Tulai Pawlpi pawlkhat te buaina – II

Tulai Pawlpi pawlkhat te buaina – II

Pawlpi Minvai: Lai Siangtho thuciamlui lai-in Hebrew kamin Qahal cih na zangh uha, ei pau in Pasian mi or Pasian tel Israel te acih nopna hi, aci zong om hi. Thuciam thak ah Greek kamin Ekelisia cih na zanga, a kisamkhia, a kitel tuamte cih danin a khiazong om hi. Mangkamin Assembly, Church cih bang dan a tuamtuam in na khia uh hi. Khanglam aom Zomite’n Pawlpi cih kammal zangin saklam aom Zomi te’n Saptuam cih bang danin na zangh uha, I deihna I cihnop aki bang ahi hi. Church cih kammal hong zangkhia masa pen I Topa Zeisu hikha ding hi. Bang min bangmin na vawh zongin Church(Pawlpi) cih kammal na zat leh na nu, napa, na pi, napute pianma pek-in I Topa Zeisu in na zanghkhin cih phawk in. A min na suklaih na tolaih hang na lungsim leh Pawlpi paidan Lai Siangtho tawh aki tuahkei leh Pasian thu tawh kituak a, a kalsuan nuamte’n hong taisan ngamlua lel ding uh hi.

Pawlpi kei phuhsa hi: I Topa Zeisu in I will build my Church (Matt 16: 18) naci ahih manin Pawlpi phuankhia, pankhia masa pen I Topa Zeisu hi-a, Singlamteh tawh na kipsak hi. Pasian mizat MN.Thomas in tua thu na nak tellua ahih manin “The Church without the cross is a social organization”(singlamteh tawh aki phutlo Pawlpi pen leitung ki pawlna hilel hi), naci hi. Tua ban-ah The blood of the Martyr’s are the seed of the Church (misiangthote sisan in pawlpi piankhiatna ding khaici hi) nacilai hi. Tua hina pi’n hih Pawlpi keima phuhsa hi, koma patkhiat hi, no zanmah mi hilel uhteh, noma thu hong kimang kenteh kei thu bekmah thu cining, hong mangnuamlote taikhia lel hen, dawi pawlpi asuah kei nak uh leh phamawh sakeng ci-a, Pawlpi a makaih ngam sia, upa pawlkhat Zomi sungah ki omta zen hi. Lai Siangtho limtak simlo, Pasian zahtaklo, Sang limtak kahlo uha, MN Thomas gen danin Pawlpi pen leitung ki pawlna, panmun ngahna, mi ukna, gilpi ading ngaihsutna peuhin a zang, mi pawlkhat om uh hi. Tuaci bang munte ah Pasian thu leh Lai Siangtho tawh limtak a kalsuan nuamte’ aom khak leh tua ki pawlna paikhiatsan ngam lua uh hi. Iplah lolua uh hi. Thupi salo lua uh hi. Hici bang dan a kizatna mun Pawlpi peuhmah I Topa Zeisu innteklo ahih manin cihmah hunin nuamngeilo hi.

Fellowship leh Group tello : Fellowship cih ciangin khat le khat ki thuah khopna, thu-um mite khat le khat ki thuah khopna, ki pawlkhopna hi-a, nungzuipi masate ki khawlkhopna mun-ah hih kammal na zangh uh hi( Sawltak 2: 42). A deihna atel te’n lai limtak a simte’n milak khawngah ko Pawlpi ci-in genngam, zanghngam khollo uh hi. Hih sang a, a suukzaw khat omlai a, Group or connect group ahi hi. Namdang Pawlpi a belhbomte, amau hun-awng kal-a kikhawm pakte a sapna uh hi-a, laitam simlo, bangmah thunung thuma a ngahsunthei mello te’n milak ah ko Pawlpi, ko Zomi Pawlpi cih kammal zangh ngam uh hi. A belh uh Pawlpi makai Pastor te mai-ah lah Pawlpi a, ading zonai hikei ung, ci-in, Zomi bangmah atel nailote lak-ah lah Pawlpi khat in hong sanguh hi, ci-in mipi hong khem uh hi. A nunguh a zuinuamlote, a thu uh a manglote Zomi itlo, minam itlo ciziau lel uh hi. Pawlpi kician khat in a thuneu penin register, letter head, bylaw etc, nei hamtang uha, tua bang a neilote a pumtung leh a inndim in Zomi leh Pasian min a gelh zongin bel vetken kisiik ngeiloding hiteh. Hici bang mite Zomi min leh Pasian azuak, a daisuak uh hilel hi. Sum le pai, huhna themkhat ngahna hang lel tawh na minam leh na Pasian zuakngei kei in. Hici bang mite makaihna ki pawlna buai pel mawh hi. Fellowship hoihlo cih nopna hilo in a ut banga paipihte hoihlo a cinuam I hi hi.

Makai utluat man hi: Lai Siangtho sunga Pasian mizat, makai dinga a telte pawlkhat bang in theikhol peuhmahlo, pawlkhat bang lah utlolua kisa nialnialta leh nialzoloi uh hi. Moses bangin nial cih tak-in a nial hangin nialzolo hi(Pai 3:5-12). David bang lah tuucing in gampalak ah aom laitak hi-in theikhol peuhmahlo hi. Tua hita leh Pasian in na zangh teitei, na tel teitei hi.Tua ahih manin biakna makai ding peuhmah sia hita leh upa hita leh a utlua, a semnuamlua a, mi pawlkhat adap mai etet, Mee a dap zonzon peuhmah zatvetlo ding thupi hi. Tuaci bang mite in Pawlpi hong buaisak nuam thei uh hi.

Pasian nasem biakna makaite simmawh hang hi: Uziah kumpi pa’n siampi 80 a tuhsawm manin a taltangah phaknatna om hi( II Khang 26:18-22). Siampi Eli ta te’n Siampi nasep a simmawh manun galsungah sikhin uh hi( I Sam 2:12-35;3:12-14). Elisha lukolhpa ci-a, a zahko naupangte Pasian in naupang hi, cituanlo in Vompi nih in balzan hi(II Kum 2: 23-24). Moses leh Aron pen Korah leh a pawl te’n a lang pan manun mihing 14700 leihawm in valhtum hi(Gam 16:1-50). Tuhun nangawn ah Pasian nasem taktak Pastor te leh UPa, biakna makaite a langpan’ a gensiasiate Pawlpisung, innkuansung nuntakna na enlecin na enhetlo tampi na omding hi. Sum le pai inn le lo a neihkhaphial zongun a tate, bangci nuntak, Kha lam-ah, pilna sianna ah, zi le ta vai ah a tuahpha hetlo Zomi sungah tampi omkhin hi. Hong kisim mawh leh hong ki nuainet leh thukse kei-in. Pasian in nangtang in akhauhzaw in thukdinga, ama uh a nuntakna uh khimzing mahmah, bing mahmah ding hi. Kumpi Sual in Pasian nasem kamsangte a bawlsiatteh a tungah lunggimna tungsemsem in a gamsung buai semsem hi.

A Theihhuai Thu Pawlkhat:

1. Pawlpi buaina a daihtuamna dingin: Khanglui lai in khua khat peuh asat uhteh, hausa sem ding, siampi semding, siik sekding, tuilam asai ding cih bang dan a tuamtuam in na kikhen dimdiam uha, tuaci bang omna khuate, khua kician in kiciam teh hi. Tuamah bangin Pawlpi khat I din sawmteh Lai Siangtho limtak simphot in kei Pasian in bang talen hong pia, ka lawmte bang talen pia cih tel photding thupi hi. I vekpi in upa I sepnop, I vekpi in sia I sepnop mawk a, a nakhem peuh I sainop detke mawk leh bel kuamah tawh kipawl vetlo a eikia tangding vetleng minam cidam na pikhat leh mi dangte tawh ki lemna pikhat hikha ding hi.
2. Pawlpi khat peuh, ki pawlna khat peuh ah nalut dingteh: Pasian thu tawh a kalsuan nuamta ding leh minam itta dingin Pawlpi khatpeuh na lut dingteh bang hiam, atup a ngimna uh, bang cidan hiam, a kalsuan dan uh cih dongtel masa, kantel masa inla muhtheih in a laitawh hong lah theih uha, tua na lungkimpih leh lut panin. Tua lopi amau kamsiam leh tanau meltheih vaikhawng tawh nalut miau mawk leh na kisik peuhmah ding hi. Hun neihteh aban zomzel ni.

Khaibawi