Ahun zui-in paizia kikhel toto ~ GS Pau

Ahun zui-in paizia kikhel toto ~ GS Pau

1970 kiim pawlin Zogam ah kha khanlawhna hong om ciangin upzia leh sanzia kibat nawnlohna hangin pawl kikhenna hong om kawikawi aa, upna in tanau sung hong khenkham gawp hi.

Hun khat sung teng i omna pawlpi a kibatloh manin unau khat, pata khat takpi na ngawn a kikawm nawnlo, leh lampi-ah i kituak zongin a kihopih nawn ngiatlo na ngawn ki-om mawk hi.

Pawlkhat bangin i pianna i nu i pa leh i pianpih sanggamte sangin i pawlpi kibatpih midang khat peuh kineek ngaih zaw mawk hi. Pawlpi dang-a om i tanaute a ci a lu uh a na zongin kiveh ngiatlo a, haksatna khatpeuh a tuak uh zongin kiawlmawh lua lo mawk hi.

I bangkua sungah I pawlpi thu kinei sak a, u leh naute pen leengla dan khat in kikoih dak mawk hi. Pawlkhat bangin hih dan pen piangthak vai dan khat leh Pasian in zong hong pakta dingdan khatin kingaihsun lai hi.

Ahizongin khalam ah i picin’ zawk deuh ciang leh i khuamuh zia khat hong taangzai zawk ciangin u leh nau tawh kizop kikna khat hong om thei hi.

A beisa hun khat lai-in pawlpi khat peuhah i lut ding ciangin tu a pawlpi upzia leh san’zia kikan masa phot teekteek a, ei’ upzia leh san’zia tawh a kituah leh bek, tua pawlpi ah kilut pan hi. Pawlpi sungah upzia leh san’zia kikhat teng kiom khawm ahih manin minam kim, beh namkim, pau namkim ki-om hi.

Sawltakte’ hun lai mah bangin pawlpi sungah ki-itna leh kikhualna om a, unau khat taktak mah kibang hi. Pawlpi sungah ki-itna om ahih manin thu kigen khempeuh thakingah khin pah lel a, la kisa khempeuh zong hong ngaihkhin pah lel hi. Mikhempeuh in pawlpi sung nuam kisa ciat a, kikhop ding kal bang kingaklah thei mahmah hi.

Ahi zongin kitua ci paisuak den zolo a, paizia khat hong kikhel leuleu hi. Hun khat a kipan pawlpi khatpeuh ah a kilut ciangin upzia leh san’zia cihte kithupi ngaihsun nawnlo a, a tanau vai tawh kilut zaw ta hi.

Upzia leh san’zia a thupi sak kankante bang mihai dan khat in kingaihsun phialta hi. A behbeh, a bawngbawng in pawlpi sungah ki-om hi. Pawlpi pen ei’ aituam neihsa dan khat in kingaihsun a midangte hong innteek khat ding bang kiphal phalo lai hi.

Pawlpi sungah inngua leh gamgua ki-omsak a, inngua teng i kituam et, i kituam angvan, i kituam hamphat lunglung se hi. Ei’ ngah hamphatna bang lian, midang khat in a ngah khak ding kihaza vilvel hi. Nahoih khat peuh a kisem phial zong in ei’ makaihna leh ei’ vaihawmna ahih kei nak leh kikhaktan pah lianlian hi. A thu kienlo- in, a mi vive ki-enzaw ta hi.

Ahi zongin hih dan paizia pen sawtpi hong kikhomlo ding a, mailam hun khat peuh ciangin paizia ahoih zaw khat hong piang dingin i lam en hi. GS Pau