Tualsuak gilo om nawnlo, I khuapi Tedim ah ~ Dr. Dongno

Tualsuak gilo om nawnlo, I khuapi Tedim ah ~ Dr. Dongno

Ref: A CITE TUNG TU Pau Za Mung Hih Ref. Thulu’ deihna pen Tedim Tualsuak pawlkhatte-in hun khat lai-in Phalamte “Sialam” acihna agau thuak ihih manin Tedim gamin kamsiat lawh hi ci aa ‘tamlawhna’ hi ci-in ka mu hi. Adah, atamlote i hehnep ngeina ahih mah bangin hehnepna ka gen nuam hi.

Amasa-in Tedim Tualsuak, (‘tualsuak’ hi lo, ‘T’ agol tawh) definition i theih ding thupi hi.

Tedim : Tedim khua 1889 kumin Mangkangte-in ong hal uh aa Zomi khempeuh gal tai-in ki lawi khin hi. Mangkangte leh ong tonpih uh Indian sumbukte, a la cing, huan bawl, puansawp Gorkhate leh kumpi inn lam dingin Sen khutsiamte – Zomi ahi lo gamdang minam li teng Tedim ah ong teng uh hi, Tua zawh kum sawm nih, 1910 kiim ciangin damdamin aphukhia ngam zawdeuh Zomite khatkhatin Tedim ah kumpi nasem leh ateng dingin pai ong kipan kik uh hi. Hih Zomite ten masakpeenna mun teng ‘Tedim khuakhuk’ kici hi.

Tedim khuakhuuk : 1910 pan 1950 ciangciang, tu laitak aa Myoma veng luui sung aa om, Kangphelh zum, nidang Sangpi mun pan leilulam Khuukpi (MKK Mualsuang) ciang hi aa, khua khung dingin Sikkhauto, Post Office zum lui pan khua nuai lam Sia Kam Cin Thang ( Pa Khup Cin Mang) te inn ciang, avekpi-in inn 20 kiim omna teng, “Tedim Khuakhuk” ahi hi. Aktui bang hileh, ‘Tedim tuicik’ cihna, tu aa Tedim khupi apiankhiatna leh akipatna mun, lamh kiatna alaai, navel, ahi hi.

Tedim Tualsuak: I suahna khua peuhpeuh ah tualsuak ihi hi. Tedim aa asuak khempeuh zong Tedim tualsuak hi pah hi. Ahih hangin hilai ah ‘Tedim Tualsuak’ cih leh ‘Tedim tualsuak’ ci-in, ‘T’ leh ‘t’ in ikhen ding hi. Banghang hiam cih leh ‘Tedimte gilo’ ci aa kingawh thei zeelte pen Tedim Tualsuak (1910-1950 aa suak) te hipha deuh aa, tua nung aa asuak Tedim tualsuakte ‘gilo lo’ uh ahih ciangin gawm khawm leng ki-awihuai lo, amau adingin, unfair — “zawng nek ngau-in thal puak” abat ding uh deih lohna, khualna ahi hi. ‘Tedim Tualsuakte’ pen hih ‘Tedim khuakhuk’ sung aa suak, Tedim khua ii Second generation-te, ka hi uh aa tua nung aa suakte, Third generation pan leh ong nungtunte tate(1950 khit) – ‘Tedim tualsuak’ (a gilo lote) ahi uh hi.

Banghangin Tedim Tualsuakte gilo kici? Hih pen Tedim State High School sang naupangte sung pan aa piang kisimmawhna nam khat ahi hi. Sang naupang sung aa gitlohna, gualheuna pen bullying kici hi. Banghang Tedim Tualsuakte gualheu? Tua hun lai-in tu hun tawh kibang lo-in, Tedim khua sung leh khuata aa annek-tuidawn, puansilh-nikteen leh nuntak zia peuhmah pen, kuamatekin i theihsa mah bangin, ki-khai simtham hi. Sang ong kah uh ciangin, zong kisil khol lo uh aa, nam pempam thei uh hi. A puan uh zong nin zawdeuh pah lui zawdeuh pah, hik khawng, khak khawng zong nei thei takpi uh hi. Naupang pawlkhatte bang naptui tolhtolh thei lai uh hi.

Mi khempeuh kisimmawh lo ahih ciangin thu om lopi kisimmawh cih om lo dingin ka um hi. A simmawhhuaite bek mah kisimmawh hi ding hi. Khatvei Tedimte gilo ci aa lai a at thei zeel khatpa kidawng kik aa,“Sang kah lai in bel, naptui tolhtolh khawngte kisimmawh mah e” acih ziau pen maan thei dingin ka um hi.

Kei khangual sung ah zong agilo om mah hi. Ahih hangin khat bek ka thei lai aa, kei mahmah zong tawh ka kitawng ngei uh hi. Kei pen ka nu ka pate-in Cope Topa ong tun aa kipan Pasian na saangin, ka pa Tedim ah pawlpi makai upa ahih baan ah pawlpi tawh kisai, thu kikupna, la sinna, lungdambawlna, kum thak muakna ko inn vive kizang mun hi. Ka nu ka pate-in “Midang kuamah simmawh, nuihsan, ciing, ko thei lo ding hi uh teh” ci-in ngaat-takin ka innkuan sung thukham khutnuai pan ka khang khia hi.

Tua hi kei leh sang ah ka tutpih pa akhut ah cithak vei-in kikhuatkhuat aa, a zatui nuh kaat nam phengphang tawntungin haksa kasa mahmah hi. Asawt ciangin a khut cithak ong lawh aa ka u-te-in ka tutna ka kheel nadingin siamahte kiang ong gensak ciangin mun dang khat ah ka tu hi. Hih pen ka tutpihpa simmawhna, bullying, hi lo-in cidamna, health tawh kisai aa ka tutna mun akheel ka hi hi.

Tun bel khuatate Tedimte sangin zong hautheizaw, pil thei zaw uh aa, siangtho ta uh ahih manin tua bang om nawn lo dingin ka um hi. Hihte tangthu ong suak ta hi.

Tedim Tualsuakte’ gitlohna bang ciang taktak hiam? Tedim Tualsuakte gilo akicih hangin khua dang sangnaupangte tung cikmahin akhut lum uh nga ngei lo uh hi. A pau awsuah, ‘ciing’ ciang bek hi aa ataktakin ‘pau ciing’ cih lel pen bullying zong cih dinghi lo hi. Bullying pen, a lu kiuh sak, abil nuai sak, apang beng, sawn pai, sui, tuum, apuan uh balkeek sak, vua cih bang ciang bullying kici hi. Tua ahih ciangin gilo cih nading zong om taktak lo-in ka mu hi. “Dik lo” cih ciang bek hi leh maanpeen ding hi.

Bullying, ki simmawhna cih pen mihingte pianpih ngiat lungsim hoih lo khat ahi hi. Tua ahih manin, aneizawdeuhte-in a nei lo, a thaneemte zawhthawh bawl thei aa, apil, asiamte-in zong bangmah theilote thusim lo thei cih pen leitung ngeina ahi hi. Sang naupang sung, zum sung, zato sung, galkap sung, company sung, set-zung nasepna sung, sports sung, biakna sung nangawn ah bullying om hi.

Na khua ciat uah zong khat leh nih om ding hi. Beh khat sung nangawn ‘Ko bulzaw ung, no adawnlam hi uh teh’ kicici-in ki neubawl zong om lai ding hi uh teh. No khua sang aa zawngzaw na khua vengte uh “bangmah nei lo mizawgte” ci aa ako zong om thei lai ding hi uteh. Hite kisimmawhna, gitlohna vive ahi hi.

A hih hangin mikim tua bangin gilo lo leuleu hi. Tedim Tualsuakte sung ah zong, akam sung na sawk hangin ong pet lo ding tampi om hi. Tua agilo na cih uh Tedim Tualsuak nih leh thum bek hi aa, no mah bangin ko zong ‘gilo’ ka sakte uh ahi hi.

Tedim Tualsuakte hizahin gilo akici hangin, cikmahin, physical, thatang zang ngei lo-in mi awkaih ‘ciing’ cih ciang bek ahih lel ciangin anehno, akhasia baih phadiakte i hi lel kha diam ci-in khatveivei ka ngaihsun hi. Ei sangin mun dang ah suukzaw hi napi naupang ngeina ci-in gentaak sa lo uh hi. Upatvai ka sa hi.
Na khua sung tek uh na ki-en un. Naupang gilo khat leh nih om hamtang ding aa, adik mahmah zong tampi om veve ding hi uh teh. Tedim khua sung zong tua bang mah ahi hi. Tedim bek hi lo lai hi.

Falam Tualsuak sung ah zong om lua hi. A khuakiim aa khuatate pau, gtn., ‘Balai kai tu’, Phalam pai ding acihna kiciing uh hi. “Patal cilmul hang lei uh law”, Putek cilmul,(Bokthok acihna) ong lei ve vua, acih khawng ki ciing lua uh hi.

Haka Tualsuakte nasiazawkaan lai uh hih tuak hi. Khua kiimte Haka apai uh ciangin, khuavak lai-in lut ngam lo uh aa, Haka khua nawl aa, Cawbuk, bawng buk omna ah khuazin ngak photin tua khit teh khua sung lut ngam pan uh hi. Tedim ah tua bang zahdong piang ngei lo hi.

Zangkong Tualsuakte : Kawl gam ah zong om lua ahihna, “Mandalay-saka, Moulmein-asa, Yangon-acua” cih paunak nei liang uh hi. “Mandalayte aw neem aw khum, Moulmain te’n an lim ne, Yangon-te kiphasak” ci uh hi. Zangkong Tualsuakte zong ei sang khauh pai zek uh hi ding hi. Koikoi ah khuapi sung naupangte agualheu zawdeuh pen mun khempeuh ahi hi. Tedim bek hi lo hi. A dik khin dingin na lamet leh nang athei lo, akhial na hi hi. A gilo khin na sak leh zong nang akhial na hi leuleu hi.

Akhangto mangkang gamte nangawn ah sang naupang sung ah kisimmawhna, bullying tu teekteekin tam mahmah ahih manin tua bang athuakte huh nadingin kipawlna zong om kawikawi hi.

Bullying ‘ahi lo ciamnuihna’ aa pau kiciing mawkmawk: TedimTualsuakte kithutuakin innkuan khat ka bang uh hi. Tedim ah khuakiim khuapaam pan vanzuak-vanlei, lengla kitawlnga lo ahih manin, awkaih tuamtuam kiza hi. Tedim khuakiimte awkaih tuamtuamte kiciing in, Tedim Tualsuakte pate teekteek zong ka kiciing uh aa ka gualnuam thei uh hi. Sangmangpa F O Nelson zong kiciing lel hi. Mi pau ciin pen Tedim Tualsuakte zat tangzang ngeina khat hi lel aa kisimmawhna cih bang hi lo hi. Tua nong theihpih ding uh ka deih hi.

Kei mahmahin simmawhna ahi het lo, pau, awkaih tuamtuam thei nuam ngiat ka hih manin, Sihzang awkaih, Teizang awkaih, Khua no awkaih, Dim(Laitui) awkaih accent cihbang kisinsinin, ciingciingin a kimangthei gawp ciang ka pau thei kim hi. Kei ciin pen a practice ka hi aa simmawhna hi lo hi.

Mangkang gam ah zong TV sung ah mi pau ciing, mimic, asiamte mi nui sak dingin sum tampipi tawh kicial zawzen uh hi. Sammy Davis Jr. bang midangte pau ciin siamin minthang mahmah ngei hi. Awkaih bang aa pau (ciing) pen kisimmawhna zong hi khin het lo hi. Asia lam vive aa kila khazaw hi ding hi. Hih atung aa thu-teng hangin Tedim Tualsuakte bullying taktak ahih loh hangin “gilo” ong kici hi.

A CITE TUNG TU cih tawh kisai-in, lai at pa-in, “Sialam’ ci aa Tedim Tualsuakte otna gu leh gau athuak hihang” ci-in “manta khalgah ka nek man hiam?, nahtang tolawk ka nek manhiam?” acih bangin ki sungsia-in ong at hi. Lungneu nading, kisuan nading bangmah om lo hi. Ei leh ei mawh kisuanin kisuangtaakin launa pen Pasian muan lahna hi aa ‘superstition’ ahi hi. I khialhna pepeuh Pasianin khetbuk tawh ong kheeng suk pahpah hi leh hih sangin khialhna lianzaw tham i bawl i gen tampi om hi. Kuamah peng lo ihih ciangin i mawh bangin thuak leng leitung ah kuamah om nawn lo ding hi.

Taanglai upna : Nidanglai-in i pu-i pate-in kuahawmpi, suangtumpi, tuili , cik tui, gul lian leh tang amuh uh ciangin dawisia kausia, gulsia, tangsia tuak kisa-in lau uh aa “ih kaamsia, agu agau thuak kha ni” ci-in dawi kithoih uh hi. Pau khialh, gen khialh khat aneih uh ciangin zong agu agau kihta-in ciing uh hi. Hih pen dawi vangliatna, agik hakkol ahi hi. Tu-in upnaneite i hi aa, Pasian kiang ah Zeisu sisan hangin mawhmaina i ngah hi. Khasiangtho-in ong keem ong dalin lam ong hilh hi. Gu leh gau kihtak ding om nawn lo hi. Gal vengta hi. Positive thinking tawh i nuntak ding i kisam hi.

Tedim Tualsuak bawlung team-in azawh uh ciangin “Kuan lel, kuan lel – Sialam, Sialam” ci-in ki kona agu athuak i kisak leh hih na ngai un. A kam tawh zong gen hi bek lo, a pumpi tawh Chin State khuapi, thumaan lopi, zuauthu, lule vai tawh zum order thoh simin Kawlpi pan Haka ah kikhin sak, a kitheih ciangin kikhawl kiksak napi a lai sel sim ‘ngam’ zahdong aa zuautatna pen “Sialam“ ci aa ot lel sangin azah tampi-in siazaw napi agu agau koi ah om hiam? Tu-in kum 60 phata hi. Paallun lai mawk uh hi. (Hih ka cih ciangin ei zong tua bangin i paallun nading zuautatin mi khem ni ci aa-agen ka hi kei hi. Tua bang asia ngaihsut leh gamtatna peuhmah, kuamahin zang kei ni ci-in kong hanthawn zaw hi; Pasian deihna hi lo hi.)

Tedimin i hamphat ding ngah lohna “Sialam” aci Tedim Tualsuakte kam agu-agau lel hihang ci aa ki ngawh miikmeek pen evidence, matlap om lopi kimawh sakna hi aa ki-awihuai lo hi. Pasian muan lahna hi aa, nidang lai aa ki thoihthoihte daan ahi hi. Pasianin‘Sialam’ cih lel gu leh gau ong thuak sak ding hi leh tua sangin asiazaw, akihhuaizaw ngaihsut sia, hazatna leh gamtat khiatna tampi i neihte i thuak masazaw ding hi.

Heh dam lo-in nitum sak kei-in : I neulai aa khat peuhin ong simmawhna khantawn aa puak pen agimhuai mahmah hakkol gik khat ahi hi. Mawtaw tung tuang napi aa hakkol asuah lo tawh kibang hi. Pasian amuang mite-in, vangik khempeuh Amah tung i nga ding hi. I ciamteh nawn kei ding hi. Van gik i kisuan kikkik kei ding hi. Lungmuangin i mangngilh siang vilvel ding hi. Kawl gam zum ngeina paizia palsat zeen aa i State khuapi kituah nading ahanciam pipa Hakate hi lo hi; Haka Tualsuakte’ bulling athuak ngei Cawbuk aa khuamial ngak ngei, Tangpi kici khuano pan ahi hi. Aman Haka Tualsuakte git lohna ciamteh nawn lo tham lo-in Haka adding tua zahin hanciamin sem hi.

Tua baan ah, mi tampi gam thumna tung uh aa Haka khua sung ah inn hoih khattek lam kidemin Haka khua it uh, kisaktheih pih uh, puah uh hi. Tuate zong Haka Tualsuakte simmawh a thuak ngei, Cawbuk aa khuazin a-ngakte tu leh tate vive ahi uh hi. A khasiat-muisiatna uh ciamteh lo, a tu-a tate zong ki hilh sawnsawn lo uh hi. Pholaaklaak lo uh hi. Mai sak uh hi. Tuate ettehhuai, pahtakhuai kasa hi. Hampha zong kasa hi. Tua bang aa lungsim hoih aneih uh zong Zomite adingin ka deihgawh hi.

Tangthu tuanthu ciapteh huai om aa mangngilhhuai zong om hi. Zomi itte adingin tuhun lai deuhdeuhin khuapi leh khua neu ki muh khialh nading phollaak lo-in kidop huai mahmah hun ahi hi.

Khatvei Simsing paak, Khatvei Zosing paak: Mangkang kumpi-in ong uk aa kipan, Falam ah Mangpi khat, anung ciangin Menzi ong tu aa i Zogam khuapi hi-in, sawtpi mah vaanglian hi. Tua khit ciangin, Tedimin kum 26 sung i makaih aa mun khempeuh ah ki ukna, kumpi nasem, thunei-in i om hi. “Tedimte bekbek” ong kici liang hi. Tu-in Haka Pasianin thupha apiak laitak ahi hi.

Leitung ah zong, Rome thahat-in a kia thei lo ding kisa uh hinapi, kiam kik uh hi. England kumpi ong khangin a ukna gam sung ah ‘nitum ngei lo’ zahin zai hi. Kiam kik hi. America ong thahat leuleu hi. Mun khempeuh ah base ong phut uh hi. Tu-in kiamlam manawhin kigen hi. Upmawh het lohpi, Sengam ong khangto-in leitung superpower ong hi ta hi.

Sing bang paal kik lo ding cihna om lo hi. Tang khua khalin huihkhi nun ong dang hi bek hi.

Kipumkhat nading GZA kikup hunin : Zomite nu leh pa, GZA-in kipumkhat nading bulphuhin , ‘A Liveina Kikhoppi’ aneih laitak tawh kituakin, meima damsa hong khia kikkik i bat ding ka lau hi. Khuapi mite leh khuata mite ki khen nading abehlap i hih khak ding zong ka lau hi. Namkee in ong khen, awsuah in ong khen, biakna in ong khen, beh leh phungin ong khen adung-avai-in ikikhen zaan dikdek zo hi.

Leitung ah Zomite kikhenkhapna ahaupeente ihi aa, “asihin zong i gai zo nawn kei hi” Behlap thuahthuah nawn kei ni, sanggamte aw. I mipih, Falam, Haka-te en dih un. A mau zong tua bang Tualsuak gilo nei ciat uh aa, ei a sangin zong suukzaw lai napi gengen beek lo uh hi. Tua tham lo, akhuapi ciat uh it in kisaktheipihin puah ciat, laamto ciat uh hi. Lungsim kicing nampivai icih ih bang ahi hi.

Thupha voucher : Amaan lopi aa deidanna, Hazatna hangin ngah ding kikhaktanna, aana(Power abuse) nahang thuakna khat pepeuh i ngah leh Pasianin thupha voucher khat-ta ong piapia ahi hi. Lungduai-in Amah muang ni. Ni khatni teeiteei ciangin tua voucher tawh thupha i saang kik ding hi.

Thu khupna : Khanglui upna pomin tanglai pek aa naupang pawkkhat kampau gu leh gau kisungsiatpih in kingawhngawh nawn kei ni. A gilo tengin zong ong nusia khinta uh hi. Numei sia bang lo-in pasal vai tak leh nampi vaitakin khasiat-muisiatnate cillum tawh ong valhin ong mangngilh un. Tedim Tualsuakte nute-pate zong khua neu pa mah ahi uh hi. Unaukhat sanggam khat ihi hi.

Tu-in Tedim tua bang hi nawn lo hi. Ong sin dih un. Tedim Tualsuak gilo om nawn lo hi. A migi mahmah tampi ka om uh hi. Tedim khuapi ah ong hawh, ong baang un; i khuapi hi, na khuapi hi. I sanggamte ettehin amau thuaknate uh no thuakna sangin lianzaw napi maisak bek lo-in amangngilh uh ong ciing un la, akhuapi ciat uh apuah, azuun bangun no zong i Tedim khuapi ong zuun un ci-in khut zaakin itna tawh kong muak uh hi. Dr. James Dongno