Tedim khua khantohna ~ Khup Khan Thang

Tedim khua khantohna ~ Khup Khan Thang

Laisim mi akua mahpeuh, Tedim khua khantohna thu ih gal zakciangin ih lung bang hong noptuam keei hi. Leilulam ah Tuilangh leh Tualzang khua khung ciang bang inn or innmun dim khin cih te khawng ih mitkha in kibawl theilo zawzen hi. Up-hak bang ka sa hi. Banbang hileh a’ziakai luat maa-in, Town planning hoihtak bawl-in, Zato, Sang, Shoping Center, Fresh Market, Park etc. mun ding cih khawngte ihgel kholh kul ding hi. Tua ban ah, Veng min (Yatkwet or Quarter) zong ih phuah kul ding aa, lampi min zong ihvawh kul ding hi.

Nidangin Tedim khua pen Hausa khat bek om aa, Tedim mah kici pah lel hi. (FYI ; Tedim khua Hausa masa pen Kala te Mukta hi kici hi.) Kum 1962 khit ciangin, Tedim ah Hausa Committee 3 pha uh aa, Veeng 3 kisuah in, Lawibual veeng ah, Pu La Cin Khup, Tedim veeng ah Pu Khaam Za Thang leh Sakollam veengah Bo Kham Khaw Langh te Hausa ahih uhhi. Tua hun-in Leilum pen Tedim Myo ah kihel nailo hi. Hausa pen B. Cin Nang hi.

Lawibual veeng ihcih pen a kimawkphuah hilo in, nidang lai-in, tu aa lawibual primary sanginn mun bual ah Pu Mang Gin lawi te bual uh ahih man in, “Mang Gin Lawibual” ki ci aa, tuapan in damdam in Lawibual hong suak ahihi. Tua mah bangin, nidang lai in, Mangkaang galkap te in, Tedim khua leilulam munzaang tengah POLO (Sakol tung tuang kawm aa, bawllung neu sat) kimawl uh ahih man in, tua mun pen Sakollam zaang ki ci hi. Mi hong kiten’ ciangin Sakollam Veeng hong kici hi. Tedim pen a khua min ai ciangin, Tedim veeng pen Myoma veeng kici hi. (Theiding: Mangkang te hong tun maa, Tedim khua veeng minte agen ki hilo hi)

Tu in, ih Tedim khua pen Ciimtang ciang dongphial zai ta ahih man in, Mualtuk khensiah Leilu lam munteng Veeng khat (Yatkwat) khat suah in, a veeng minding “Khuangnung Veeng” ci leng hoih ka sa mahmah hi. Banghang hiam nacih uh leh, Khuangnung khua pen tua mun kiim tengah om in, taang khua (Old village Or Ancient Village) khat ahihi. India gam lam atung ih sanggam “Simte” a ki cite in, ko Khuangnung khua pan aa alal or apeem ka hi huh hi ci hi. Tua hihleh ihsanggam te tawh zong ih ki-itna hong khang dingaa, taangthu gengen zong ihsuak ding hi.

More: Tedim Khua Lampi te Part I ~ Khup Khan Thang

“Tuicing” a kicipak pen a kikipsak maa aa, kei muhdan kong genna hi. “Tui” ihcih kammal pen taanglai in ihpu ihpa te’n “Khua” a cihna hi aa, ko khua “Tuithang” bang “Khuathang” acihna hi ci-in Sia Kam Khaw Thang in gen ngei kici hi. Tua hileh “Tuicing” pen “Khuacing” a cihna hi lel aa taangthu khiatna taktak neilo kasa hi.

Lungdam

Khupkhan Thang Taithul
Norman, Oklahoma
U.S.A.