Kalay University Silver Jubilee (1993 – 2018) ~ Awn Za Pau

Kalay University Silver Jubilee (1993 – 2018) ~ Awn Za Pau

Akipat cil mahmah in min dang peuhmah kiguan nai lo a, Chin College Construction Project cih min tawh 1990 -1991 (budget year) kum in Chin College sang inn ding lamh kipan ahihi. ‘Chin College Construction Project’ a cih ngiat mah bangin Sagaing Division gam sung a kilam hi peuhmah lo in, Zogam sung teng mah a kibawl Khai Kam Golf Club kici 18 holes apha golf course kibawlna sung teng linlian mah huamsak in Lay-out Master Plan kibawl ahihi.

A masa in Secretary (2) Lt. General Tin Oo makaihna leh thu piakna tawh a sem a bawl dingin Northern Star cih company min tawh Singapore a teng lawm Pau Mung (Pu Pau Za Mung) te pawl a na kipan masa uh a hihi. Nasep sem ding a kithawi san laitak uh hi a, hostel anbuk khat zong na lam khin zo uhhi. Tua kawmkal leh Secretary (1) in Minister, Ministry of Education pa kiangah, ‘College sang inn lam dingin a pua lam a, company te cial peuhmah kei un, nidang pekpek aa kumpite zat suaksuak ahi, Construction Corporation ministry khutnuai a om Public Works te mah ap zaw un’… acih ciangin a thu kikheel leuleu a, Chin College a lam dingin Kyesintaung Gold Project a Construction Division Unit (6) te tawh kilaih leuleu hi.

A lam ding Construction Corporation (CC) pan Construction Division Unit (6) te hongtun ciangin a Master Plan puahpha bawlpha kik leuleu uhhi. Nakpi tak in hoihzaw phazaw thampah hi na ci uhhi. Monthly Report ahi a, VIP te hong pai teh ahi zongin laimai masa ah thu pulak masakpi in ki-helsak den uhhi. Tua zawh a sawt lo in ka mai a EE U Ohn Kyaw pen thu tuamtuam hangin sawt vei sem manlo in, Public Works Head office ah kikhinsak in kei tawh akibilkhek linlian ka hi uhhi. Nasep ka ki-ap uh ciangin ka mai a ka kilaihpi pa’n zong anbuk khat bekmah naman siang pan hi.

Ahi zongin adang pasal hostel leh numei hostel pawlkhat lamh na pan khin uhhi. Tuahun lai a Master Plan sunga om bang a, Lecture Hall te, leh siapipa (Principal), adang siate leh lai-atte omna ding quarter khempeuh a veksek in three-storey building khat lo buang kei kum thum sung ka sep sungin (1991-1993) akimansa dildel vive ahihi. Kumpi nasep ka sep sung kum 15 sung vilvel project lian vive ka sep ka bawlna lak ah, nasep ma a liau penpenna mun ahihi.

Mihing tha akisam zahzah kingah hi. Inn lamna ding a akisam sehnel, suangsi, leisek, cement leh innsing khempeuh kicing tak in in kingah hi. Datsi, dissele kicing hi. Sum leh paai zong akisam zahzah kingah hi. Hostel khawng kilam man kha bilbel ahih manin kihampha tuam pha mahmah man cih ding ahihi. Banghang hiam cih leh nungsang ciangin koi mah peuh ah university/college sangte akilam tampi om a, hostel lamsak ding kivaihawm sak kiukeuh nawn lo mawk ta hi.

Kalay College Ah Secretary (1) Hongpai

Kawlpi vanleng tual panin mawtaw tawh S (1) General Khin Nyuntte hong pai uhhi. Hong tun uh ciangin ‘Briefing Hall’ ah ka nasep tawh kisai ka zawhsa, ka mansate ka telgen hi. A tom in gen leng ka nasep zawhna sateng zong lungkim pha mahmah bilbel hi.

Tua zawh ciangin college sang lutna ding mawtaw lampi pen a lut lam leh a paikhiat lam 14’ tuak zai ding leh a laizangah singno ahih kei leh lopa suanna ding a tawm pen 10’ bang zaisak ding cih pu-laak masa in, tua tawh kisai nasep ka kipan thei ding uh hiam.. ci’n ka dong a, kum kik teh ngaihsun ni inh lampi khat bekmah na hong phot un, leii tom nono kisapnate ah singleii na dawh phot un hong ci hi. Tua ahih manin mawtaw pai theihna ciang ding bekin lampi zing khat bek suangsi phah in ka puah uhhi.

Photo: Kalay College Sangpi Hon Pawi zawh ciang CE U Kyi Wa AE, SAE te tawh (16-2-’93)

2nd in Chief of Staff leh A Pawlte Hongpai

Tua zawh a sawt lo in 2nd in Chief of Staff Lt. General Maung Aye leh a pawlte helicopter tawh Chin College lamna mun zingsang nai 7:30AM in hongtung a, tua lakah nidang a, college lam ding a, a makaih masa Lt. General Tin Oo (Secretary -2) zong hong kihel hi. Amau hong tun ciangin ken nasep man zahzah tawh kisai ka telgen hi. Ahun ngah kisa lo in paikhia nuam pah uh a, S (2) in Tamu va pai phot nung inh tua zawh teh Kalay Town Hall ah kimukik ni hong ci hi.

Kawlpi ah department khempeuh in delhsuk ngeiingaii in zingsang 9:30AM akipan Town Hall ah ka ngak ngeiingaii uhhi. Sun anneek hunteh zong hong ciah sak ngam lo lai in a gei naii a om ansai ah an ka ne uhhi. Sun khuavak in ka ngakngak uh a nitak nai 5:00PM khawng teh Tamu pan helicopter tawh Kawlpi hongtung kik uhhi. Town Hall hong lut nawnlo in a zintunna uhah paisuak pah uhhi. Tua pan nitak an a neekkhit phitphet uhteh Town Hall hong pai pan uhhi. Zingsang nai 9:30AM a ka ngak uh nitak nai 7:45PM in hongtung pan aa, nai (10) sung vilvel a kingak niloh ahihi.

Bren-gun Tawh Hong Kap Ziahziah

Hongtun phet in kei mah hong sam masa hi. Kei zong zingsang a ka gensa teng ka genthuah nawn kei a, tukum sung sum kingah zah leh maikum ah sum bangzah kisam ding cih teng ka gen piatpiat laitakin, “Nang’ College lutna ding mawtaw lampi bawl lo ding na hiam? A bawl thei lo na hih leh, mawtaw lampi bawl thei ding nipi khat sungin hong paisak ding hi’ng!! ” hong ci giap mawk tadihdih hi.

Tua thu kammal ka zak lian leh ‘ Eih!!… E heii leh.., a hong deih het lo, hong fire hi mawk veh e ’ ci in, ka bil teng sa pah lialua in, bangmah zong ka gen thei nawn kei a, zong ka dawng nawn vet kei hi. Amah tawh hong kithuah ka PWC zumpi GM (General Manager) pa U Htun Aung lah aii mit deh bang in bangmah pau ngam peuhmah lo in dai khikhe lel mawk hi.

College lutna lampi pen Dagon University lutna kongpi lampi cia in zaisak ding, tua tawh a kibang lian kei zongin ahoih penpen a bawl ding, Dagon University lutna lampi sang ahoihna leh athupittna niam sak zaw lo hamtang ding, kha nih sung a zo ding, Dagon University hong en un la, a en dia kilawmteng District LORC (Law and Order Restoration Council) pan hong seh un ci’n limtak mah in hong vaikhak phapha hi.

Photo: Kalay College a lutna mawtaw lampi kihon madeuh Lecture Hall lam pan muhna

Kei Hong Huh Ding CO Khat

S–2 pa in kha 2 sung a, a veksek aa man khit gaih dingin vaii puak hong piak ciangin, a sing a suang leh nasem ding mi ‘labourer’ cih bang a haksat leh hong huh dingin Kawlpi khua sung aa galkap batalionte lakah a senior penpen CO (Commanding Officer) khat ahi Lt Col Min Naing a cih vaii puak a pia hi.

Amau ciah zawh ciangin ni khat sungin a pai ding teng kiseh in, Yangon mawtaw tawh ka pai ngeiingaii uhhi. Ka Head Office ah ka pute kiang ka ko pah a, amau zong Dagon University lutna lampi leh amin kigelhna kongpi arhitect te en sak in a manlang theithei design suai in ka ngah phet un, lungnuam takin Kawlpi ah ka ciahkik pah uhhi.

Dagon University Tawh Kibangsak Thei Lo Ding!

Kawlpi ka tun phet un DE (Director of Engineers) U Aung Kyaw in hong nungzuih to pah vingveng leuleu a, tua design tawh nasep na kipan nai kei un, S-1 pa lungkim lo hi. Dagon University tawh kibangin bawl thei lo ding ci hi, acih ciangin kei hong samsuk leuleu a, lampi lah kineusek zaw pah in, alutna kong khakpi lah atuam, tu a kilamsa bang linlian ahihi.

Hong thu piaksa om bang mahin kha nih sungin tua College lutna mawtaw lampi ka zo uhhi. R.C.C Slab tawh leitom nono thum kilamin ahun lapin ka zo uhhi. Alutna huang leh kongkhakpi, mawtaw lampi aciah akuan paina, a laizang ah island kibawl, lampi dung a lang leh alang aa kiphut meikhuamte leh RCC tawh kibawl leii thumte kha nih sung a kiman siang ahihi.

Hih thu tawh kisai in, Lt Colpa kiangah ahun tom mahmah ahih manin, na sepna sate sawt veipi kikhom lo ding hi. Ih leidawhte bang RC vive tawh kibawl ding hi a, a hun a kul zah piak kul ding hi, ka cih ciangin, “ A hun lap aa ih man ding thupi lel hi. Hon pawi bawl khin zo peuhpeuh leng, ih hon zawh khit limtak in huihpi in a mut paii a, tui in a taii mang zongin phamawh lo hi..” hong ci giap ta leuleu hi. Tua hong cih ciangin ‘Aw… amau a min bek mah a la nuam hi mawk mah tah a, gam mite tungah gam leh lei a dingin ‘nha’ sem pha mahmah ung ci a, kisialhna leh taangkona (propaganda) ding bek mah a, a ngaihsun hi mawk mah veh e,’ ka ci simsim hi.

College lutna kongpi leh lampi (Main Gate & Chancellor Rd. – Lampi min keima phuahsak tawm hi.) hon pawi zong (16 – 2 – 1993) ni in Mandalay pan NW Commander, Major General Hla Myint Swe leh Minister of Trade General Tun Kyi in hong neih sak napi’n, tua nasepna tawh kisai a thu genna ah pulaak khiatna lah kammal khat zong om sak het lo hi.

Minister pa’n Trade tawh kisai tawm khat hong gen pongmawk hi. Uliante kam khial ngam hetlo in kidawm peuhmah tek uh aa sip dide uhhi. A taktak Public Works pan ko pawl pen a inn lamsakte bek ka hi uh a, a nei taktak innteek a sem taktak ding ‘Higher Education Department’ pan a masa penpen principal ahi, U Than Bo leh zum nasemte (staff) ahihi. Tua college sang inn kihon kum mah in College sang naupangte laisin kum (1993-94) akipan pah ahihi.

Hih thu tawh kisai keima tuahkhak thu pen, S-1 Khin Nyunt leh S-2 Tin Oo te nih power thohna leh kidemna a hong nei uh ahihi. CE U Kyi Wa inh; U Shwe Htun Maung MD (Managing Director, Public Works ah a lian pen za hi) leh kei hong suk nopna hi zaw hi. Nang khialhna bangmah omlo hi hong ci hi. A taktak in U Kyi Wa hong genna bang ahih ban ah, ka VIP Report ah kei at hi lo aki-at ngeisasa ka zop suaksuak uh thu masa sungah, Master Plan pen a lui sang’ in a thak mah tampi takin hoih zaw hi, ka cihna uh kihel den a, tua pen S-2 pa lungkim het lo na hi lel ngeel hi.

Thu Khupna

Hih mun ah a zenzen in S-1pa leh S-2 pa ki-elngat lo hi zenzen hi leh, College sangpi lutna kongkhakpi leh a lampi pen tu a zah sang a, a zah nih a hoih zaw lian zaw tham lai ding ahihi. Tua ban ah ka nasep uh ‘Chin College Construction Project’ kici khin gegu tazuk, a min taktak a kiphuak ciangin ‘Kalay College’ hong kicih san sak ziau ta leuleu hi. Zomi sungah zong amin ding kituhtuhna tengah galkap kumpite in a lum a let in amin hong phuak ziau ahi zaw kei nam cih zong ngaihsut huai kasa hi.

A kilamna mun Zogam (Chin State), a min kipiakna khua Sagaing Division sung a om khuapi khat ahih ciangin, mai lam ah Kalaymyo pen Zomite khuapi ahi ding a, Pasian lamlahna khat ahi zaw kha kei nam maw ci in deih bawl gawp ngiingeii in kei leh kei ka kilungnuam sak zaw bungleh hi. (Hih thulu tawh kisai a khong a khia a thei nuam behte’n Ka Pian Sinthu – My Life My Memoir ah kicing takin kisim thei ding hi.)