Tuizang Cialpi ~ Sia Do Khup

Tuizang Cialpi ~ Sia Do Khup

Rev. Dr. Cin Ngaih Lian in inn phualzang dong sikin hong sam hi. Mi 20 ka pai thei uh a, Cycle vive tawh nuam zaizai mahmah hi.

A TUAM PIAN DEUHNA

Tuizang khua a Christian-te pen dawibia (Lawki) pan a Christian suak thak ngen uh ahi hi. Tapidaw gamh a luahsuk mawkmawkte hilo hi. Pasian kammal sangsiam thei mahmah uh hi.

Kum 40 gual Pa Lam Cin in “Ka neu lai un Biakinn ah kikhawm leng ka pa in sutpi khuam ah hong khihin hong sat” ci-in Christian suah ding a haksatna thu gen hi.

Ph.D PIANGTHAK PASTOR

Pawlpi kem Siapa in Khanlawhna a om ding deih lua ahih manin a pawlpi mite hanthawn den hi. Cialpi hun sungin pawlpi bup leh Gospelte Vok golpi khat gawhin ankuang lui ngiat hi. Ph.D Pastor dang ten zong a pawlpi mite pianthak ding hihzahta-in a deihsak ciat mah tam maw? Cih ka lungngai kha zel hi.

Zingsang, Sun, Nitak hun thum kizang den a, hun bawl simin khanlawhna piang den hi. Thu hong ngetsakte sum leh pai tawh hong huhte khempeuh tungah lungdamna lianpi kong ko uh hi.

DAWI VEI KHAT IN DAMNA NGAH

Nungak no khat sungah dawi lut ahih manin kongkaw thei zel hi. A tut hun ciangin a kiang a omte khawng phuai gawp cilphih gawp thei hi.

A tut laitakin hong kisam a Gospel ten dawi hawlkhiatna kinei hi. Biakinn ah zong thungetna kineihsak den hi. Topa in damna pia ahih manin tawp nitakin Pasian phatna lasa-in pulpit ah hong ding ta hi. Hih lai ka gelh laitakin a u in “Ka nau in ‘Siate zui nuam ing’ ci hiven a ki-ngah diam?” Ci-in hong hopih ta hi. Haleluiah.

“D K” TANGTHU

Pawlpite lungdam lua uh ahih manin pawlpi khawi, Sialpi khat hong pia uh a, Sial-long tungah ka min “D K” na gelh uh hi. 1995 kumin biakinn khatah thugen ding hong kikhawlsak kik ngei a, kei tangin Rev. Job Thawngno in zang hi.

A thupatna ah “Sia Do Khup min pen DK hi a, tulaitakin ‘DK = Deih Khang’ a cihna suak hi. A sawt loin ‘DK = Deih Kik’ a cihna suak ding hi” ci-in mipi nuisak zaizai ngei hi.

Tuni dong ka nuntakna ah “Deih Khang” panin “Deih Kik” a suak thu tampi om a, thuakzawhna bel kisam den hi. Maisakna leh thuakzawhna tawh Pasian nasemte i kalsuan nak leh kisiatna pawl kikhenna cih omlo ding hi.

CYCLE HAWL LOH SAWT TA LEH

Cycle hawl loh a kum sawmin hong sawt a, leite sang mahmah lampi ken mahmah ahih manin pasal topi “Lau ing” a kici nuamlo bek ahi hi. Khe tawh pai hun, Cycle tawh pai hun, mawtaw tawh pai hun, hun thum lapin Topa in hong zang ahih manin Pasian hehpihna ka phat hi.

Zogam ah vanleng tawh Gospel pai hun dong thahat a ka om nadingin thu ka ngen hi. Topa tung leh Khitui Gospel tha hong pia khempeuh tungah lungdamna lianpi kong ko uh hi. Lungdamna lianpi tawh; Evan. Langh Do Khup (Khuata mipa)