Tuicin Tun Nawn Loh Nading A Lim (Sign or Symbol)
Sakhituihup maw? Guahthal?
Zomi te in Sakhituihup cipong ve hangin, Mangkang te’n guahthal (Rainbow) na ci se uh hi. Tua guahthal pen tuicin a tun kik nawn loh nading limin Pasian in na zang hi. A zat mah bangin tuicin tung sak zo guah a zuk leh a kap khia lianlian ding guahthal bang keek khatin kimu veva se mah hi. Khangluite’ Zo saili a cih tawh kibang. Tua sakhituihup kici vantung lam ngatin a kikeek to guahthal ih muh sialsial-in tui bangzah ta-in a khang zongin tuicin taktak tunna tawh leitung kisusia kik nawn lo ding Pasian’ thuciamna ahih lam ong phawk sak hi.
Thuciamna (Covenant)
Pasian’ thuciamna in Pasian pen nuntakna khempeuh ah vai a hawm Pa ahihna lak hi (8:20-22). A piang nakhempeuh Pasian’ ciam kholhsa ahihna thu a tangtunna ah kilang mahmah hi. Pasian in thuciamna a bawl ciangin mipi adingin tangmi khat zang tawntung hi. Gentehna Mawhna tawh kisai ah ih tangmi pen Adam hi a, Dikna tawh kisai ah ih tangmi pen Jesuh Khrih ahi hi. Pasian in tangmi Noah tung ah a thuciamna guahthal lim pen mikhempeuh le nuntakna nei singkung lopa ganhing khempeuh in tuicin suksiatna a thuak kik nawn loh nading hi sak pah hi. Thuciamna pen lang nih kikal bek ah kibawl thei hi. Ahi zongin Pasian’ bawl thuciamna pen leitung mite bawl thuciamna tawh kibang lo hi. Pasian in thuciam a bawl ciangin mihingte ong kuppih hi loin ama’ hoih sak bangin thu ong ciam a, tua tungtawnin piang sak, kip sak, nungta sakin tangtung sak hi. Pasian’ thuciam, Pasian’ kamciam muan huai hi.
Tuicin tun nawn loh nading a lim (Sign or Symbol)
Covenant pen thuciamna kici a, sign (or symbol) pen thuciamna-lim (ahkl) “alim” ci lehang kitel pen hi. Thuciamna-lim tuamtuam Pasian in zang thei hi. Abraham tawh vunat thuciamna (ch.17), Sinai mual ah Israel te tawh Sabbath thuciamna (Paikhiatna 31: 12-17), Noah tungtang ah guahthal (rainbow sign) thuciamna-lim cihte ong zang hi (Piancilna 9: 13).
Pasian’ zat thuciamna-limte pen a ciam hun ciangin a pian sak tawm saan hi pan lo hi. A om khin, a piansak khitsa nate mah a zang hi a, tua thu pen a khamuan huai zaw ahi hi. Banghang hiam cih leh a omsa khat a manthan kik ding pen a up huai lo hi zawa, a om ngei nai lo khat ong om tawm pak zual ding pen a muanhuai lo zaw ahi hi. Sakhituihup pen Noah tuicin zawh pan ahong piang tawm pan hi loin, piancil a kipan a na om gige khinsa hi zaw hi. Pasian in a thuciam a kip nading le a ki-up a kimuan nadingin a omsa sakhituihup (guahthal) lim pen Noah tungtawnin a thuciamna-lim dingin a zatnop hun ah ahong zang na hi zaw hi.
Tuicin tun ma-in Sakhituihup tawh thuciamna cih bang om ngei nai lo hi. Ahi zongin sakhituihup?guahthal? bel a om khin ahi hi. Tuicin tun khit teh tua sakhituihup pen tuicin tun ngei nawnloh nadingin Pasian in a thuciamna –lim dingin ahong zang ahi hi. A omsa tua sakhituihup pen leitung bei dong omom dinga, tua a omom ding sakhituihup pen thuciamna-lim dingin Pasian in a zat ngamna pen tuicin hong tung kik nawn lo takpi ding ahih zawhna thu hi pah hi. Pasian in a omsa thu khat, leitung bei mateng, a mangthang nawn lo ding na khat tawh thuciamna bawl ngam cih thu pen muanhuai mahmahna thuguipi khat ahi hi.
Tua hi a, Pasian in a thuciamna pen a omsa a kimu thei lim khat peuhpeuh tawh kip sak tawntung hi. Gentehna, tuicin tun nawn loh nadingin piancil lai pek panin a na omsa guahthal lim zatna, Khrih in ahong thuciamna pen a omom sa hai (cup) tawh kipsakna lim cih bangin zang hi. Pasian in thu a ciam ciangin lim khat peuhpeuh zanga, tua lim sungah a hoihna, a thukipna le a cihtak a muanhuaina hong mu sak hi. Guah zu meiikai ciangin vantung ah sakhituihup ih muh simin tuicin hong tung kik ngei nawn lo ding ahihna lim hong mumu sak ahi hi.suangdal
Nekkhawm ciangin zong hai la-in, khomun zong la-a, a cih pen a lim genna hi a, tua phawkna a lim pen a taktak hong suak hi lo hi. Ahi zongin a taktak ahong um ahong mu sak tua Pasian’ zat limte pen a thupi mahmah ahi hi. Tuamah bangin sakhituihup zong guahthal tawh a kibat tei hangin guahkap khia dingin Pasian in koih takpi hi cihna LStho in a genna om tuan lo hi. Lim (symbol) te pen phawk zelzel nading bek hi a, tua phawkna limte a taktak tawh na kimemat hi bek hi.
Sakhituihup pen a val a kai-in a zu ding guah a kap lianlian ding bangin vantung lam ngatin kual kiukeu a om ih muh teh guahthal lim ahi dingin ong kilawm semsem hi. Guah a zuk ciangin sakhituihup na mu zel dinga, sakhituihup na muh simin guahthal ahih lam na thei dinga, guahthal ahih lam na theih simin Pasian’ thuciamna lim hi, cih na phawk ding hi. Hih Pasian’ thuciamna-lim ahi guahthal in guah ciin-in tui a khang phial zongin leitung bup tuicin tawh kisusia ngei nawn lo ding ahihna thu tetti ong lak ahi hi. Tua tetti in leitung bup ah tuicin tung ngei takpi ahihna zong ong lak hi.
Evan. Suang Dal
Comment piaknop aomleh...