Trump Organisation panin Trump kitawpta & Trump Organisation thu tomkim

Trump Organisation panin Trump kitawpta & Trump Organisation thu tomkim

Jan. 24, 2017: US upadi (constitution) in President leh ulian len ten gamdang company tung panin huhna leh deihsakna (aid and favor) a ngah ding uh dalna in President ten nasepna dang tawh a thuah khawm ding uh phal lo hi. Ahih hangin Clinton-te nupa tua bangin na om lo uh a, Clinton Foundation ah a zaa uh nusiat san nuam lo uh a, Arab/Gulf kumpite tung panin huhna sum (tampi) na ngah uh a, huhna a ngahte uh a thuk kikna dingin huhna piate tungah galvan tampi a piakna dingun State Department na thuzawh uh ahih manun a gamtatna uh-ah genbaang ding tam mahmah hi.

US President Donald Trump in hih bang tawh kipelh theihna dingin Trump Organization company ah a sepna Chairman leh President zaa panin kitawp (resigned) ta hi. US President Donald Trump in a zum a luah ma-in Trump Organization ah a sepna (post) panin kitawp ta hi ci-in zan in White House Press Secretary Sean Spicer in news reporters-te kiangah gen hi.

Trump Organisation pen Trump’ pi Elizabeth Chris Trump leh a tapa Fred Trump (Trump’ pa kum 18 a phakin) in 1923 in a phuankhiat uh a, business entities 515 om a, kum 94 cing ta hi. Trump’ pi Elizabeth Trump leh a pasal Frederick Trump ah 1906 in Queens khua-ah peem uh a, Frederick in buhkhuh natna nam khat (influenza) hangin 1918 in sih san hi. Frederick in a zi leitang a man-a tuatin (estate valued) $31,359 (hih pen 2016 in tuat leng $492,016 tawh kikim) nusiat hi.

Elizabeth pen real estate business lamsang talent nei mahmah ahih manin Donald Trump’ pa Fred Trump tawh a pasala sih khit nungin ” “Elizabeth Trump & Son” company hong phuankhia uh hi. Hih company ah Donald Trump in Wharton School of the Pennsylvania University ah Economics degree sim in a kah a kipanin (1968) na sem hi. A buaih ngah khit 1971 in a company min dingin “The Trump Organisation” ci-in a min a laih ahi hi. A headquarter pen Trump Tower, New York City kizang hi. Trump Organisation nei pen Donald Trump hi a, a Trustees hih bang ahi hi:

• Donald Trump Jr.
• Eric Trump
• Allen Weisselberg (CFO)
• Executives:
• Michael D. Cohen (EVP)
• Jason Greenblatt (EVP)
• Matthew F. Calamari (COO)
• Trump Organisation nasep (Services) pen hih bang ahi hi:
• Construction
• Real Estate Development
• Entertainment
• Hospitality
• Retail and Online Shopping
• Diversified Investments.

Donald Trump in Trump Organisation ah President leh Chairman 1971 panin 2017 (a kitawp ma dong) na len a, President a let sung a tapate Donald Trump Jr. leh Eric Trump (a nih un hih company executive vice presidents sawtpi a len) leh CFO sawtpi a len Allen Weisselberg in hih company management leh trustees len ding uh hi. Source: Sputnik and Wikipedia/ Thang Khan Lian