Tuap sungah tuilut acih banghiam? ~ Hau Lun

Tuap sungah tuilut acih banghiam? ~ Hau Lun

Mihingte nuntak nading huih aki sap mah bangin ih dik huih a siantho nading Tuap cidam ding kisam hi.

Tuap pen a tung ah a tuam beh khat om hi. A sunglam, tuap tawh a ki zom pen a Sung Tuam (Visceral pleura) ki ci hi. A pua lam, nakguh tawh a ki mat pen a Pualam Tuam (Parietal pleura) ki ci hi.

A sung tuam leh a pualam tuam kikal ah tui 10-20ml kiim a om den ngeina ahi hi. Tua zah sang a tamzaw tui a vung leh tuap sungah tuilut kici ta hi. 250ml kiim tui a vung ciang Awm X-ray pan tui a vung lam ki muthei pan hi. 500ml bang tui hong dim ciang pumpi tungah noplohna tuamtuam hong ki hil pan hi.

Tuap sungah tui a lutna ahang tampi om hi. Tuap sungah tui aki khol a tui nam en-in

• 1. Tui Siang (Transudate) leh
• 2. Tui Niak (Exudative) ci-in ki khenthei hi.

Tui Siang nam pen a tamzaw in Lungtang natna, sin damlohna leh Kal damlohna hangin hong nungzuih natna hi.

Tui niak nam pen tuap sungah lungno lutna hang leh cancer hang hi thei hi.

Tuap sungah a vung tui nam ih theih nop leh zatui sutna phim tawh tawmno huupkhia in ki ensak thei hi.

Tuap sungah tui a vuung ciang pumpi tungah hong ki hilzia

• Awm na
• Bangmah semlo pi gim tansuak
• Khuh
• Khuh ciang si pai

Tuap sungah lungno a lut hangin tuap ah tui vung ahih leh a tung aa teng ban ah cisa, khuasik, ankam limlohna ki thuakbeh thei hi.

Tua bangin na pumpi tungah hong ki hil leh a manlang in a thei Siavuan te kiang ki lak pah in. Awm X-ray etna, khaksuah etna, CT, Ultrasound tawh etna cih bang a ki sam bangin hong ki bawlsak ding hi.

Tui a tawm leh phim tawh huupkhiatna, a tam leh ပိုက္ tawh zom aa a nuai pan thawl tawh dawhna cih bangin tui ki lakhia thei hi.

Cancer hangin tuap ah tui vung nam te pen tui ih huupkhiat khit hang tui dim kik pahpah nuam se hi. Tuap a tuam dalnih kikal ah Bleomycin, Tetracycline cih bang zatui sunsuk leng tuap tuam dalnih ki mat cip in tui vung thei nawnlo hi. Deihsakna tawh, HauLun Lam-etna Ref: ေမာင္ခမ္း (ေဆး ၁)