Tulaai Leitung Thuthang Tuamtuam Updates April 9, 2015

· Yemen gam tualgaal hang in April 8,2015 ni in mi 22 si a tampi tak liam uhhi. Saudi Arabia makaihna tawh Arab gamte in Iran te tawsawn ahi Houthi tapongte leh Shia Muslim tapong te phualpi teng nahtang-um khiat khawlnuamlo uh ahihman Iran President Hassan Rouhani Suadi leh apawlte kidawm mahmah unmaw ci in April 9, 2015 ni in vau ek hi. Akizom mah in Iran gamten Houthi leh Shia Tapongte ahuhna tawh kisai khawlding maw khawllo ding ci in US Secretary of State Mr John Kerry in navau giap leuleu hi. Muhnop toto laai mahmahding hi. Yemen gam buai kipat March 19 nipan tuniciang mi 643 sita a, 2,226 aliamban ah 10,000 bang in inn le lo nusia zantaai uh ci in Leitung cidamna lam encilpawl ahi WHO te taangkokhia uhhi. March kha sungmah in zong hi Hauthi leh Shia tapongten Yemen President Abdrabbuh Mansour Hadi unmang uh ahihman in tu in Saudi ah abuk laaitak ahihi.BBC

· Egypt gamhuamlam North Sinai mualtung ah IS migilo te in khua sung Mortar thaupi tawh April 9, 2015 ni in kap ek uh ahihman in khuasungmi 11 leh Egypt palik 2 si uhhi. IS ten thautang ahoih hiam ci a kasinna pak uhhi ci in Media tetung ah nakisial sawnsawn uhhi.BBC

· Nungkumsawn 2013 April kha a USA gam Boston khuapi sung akibawl ahi Marathon taaikidemna mun ah Bomb puakkham sak te lak ah asilo Dzhokhar Tsatnaev kum 21 mawhna namsawm tung ah khial hi ci in Massachusetts thukhenpi te in April 9, 2015 ni in mukhia uhhi. Hih mawhna namsawm thum te lak ah atamzaw peen thahna ding vive hi a tamveipi thah kuulding ahihman in koicihding ci in thukhen te a buaisaan laaitak uh ahihi. Aman bel US te kathuhilh na hi ciziau bilbel hi. A bomb puahkhap saklaai un mi 3 si a mi 260 liam uhhi.CNN

· Piantit gam ah thuthang taangko ahaatkhia mahmah khat ah ahi TV5 te i Computer khual sung teng IS migilo te April 8,2015 ni-in toksiatsak dikdek uha, bangmah kisuaksak theinawnlo ci in April 9, 2015 ni in thunei te in taangkhia uhhi. VOA

· Kachin gam Phakant Suang eng kitawhna khuk April 9, 2015 ni in kicim ahihman in mihing 10 dum in veknelh ci in Uital kumpi lamte in gen uhhi. Ahizong in khuasung mite genna ah dum in avuk taktak mi 40 vaal uhhi ci in gen uhhi. VOA

· Kokang leh Kawlgaalkaap te kikaap na nasiatak in zomto zel uha April 9, 2015 ni in kimuhnop phadiak ci in thuthang te in gen uhhi. Kokang pawlpi MNDAA te Secretary pa U Tun Myint Lin zong Kawlgamlaak Tan Swe leh apawlten Gamsung Gampua thu apuak kawikawi nahang in matding in April 5,2015 ni in taangkokhia in leizon pah uhhi. U Tun Myint Lin peen Kokang makaaipipa maakpa 5 na ahihi.VOA

· President Obama leh Leitung Gamlian 6 makaaipi te Iran Nuclear tawh kisai kihona ah thukimna hoih kingah ci in a ot baba laaitak un, Iran Supreme Makaaipi Ayatollah Ali Khamenei in Leitung in Iran onggaakna ongkhahkhiat mateng uh Nuclear vaai kihona te akipa hinailo ci in April 9, 2015 ni in genkhia hi. US Senator (Republican) Tom Cotton in anawngkaai laaiding uhleh Iran I Nuclear munteng US gaalkaap ten Bomb khiat suk mengmeng leeng vaaisiang baih peen ding ci in April 9, 2015 ni in gengiap hi. Hih peen Israel Prime Minister Bejamin Netanyahu leh US Senator atamzaw utna hi a Obama leh apawlten bel diksa lo uhhi.BBC

Lungdam zel

Khialh na aom khak aleh ngaihdam bawm ah maw

Thang Khawm Pauzomi

—
Thang Khawm Pau ZOMi
Bowling Green , Kentucky
USA