Lungdambawl Thu laigil – 13
Dai dide! Zan siangtho: Hih la pen mangla Silent Night! Holy Night pan-a eipau in I lekkhiat kik ahi hi. Lungdambawl langaih mahmah khat hi-a, Lungdambawl dawnni nitak in lasiam mahmah te’n a awkim tawh hongsa le-uh I lungsim hong vut mahmah hi.Ei pau in hong lekkhiate zong thupi kasa hi.
A phuakpa pen Joseph Mohr hi-a Salzburg, Australia ah suak hi. A la awkaih bawl pen Franz Xavier hi-a, a masa in Stille Nacht! Heilige Nacht! hi-in manglai(English) tawh John F Young in na lekkhia hi. Hih la phuakpa Joseph Mohr pen Oberndorf ah Pastor asep laitak 1818 kum lungdambawl(Christmas) ading Dec 24 nitak in la khat gelh hi. A lawmpa Franz in Organ tawh a la-aw bulhsak hi. Tualai tak a Organ thakhat thu in hong siavat mawk hi. Tulai pau leh satan cih ding himailo dia. Pawlkhat te’n la I phuahteh lampaikawm khawng,I lupkawmkhawng or I ommuan hunkhat peuhin ngaihsun tawmin tua khitteh gelhkhia in a-aw I bulh hi. A hih hangin tua hunlai in la aphuah uhteh Organ, Pianno, khawng hahzat deuh uha, tuate tawh laphuak kawm, a-aw bulhkawm uh hih tuak hi. Franz a Organ kisia in dah mahmah-in aom laitak biak-inn ah githa(guitar) khat naom bilbel a tuatawh a la-aw bulh in a banzom hi. Tuaci bang haksatna kawmkal panin hih la hong piangkhia hi.
Organ siabawl theipa in tua Organ a-sia abawl khitteh Organ tawh tum a, ngaihsalua mahmah ahih manin a la ngenin a khua-uah ciahpih in lukhu phanpa tanu li te’n biak-inn ah sa uh hi. A zakha khempeuh lungsim vut in ngaihsalua peuhmah uh ahih manin a sawtlo in leitungbup ah hong kizel hi. Hih la in mi tampi lungsim lawngin khatha, taksatha nosuah sak hi. Mi tampi khel hi. Hong piankhiat na a phuakpa mahmah zong mi tampite a dingin Pastor hoih khat in kigenlai ahih manin a sepnate ah Pasian in ompih mahmah cih hong phawksak hi.
Dai Dide! Zan Siangtho hun laitak in Pasian in na lamdang tuamtuam bawlthei zel a, tua hunlaitak mahin zong I gumpa Zeisu hong suak dan mahin I lungsim hong omsak hi. Egypt gam aom Israel mite zong zan hun mahin Pasian in na honkhia hi(Pai 12:42). Pasian in Kamsang Samuel asap zong zanhun mah ahi hi(I Sam 23:2). Jacob in minthak Israel min a ngahna zong zanhun pan mahin hong kipan ahi hi. Peter Thong innsung panin Pasian in a hotkhiat hun zong zankim mah ahi hi(Sawl 12:6). Sawltak Paul leh Silas te’n zong zankimpi mah in Thong inn sungah Pasian minphat in aom uh leh Thongkong khakte kihong in suakta uh hi(Sawl 16:20-25). Thong inn cingpate innkuan pianthak lawh in zanpi mahin ki tuiphum uh hi. Pasian in Zeisu a leitungpa Josef zong galtai dingin a hopih hun zong zanhun mah ahi hi. I gennopna ah mihingte bek hilo Pasian in zanhun in zankimpi in na lamdang nalianpipi bawllua, semlua hi, aci nuam I hi hi.
Dai Dide! Zan Siangtho la pen ni 21/12/14 Sunday ni nitak ka omna uh inn tawh a kinai Hills Song te tawh a kizom Life House Church Pawlpite te’n a biak-inn uah lungdambawl dawnna la tawh nasia tak-in bawl uh hi. A founder nu in hongs am-a, ko innkuan leh Brisbane pan-a hong hawh UPa Pau Muan tawh ka vapai uh hi. Tua hun-ah lasiam nupila naupai khat makai in hih la hongsa uh hi A siamdan leh I lungsim hong lawn dan bel kam a genzawh hilo cih huailiang hi. Music tum te pen a lead lam tawh kisai mi 3 in hong zut-un ah khatpa in a veilam tawh tum in Kawlgam a minthang pen Iron cross te sangin nasiazaw kasa hi.
Tualo la dang asak uh langaih ka phawklai pawlkhat a tomin en pakleng, Oh! We applause your coming Savoir, Christ has come to save us, Prince of peace came as a child, fill the earth with your glory, fill the earth with your love, my soul magnifies the Lord, bring life to the dark broken world, when Christ born on night driven, Mary nodded Par-ra-Pum-Pum-Pum I have no gift to bring, Par-ra Pum-Pum-Pum shall I play for you on my drum, I played my best for Him, sleep in heavenly peace, heavenly sing host Hallelui-ah Christ Savoir is born. Hih la te pen eilam asiam te’n hong lekkhia kik uh henla kisa lungdambawl kuanteh kisa leh khangthak te’n nuamsa mahmah ding, a lungsim uh zo mahmah ding late in ka ngaihsun hi. Dai Dide! Zan Siangtho hun laitak in Zeisu hong suak in Pasian in na lamdang tuamtuam a bawlmah bangin I lungsim dai dide in siangtho sak-in I biak Pasian I lungsim pia-in, I lungsim kongkhak honin hong it dan, hong khual dan ngaihsun zel dihni. Lungdambawl thupha naang le na innkuan tungah hong tungta hen. Hun neihteh aban zomlai ni.
Khaibawi
Comment piaknop aomleh...