President Trump in anaseppih Tillerson (Secretary of State) nasep khawlsak

President Trump in anaseppih Tillerson (Secretary of State) nasep khawlsak

US President Donald Trump in anaseppih Secretary of State Rex Tillerson pen Tuesday ni in nasep khawlsak “fired” cih CNN pan kiza hi. Tua nasep akhawlsak Rex Tillerson ii munah asemdingin CIA Director Mike Pompeo pen sepsakding geelna nei kici hi.

North Korean leader Kim Jong Un leh US President te abuai mahmah laitak in panmun thupi mahmah ahi Secretary of State pen nasep abingkhawlsak manin lamdang kisavat mahmah hi.

Hihvai tawh kisai in President Donald Trum inzong ama Twitter tungah gelhkhia a, CIA Director Mike Pompeo in “Secretary of State” panmun ah hongsem dinghi. Amahpen nasep kician mahmahding hi. Rex Tillerson zong asepsa te tungah lungdam mahmah hi. CIA Director munah Gina Haspel in hongsemding a, amahpen tua panmun ah amasapen numei panmun angah masapen hiding hi. Avek un ka lungdampih mahmah hi ci’n gelhkhia hi.

White House ah President Donald Trump in Reporters te agenkhiatna ah Secretary of State asemlui Tillerson pen apil akician mahmahkhat hi a, nasepna ah hoihtak kaki thuahkhawmthei uhhi. Rex Tillerson pen nakpi in alung nopzawding hi ci’n genkhia citciat hi.

Video: President Donald Trump has fired Secretary of State Rex Tillerson and will replace him with CIA Director Mike Pompeo

Rex Tillerson in ahihleh hihvai tawh kisai in President Trump in banghangin nasep khawlsak cihpen genkhia hetlo hi. Banghang nasep kikhawlsak cihzong ahang theicianlo khading hi ci’n Undersecretary for Public Diplomacy Steve Goldstein in genkhia hi.

White House sungah Chief of Staff John Kelly in “nangpen adang khatin honglaihding hi” ci’n Rex Tillerson kiangah genziau a, banghang banghun cihpen gencianna omlo cihi.

More: New York aom President Trump ii neihsa Trump Tower meikang, mi 2 liam

Ahi zongin Tuesday ni in President Trump in Twitter tungah hihvai tawh kisai in mipi muhtheihding in gelhkhia tamawk ahih manin, Rex Tillerson ii nasep khawlsakna “Official Termination” pen aki kipsak hongsuakta hi. Nungkum May khasung inzong President Trump in FBI Director James Comey pen anasep bingkhawlsak ziauhi. President Trump in amaban bangteng hongsem giapgiap laidiam? North Korean leader Kim Jong Un tawh maitang kituah in thu hongkikum takpi uhdiam? Sawltak #zomidaily