Puchong Game sai ah buan “Rape” athuak numeinu’n Police Report bawlta

Puchong Game sai ah buan “Rape” athuak numeinu’n Police Report bawlta

Malaysia, Puchong vengsung aom Game kimawlna sai khatah pasal 2 in kihel in buan “Rape” athuak numeinu in Police Station ah Report bawlkhiata cih theStar pan kiza hi.

Tua buanthuak numeinu pen Indonesian gammi khat nahi a, kum 33 phakhinta hi. Nung Tuesday ni in District Police Headquarters ah amathu in vapai a, Police Report abawl ahihi.

Damiah te alut laitak in tuanu pen anaseppih Bangladesh gammi khatbek tawh Game sai ngak in aom laitak uhhi ci’n Serdang OCPD Asst Comm Megat Mohamad Aminuddin Megat Alias in genkhia hi.

Damiah 2 tepen Game saisung ah akimawlding bangkek in Customer kineih in lut uh a, asungah midang kuamah amuhloh uhciang in damiah taih kipan in, Cashier numeinu pen abuan uh ahihi.

Amasa in Bangladesh gammi nasempa pen temta ngak uh a, damiah taih masak uh cihi. Tuakhit ciangin Cashier asem numeinu pen kikhel in abuan uh ahihi.

Damiah te apaikhiat uhciang in nasem 2 te ii ID (Identification) leh Travel Documents teng laksak sawnsawn uhhi.

Indonesian numeinu pen bangmah akhutsung ah Travel Document neinawnlo ahih manin, akimatding patau in alawmte innkhat ah bucip cihi.

ACP Megat Mohamad Aminuddin in agenna ah tua numeinu pen Serdang Hospital ah kipuakding a, Medical Evaluation hoihtak kibawlsak dinghi ci’n genkhia hi.

Damiah ataihte lakah kum 26 aphakhin khatpa pen tulaitak Police Custody ah aki keplaitak hi a, hihpa pen abeisa inzong Klang Valley sungah damiah “Robbery” vaitawh thubuai abawl ngeisa khat cihi.

Hih mibuan akimanpa pen Kuala Selangor sungah nungkal Sunday nitaklam 5:30pm in akimankhia ahihi. Adang mibuan khatpapen tudong kimanzo nailo a, palik te’n zonsanlai uhhi.

Buaina apianna Game Outlet ahzong palik te’n sitcianna kinei a, hih Game Outlet akipatzawh khakhat valkhin dinghi ci’n ACP Megat Mohamad Aminuddin in genkhia hi.

Damiah kitaih in buaina apianpen nungkal Thursday ni hi a, tuapan in CCTV ah aki Record kha Video pen Social Media tungah aki thehthang “Viral” gawp ahihi. ZD Sawltak #zomidaily