a, a ki phuaktawm khat ahih leh zong, tua a phuak te a deih te a sih khit uh ciangin, min’ na deih nawnlo lel ding-a, na bei khin lel ding hi. Tuni, tuhun a ZOMI min akip lai na pen, tuni-a, te zong tua ‘Progenitor’ pa’ suan leh khaak si-khat sa-khat min lawh na kibang suksuk te ih hih man ahi hi.

“ZOMI” ihcih pen ‘Anthropological Impact’ pan-a, ihngah hi kei mawk leh:

“ZOMI” ihcih pen mihing tangthu khat hikei hen la, Khuadam hi cihna peuh, Mual-saang khat hi cihna peuh hi mawk leh; “Zomi” deih ten-tan a, ih sihpih ngam zaw zen nang’ bangmah thu omlo hi. “ZOMI” ih “defend’ nading thu bang mah omlo hi. ZOMI ihcih ngakngak pen hong thupi hetlo lel ding hi.
“ZOMI” ihcih pen mihing tangthu hi-in, ih Pupi (Progenitor) pan-a, ih ngah hikei mawk leh “Chin” mah kici lel lehang, Kawlgam sunga om Zomi te’ aading bangin, hoih mahmah zaw ding leh nuam mahmah zaw ding hi.
Ih pian khiatna ih Pupi khat a om teek-teek zong kul tuan kei ZOMI kici ih hih man-a, ZOMI hihang cih bang ciang bek ahih leh zong, tuni in ZOMI ih deih hangin, ih deih loh ni khat hong tun’ teh tua ZOMI abei ong hi lel ding hi. Sawt a kimang hetlo ding gimna leh buai na ong hi lel ding hi.

“ZOMI” ihcih pen “ZOMI Anthropological Impact” pan-a, ih ngah ahih man in:

Hih minam min pen nang leh kei tawh ‘direct’ in ih kisai hi.

ZOMI ci-a, hong kisap kei leh ih ‘National Identity’ a maanlo den ahi hi.

“ZOMI” ci-a, hong kisap loh pen a ‘na’ mahmah leh a kisum mahmah ahi hi. Mi namdang a suak denkeei hi hang cihna ahi hi.

Mindang hong kipia khempeuh beisak a, “ZOMI” ih hinsak kik ding, ih bulh kik ding (Re-instate) kisam hi.

Mun khempeuh hun khempeuh ah ZOMI hing’ ih kicih ngam takpi kul ding hi. Ih zumpih hetloh ding kisam hi..

“ZOMI” nakpi tak gum in ih humbit (Defend) ding kisam hi.

“ZOMI” a kici ih minam min pen ih laigelh na khempeuh ah humbit ding hi hang! Ih thugen na khempeuh ah humbit ding hi hang! Ih kipawl na khempeuh ah humbit ding hi hang! Akhang akhang in hih tawntung ding hang-a, a theilo te hilh tawntung ding hi hang!

Theih ding-a, kilawm pawl khat:

Mi pawlkhat te in ZOMI a deihloh na pen ZOMI cih thu in amau’ ‘society’ sung ah‘influence’ lua ding ‘dominate’ lua ding cih lau uh hi.

Mi pawlkhat te in amau’ meetzawk na ding, amau’ ham phat zawk nading bek uh ngaih sun uh ahih man in, ‘ZOMI’ kici ngamlo kici nuamlo uh hi.

Mi pawlkhat in ZOMI neu ngaihsut uh in, adang te khempeuh thupi ngaihsut zaw kha mawk uh hi. A taktak in

Pasian in ZOMI te, leitung a om minam khempeuh tawh a kibang, a kikim a hong bawl hi. Ei zong han ciam leeng, mite sangin, niam zaw tuanlo hi hang!

ZOMI a kici teng mah thudang khempeuh ah kitawng-tawng, kiseel-seel hi ta le hang, ZOMI ih hih na leh ZOMI thu ah nakpi tak in ki-it kingai in ki sihpih ngam zah dongin ih ki pumkhat mah mah ding kisam hi

Zomi abawl Pasian hi. Pasian ih itna hangin, “ZOMI” mah kici den ding hi hang! Ih biak Pasian in Abawlsa ZOMI te thupha hong pia tawntung ta hen!

Rev. Vung En Thang