Tuhun a gualzo Nainganzi tamar (politician) nasuah nopleh

Tuhun a gualzo Nainganzi tamar (politician) nasuah nopleh

A POPULAR MAHAMH POLITIK KIKHEMDAN PAWL KHAT

Kiteelna (Election) ah gualzawhna ding

1. Kamciam khum mahmah pia in.
Mi a tam theithei i zaknop ding le lungkim ding thu vive gen in. Akician mahmah kamciam khat pia in la mipi in hong up masiah gen phapha in. (*Theih khin khian ding: Mipite nung buai ding thu hih leh zong phamawh lo, mipi buai ding hun ciang na term hi nawn lo ding)

2. Na gensiat ding, na Gal pih ding mi zong in.
Abeisa le tulaitak supna, buaina, khantoh lohna, haksatna khempeuh mipawl khat, kipawlna pawl khat mawhpua sak in. Mipi te lungso sak semsem, nang ginatlohna te hong kimu lo semsem hi ding hi. (*Na gal na cih te lian semsem, na nung zui ding tam semsem ding hi.)

3. “Nang lo in”
Leitungbup ah Nang bek minam a it pen, minam ading na a sem zo pen ding zah in kigen in. Mipi haksatna khempeuh Nang bek in a lemsak zo ding in kigen hi.

4. Pasian kium sak in.
Mipi te lungsim a zo pi pen in Pasian Thu ahi hi. Pasian a um, a thu tawh a nungta mahmah bang in mipi muh theihna zak theihna munte ah kineih in. Tua hih leh mite ii muanna leh itna a baihlam pen in na ngah thei ding hi. (*Hih thusim pen leitung tangthu akipan tuni dong zong a popular pen le a muibun pen thusim khat hi.)

Thukhupna:
Hih thu te pen Leitung mun tuamtuam a Nainganzii tamar a tamzaw te gamtat dan Mipi ten zong itheih ding deihsakna tawh kigelh hi. Kisam hi. Deihsakna lianpi tawh, Kei mah na pu, Professor Penglam/ Zingsol