News In Brief: Thuthak tomkim ~ The Tedim Post (18 Aug)
2020 kiteelpi ah ZCD pan mee kuanglui ding ahi Pu Zam Za Mung in 2016-2020 UPDJC kipawlna pan kilemna ding vaihawmna hangin State Counsellor Daw Aung San Su Kyi in pahtawina pia hi. Hih pahtawina a ngah pen mimal 49 pha uh ci hi.
A beisa kha khat sungin Myanmar gamah Facebook zang mimal Tein 30 val bang ki behlap vat hi, ci-in Social Media lam thukantel pawl in gen uh hi. Tulaitak Myanmar gamah Facebook zang mimal 28,500,000 val pha ci hi.
Yangon ah Biakinn te zuih ding thukhun 23 tawh August 17, 2020 ni akipan ki hong kik ta hi, cih thu kiza hi.
Kachin State, Hpakan khuapi ah guahtam luatna hangin guntui pi 7 pan pi 10 dong bang khang ahih manin mipi te in inn le lo te nusia in munsangna lam zuan uh hi, cih thu kiza hi.
NLD, USDP leh UBP Party te in 2020 kiteelpi ah Myanmar gambup mun tampen ah a dem party te ahi uh hi. NLD Party pan mimal 1,143, USDP Party pan mimal 1,129 leh UBP Party pan mimal 927 in dem ding uh ci hi.
2020 kiteelpi ah aki zang ding laitui kisam teng khempeuh pen Japan kumpi leh UNDP kipawlna te in kipawlkhawm in a bei teng hong sik ding uh hi, cih August 14, 2020 ni-in pulak khiatna nei uh hi. Laitui kisam ding zah thawl 113,000 lei ding uh ci hi.
Spain gam Madrid Khuapi ah Covid-19 natna akilawh gawp loh nading in Mask(Muktuam) bulh hamtang ding cih thukhun pen mimal suahtakna tawh kituak lo hi, ci-in mipi te in lungphona lak uh hi.
Thai gamah sangnaupangte makai in kumpi tung lungkimloh lahna lungphona August 16, 2020 in nasia tak in nei uh hi. Hih lungphona ah mimal 20,000 bang kihel hi, cih thu kiza hi.
New Zeland gam, Aukland ah Covid-19 natna ngah ki behlapna hangin September 19 ni a aki bawl ding kiteelna pen October 17, 2020 ni-in ki khin to hi.
India gamah Covid-19 hangin ni khat thu a asi mi 900 val ki behlap a, tu in India gamah a si mi 50,000 val ta hi, ci-in India gam a thuneite in August 17 ni-in gen uh hi. India pen America, Brazil leh Mexico khit ciang Covid-19 hang a misi a tam pen gam ahi hi.
More: Zogam pilna saang sinna ah suahtakna
Tukum April-June, kha 3 sungin Japan te a sumbawlna uh 7.8% bang kia a, kum 40 sungin Japan gam ading sumbawlna a tam kiat penpen hun uh ci hi. Source : 7day news, , Eleven Media, The Myanmar Times, VOA Burmese, IRPD Tedim. Thukai khawm: Lia Lu Lun, Lia Shang Shang.
Comment piaknop aomleh...