Tulaai leitung Thuthang Tuamtuam Updates August 18, 2014

Tulaai leitung Thuthang Tuamtuam Updates August 18, 2014

· USA gam Missouri state Ferguson khuapi sung August 8 ni Talvom no vangu khat palikten anakaap lupna pan Mivom atamzaw ateenna Fergusan khua leh St Louis te ah mipi lungphona nasia tektek ahihman in gamsung cing gaalkaap National Guards te mipi cingcip himah leh mipi khawltuanlo in August 18, 2014 ni in nasiatak in buaibeh laai uhhi. Mipi in lungkimlohna bek alak hilo in nasemlo liang in kitom in saiteng banluh mawk uhhi. Hihthu thulian asuahkhaakding launa tawh White House pan August 20 niciang Ferguson khuapi ah Attorney General Eric Holder thukanding in vazin ding in President Obama in sawl hi.

· US gamsung ah zato 206 anei ahi Community cidamna pawlpi te I thusimkepna computer huihlak guta ten August 18, 2014 ni in nabuluh sak uha, cina te min, suahni , teenna leh social security number vekpi kigawm 4.5 million kigukhia ci in taangkokhia uhhi. Zomi te zong kihel kha ngel ding ihihman thungetna ah ap tek ni.

· Hollywood Limtaang kineih siam minthang mahmah Jackie Chan I tapa Jaycee Chan kum 31 leh Taiwan gam limtang kineihsiam minthang mahmah Kai Ko kum 23 te August 15 nizan in Beijing khuapi sung Mr Chan I inn ah Kanza kham in aomlaai tak un kiman hi ci in Beijing palik te in August 18, 2014 ni in taangkokhia uhhi.

· Saudi gamte kumpipa neihsa mawtaw khat French gam Paris khuapi pan Le Bourget vanleeng tual manawh a apai laaitak thautawi mi 8 in lamkaal ah August 17 nizan in naman uha, $330,000 sumtang laaksak in amawtaw haltum sak uhhi ci in Paris palikten August 18, 2014 ni in genkhia uhhi. Atung atuang mite ahihleh khah kik uh cihi.

· Israel leh Palestine te in ni 5 sung kilemding in athukimna uh August 18, 2014 zankim 12:00pm in beilian a, langnih kihona tawh kizui in tunipan nai 24 sung khanto laaiding in thukimna nei uhhi. Ahizong in Israel Prime Minister Benjamin Netanyahu in Hamas te ongkhut khiat kik ngeingei uhleh mi 2,016 khakhat sung in akigawh saang anazaw in kigawikikding ci in August 18, 2014 ni in genkhia hi. Tuaciang kidona sung ah Palestine 2,016 si Israel mi 66 si uhhi.

· Topan ithu ngetna te ongdawn gin Iraq gam khunglam a Islamic migilo ten Christian mite abawlsiat ban uha Khua tampi tak do in a ukcipna pan khuapi lianpeen ahi Mosul Dam khuapi migilo te khutsung pan Iraq gaalkaap te leh Kurdish gaalkaap te kipawl in lakikzo hi ci in President Obama August 18, 2014 ni in genkhia hi. US ten atung pan beltung nasiatak khiatziahziah uha, Kurd leh Iraq gaalkaap te anuai ah misi nahal pheiziahziah uh ci hi. Atuam in Pope Francis in zong biakna vaai a minamtawm tetung ah hibang a IS te gamtatna hoihlo hi cih UN zong athukimding leh avaangkhuamding kilawm ci in August 18, 2014 ni in genkhia hi.

· Kawlgam sung a khamtheih guihthei maiming sak a aciinna leitang te mahmah zong kiciantak a kankhiat ding in UNODC kici UN khutnuai a khamthei guihtheih saipawl leh Kawlgam kumpi te kum 4 sung naseemkhawm ding in August 18, 2014 ni in Nypidaw ah thukimna suaikaai khawm uhhi. Tonzang khuakiim a bengciingte min, akhua, amun, aman leh Tamu kuam a teng kiciangtak a akanthei I om leh UN ah suakta tak in kipuak giahgiah theita a bankhih ziahziah ding hita hi.

· Mualtung thautawi ta haitawi ahi NCCT, Kawlkumpi tanu ahi UWPC leh Party 34 te August 18, 2014 ni in Yangon khuapi sung aom kilemna innpi ah kimuhkhopna khat nei uha, Zomi party panzong vakihel uhhi. Athu paizia bel man naailo tuulsui acihdan hiphot kibuai nenua ci in meeting kahkhat pa in genkhia hi.

August 16 ni in Mualtung mi party kipawlna UNA Zomi party akihel leh 8888 te kimuhna tuamkhat neikhin uha, Kawlgambup kilemna thautawi teng amankhit ciang gamvaai kikupzia ding thupaaipi 8888 leh UNA ahampi khat gelhkhiading in thukimna nei uhhi. UNFC –NCCT tebel kawlkumpi tawh kilemna ngahmah leh bangseemding cih abuai mahmah uh na higige hi. Lungdam lai ongsimsak kheempeuh tung ah. Thang Khawm Pau ZOMi