Indonesia ah Muslim tekhat amin “Merry Christmas” kiphuak

Indonesia ah Muslim tekhat amin “Merry Christmas” kiphuak

Indonesia gamah pasalkhat Christmas nilian in suak ahih manin, aminpen “Merry Christmas” kiphuak cih Jakarta Post pan kiza hi. Tua Merry Christmas minneipa pen East Java, Malang Regency sungah teeng a, tu in ahihleh kum 54 bang phata hi.

Amahpen 25 December 1962 kumin suak a, Christmas nilian in suak ahih manin, Manglai in “Merry Christmas” cihtawh akibang “Slamet Hari Natal” cihmin anuleh apa te’n apiaktaktak ahihlam amahngit in genkhia hi.

“Slamet Hari Natal” cihpen kamin taktak mahhi ci’n amah ii ID Card leh Family Card lakkhia ngiatin Tuesday ni in Reporter tetung ah genkhia hi. Ataktak in “Selamat Hari Natal” ci’n akigelhding hizaw a, ahi zongin kopen Javanese kahih manin, “Slamet” ci’n akigelh hi ci’n genbeh hi.

Ama genna ah asuahlaitak in East Java aom nausuak siama Midwife te innah asuak kahihi cihi. Tua Midwife asemnu pen Christian hi a, Christmas nilian in asuak ahih manin “Merry Christmas” ci’n amin phuak un ci’n Midwife nu in ngaihsutpia cihi. Anu leh apa pen Muslim ahih zenzen uhhangin Midwife nu cihdan amauzong hoihsa uh ahih manin, “Merry Christmas” tawh akhiatna akibang ahi “Slamet Hari Natal” cih min apuak uh ahihi.

Related: Kawlgam in Indonesia ah buhtang kumsim Ton 500,000 zuakding ~ ZD

Indonesian Christmas Greeting gelhdan taktak hileh “Selamat Hari Natal” cihding hizaw a, ahi zongin amaupen Javanese te ahih manin, “Slamet” tawh akigelh cihi. Tuaban ah “Slamet” cihpen Javanese te minah akihelzel khat hi a, bitna om “Safe” cih khiatnazong anei ahihi. Muslim kahih hangin Christian tawh kisai min kanei a, hih kamin vai zong kaveng kapam te’n hong gensia seselo uhhi cihi. ZD Sawltak #zomidaily