Pu Thangboi (Zangkong Khuahun) thonginn pan hong suaktakhin

Pu Thangboi (Zangkong Khuahun) thonginn pan hong suaktakhin

Laisim Zomi pihte,
Abeisa hunsung in ZONET Group sungah “Zangkong Khuahun” cih thulu tawh theihhuai thuthang tuamtuam honggelhden ahi laigelhsiam minthang mahmah Pu Thangboi pen galkap kumpi te’n 2011 kumin hong matsak uh a, thonginn sungah hong kepcipsak uhhi.

Tukum February 26, 2015 ni petpet ciangin thonginn pan cidamtak in hong suakta kikthei ahih manin ih lungdam mahmah hi. Asawtlo in Pu Thangboi kiangpan in “Zangkong Khuahun” te azakik dending in ki lamen ngeungau hang! Pu Thangboi in thonginn pan hong ciahkikvai ama gelh anuai ah na simsak un. Lungdam! ZD Sawltak

Friends I am back ! ကၩန္ေတာ္ငရဲခန္းထဲ ကေနျပန္ထြက္လာပါျပီ။ လုိအပ္လာလို႔ရွိရင္ (သို႔) အေျခအေန အရပ္ရပ္က ထပ္မံေတာင္းဆို လာခဲ့ရင္ေတာ့ျပန္ဝင္ဘို႔ လုံးဝဝန္ေလးေနမွာ မဟုတ္ဘူးဆိုတာကိုလည္း တစ္ပါတည္း သက္ဆုိင္သူအားလံုးကို သိေစအပ္ပါတယ္။

Henkol taanna innpi (thong innpi) sungah ka omsung tawntung thu hong ngetsak, sum le pai tawh hong huh, mimal mahmah aa hongpai aa tha hongpia cihbang in lungdam kohding genzawh loh in om hi.

Nong huh nong panpihnate uh lungdam kong thukkik zawhna ding baih hetlo ding ahih man in Pasian in mimal kim aThupha tawh hong tuam nading in thu kangen hi.

Ka suahtak ni (Feb 26 ni) aphual mahmah ah hongdawn Pu Paupi (Rev Paul Sawm Lian Pau)+ Pi Dim Neih Lun(Sayama Sarah Lun), Pi Hau Vung, Pu Suan Lian Mang (Director of Mustard Seed Consultancy Services Company Limited), Sia Thawnglek, Pu Kim Tuang leh Pu Mun Mangte’ tung ah kalungdam cihtak in dam hi. Sia Paupi leh Pu Suan Lian Mang te’n amawtaw tuak uh hong hawlphei pah uh ahih man in lem mahmah hi. Lungdam lua ing.

Facebook tungtawn in, phone tungtawn in leh mimal mahmah innphual hong siik ngiat aa lungdam pihna honglak khempeuh tung ah zong ka lung dam mahmah hi.

2011 kum March 25 nizan in hong man uh aa 2015 kum February 26 ni teh hong khahpan uh ahih man in amau’ khutsung ah ka om kum 4 acinna ding kha 1 bek in sam hi.

Hih kum 4 sung in kawlgam nakpi in kikhel khinta ahih lam ih theitek hi.

Tu hun ciang mite in gamvai(Politics ႏုိင္ငံေရး)sepding lau nawnlo in zong septak sata hi. Nuntak zon theihna hita ahih man in a semnuam tamta hi.

Tua ahih man in hih gamvai nasepna ah asemding tamta lel ahih man in ka tawlnga phot ding hi.

A zenzen in nidang lai bang in gamvai nasep ong lauhuai kikin mat le hen thuak theina ding din mun hong tunkik aa asemngam a om nawnloh teh asemkik ding in kigingsa in ka om tawntung hi cih kongit leh kong zahtak mahmah ahi Zomite zahtakna lianpi tawh kong theisak hi.

Lungdam
Thangboi
Zangkong